មេបញ្ជាការតំបន់ប្រតិបត្តិការសឹករងកំពង់ធំ ដាក់បទបញ្ជា ៣ ចំណុច ដល់កងកម្លាំងចម្រុះក្នុងការ បង្ក្រាបបទល្មើសនេសាទ ក្នុងភូមិសាស្ត្រ ខេត្តកំពង់ធំ
ខេត្តកំពង់ធំ៖ នៅព្រឹកថ្ងៃទី៣០ ខែកក្កដា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍ នៃគណៈកម្មការ ការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ បានទៅសំណេះសំណាលសាកសួរសុខទុក្ខ ដាក់ចេញបទបញ្ជារ ចំនួន បីចំណុច ស្តីពីការ ការពារ ទប់ស្កាត់ និងបង្ក្រាបបទល្មើសនេសាទខុសច្បាប់ និងឧបត្ថម្ភស្បៀងអាហារ ប្រេងឥន្ធនៈ ជូនដល់កងកម្លាំងចម្រុះកំពុងប្រចាំការបង្ក្រាបបទល្មើសនេសាទខុសច្បាប់ នៅឃុំផាត់សណ្ដាយ ស្រុកកំពង់ស្វាយ និងឃុំ ពាមបាង ស្រុកស្ទោង ខេត្តកំពង់ធំ ។
លោកអនុសេនីយ៍ឯក ហែម ថន នាយទាហាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ប្រធានទីបញ្ជាការស្រាល និងលោក យ៉ាន លីម មន្រ្ដីជលផលជាប់កិច្ចសន្យា តំណាងឲ្យសង្កាត់រដ្ឋបាលជលផល កំពង់ស្វាយ ក្រោម នៅឃុំផាត់សណ្តាយ ស្រុកកំពង់ស្វាយបានឡើងរាយការណ៍បញ្ជាក់ថា អស់រយៈពេលជិត ២ ឆ្នាំ ដែលកងកម្លាំងចម្រុះ ដោយមានកងយោពលខេមរភូមិន្ទជាស្នូល បានធ្វើសកម្មភាព ការពារ ទប់ស្កាប់ និងបង្ក្រាបបទល្មើសនេសាទខុសច្បាប់ ទទួលបានលទ្ធផលល្អប្រសើរគួរជាទីមោទនៈ ។ ពិនិត្យជារួមបទល្មើសនេសាទនៅក្នុងភូមិសាស្ត្រ បឹងទន្លេសាប ខេត្តកំពង់ធំ មានការថយចុះប្រមាណពី៧០% ទៅ ៨០% ដោយកងកម្លាំងចម្រុះ បានខិតខំធ្វើសកម្មភាពជារៀងរាល់ថ្ងៃ ទាំងការអប់រំ ណែនាំ, ការមានវិធានការរដ្ឋបាល និងការបង្ក្រាបឧបករណ៍ល្មើសនេសាទខសច្បាប់នៅនឹងកន្លែង បានជាប់ជាប្រចាំ ។ ហើយជាមួយនេះ ប្រជាពលរដ្ឋភាគច្រេីនក៏បានយល់ដឹងកាន់តែច្បាស់ និងបានចូលរួមអនុវត្តតាមច្បាប់ស្ដីពីជលផលថ្មីផងដែរ ។
ឧត្តមសេនីយ៍ទោ សោម ស៊ុន បានថ្លែងនូវការកោតសរសើរ ចំពោះកងកម្លាំងចម្រុះទាំងអស់ ដែលមានកងយោធពលខេមរភូមិន្ទជាស្នូល បានខិតខំបំពេញភារកិច្ច មិនខ្លាចលំបាកនឿយហត់ ប្រកបដោយស្មារតីទទួលខុសត្រូវខ្ពស់ ទាំងក្នុងរដូវប្រាំង ក៏ដូចជារដូវវស្សា ដោយបានពុះពារនៅរាល់បញ្ហាប្រឈមនានា និងគ្រប់ឧបសគ្គទាំងលក្ខណៈភូមិសាស្ត្រ និងលក្ខណៈធម្មជាតិ ពិសេសបានធ្វើសកម្មភាពយាមល្បាតតំបន់អភិរក្សពូជត្រីទាំងនៅពេលយប់ និងនៅពេលថ្ងៃ នៅតំបន់បឹងទន្លេសាប ដែលសកម្មភាពនេះបានធ្វើឲ្យទិន្នផលត្រីសំបូរឡើងវិញ នៅគ្រប់ទីកន្លែងនៅទូទាំងប្រទេស ។
ឧត្តមសេនីយ៍ទោ សោម ស៊ុន ក្នុងនាមអនុប្រធានអចិន្ដ្រៃយ៍ នៃគណៈកម្មាធិការការពារ ទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំ បានណែនាំនូវវិធានការមួយចំនួន ក្នុងការអនុវត្តន៍ច្បាប់ស្ដីពីជលផលថ្មីនៅក្នុងរដូវបិទនេសាទនេះ និងបានដាក់ចេញនូវបទបញ្ជាចំនួន ចំនួន ៣ គឺ : ទី១ ត្រូវបង្ក្រាបឲ្យបានដាច់ខាតមិនឲ្យមានការឆក់ត្រី តាមគ្រប់រូបភាព ។ ទី២ ត្រូវបង្ក្រាបឲ្យបានឧបករណ៍នេសាទស្បៃមុងខុសច្បាប់ នៅគ្រប់ទីកន្លែង និងទី៣ ត្រូវការពារឲ្យបានតំបន់អភិរក្សពូជត្រី នៅគ្រប់ទីកន្លែង ។ ជាមួយនោះដែរ បានណែនាំដល់កងកម្លាំងចម្រុះទាំងអស់ត្រូវទប់ស្កាត់ឲ្យបាន មិនត្រូវឱ្យមានការនេសាទលៀស ដោយប្រើប្រាស់គ្រឿងម៉ាស៊ីនជាដាច់ខាត ។
នៅក្នុងឱកាសនេះ ឧត្តមសេនីយ៍ទោ សោម ស៊ុន បានប្រគល់ ស្បៀងអាហារ គ្រឿងឧបភោគបរិភោគ ព្រមទាំងប្រេងឥន្ធនៈ ដែលជាអំណោយរបស់ឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ជូនដល់កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដើម្បីបន្តសហការ ធ្វើសកម្មភាពបង្ក្រាបបទល្មើសនេសាទខុសច្បាប់ នៅក្នុងរដូវបិទនេសាទនេះឲ្យទទួលបានជោគជ័យ ដើម្បីធ្វើឲ្យផលត្រីរបស់យើងបានសម្បូរឡើងវិញ ក្នុងការបម្រើសេចក្តីត្រូវការជូនប្រជាពលរដ្ឋនៅទូទាំងប្រទេស ។អត្ថបទតំបន់ប្រតិបត្តិការសឹករងកំពង់ធំ-ពិនិត្យអ៊ុមញឹប។
