រដ្ឋបាលខេត្តកំពង់ធំ បើកវគ្គបណ្តុះបណ្តាលលើកកម្ពស់សមត្ថភាពវិជ្ជាជីវៈដល់អាជីវករលក់ជី និងថ្នាំកសិកម្ម
(AKPកំពង់ធំ)៖ រដ្ឋបាលខេត្តកំពង់ធំ សហការជាមួយ មន្ទីរកសិកម្ម រុក្ខាប្រមាញ់ និងនេសាទខេត្ត បានរៀបចំពិធីបើកវគ្គបណ្តុះបណ្តាលអប់រំសមត្ថភាពវិជ្ជាជីវៈដល់អាជីវករលក់សម្ភារៈកសិកម្ម (ជី និងថ្នាំកសិកម្ម) រយៈពេល៣ថ្ងៃ ចាប់ពីថ្ងៃទី២៩ ដល់ថ្ងៃទី៣១ ខែកក្កដា ឆ្នាំ២០២៦ ក្រោមអធិបតីភាព ឯកឧត្តម ឡោ រស្មី អនុរដ្ឋលេខាធិការក្រសួងកសិកម្មរុក្ខាប្រមាញ់ និងនេសាទ និងឯកឧត្តម លី វេត អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម អភិបាលខេត្តកំពង់ធំ និងមានការចូលរួមពីថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ថ្នាក់ដឹកនាំមន្ទីរជំនាញ ព្រមទាំងអាជីវករលក់ជី និងថ្នាំកសិកម្មមកពីបណ្តារាជធានី-ខេត្តនានា។
ថ្លែងក្នុងពិធីបើកវគ្គបណ្តុះបណ្តាលនោះ ឯកឧត្តម លី វេត និងឯកឧត្តម ឡោ រស្មី បានមានប្រសាសន៍ថា វិស័យកសិកម្ម គឺជាវិស័យដ៏សំខាន់ក្នុងការទ្រទ្រង់កំណើនសេដ្ឋកិច្ច ធានាសន្តិសុខស្បៀង និងជំរុញការអភិវឌ្ឍជនបទ។ ដូច្នេះ ការពង្រឹងសមត្ថភាពវិជ្ជាជីវៈដល់អាជីវករលក់សម្ភារៈកសិកម្ម គឺជាកត្តាចាំបាច់ ដើម្បីធានាឱ្យការផ្គត់ផ្គង់ធាតុចូលកសិកម្មប្រកបដោយគុណភាព សុវត្ថិភាព និងស្របតាមច្បាប់ជាធរមាន។
ឯកឧត្តម លី វ៉េត បានបញ្ជាក់ថា អាជីវករលក់ជី និងថ្នាំកសិកម្ម មិនត្រឹមតែជាអ្នកផ្គត់ផ្គង់ធាតុចូលកសិកម្មប៉ុណ្ណោះទេ ប៉ុន្តែក៏ជាអ្នកផ្តល់ព័ត៌មាន និងណែនាំបច្ចេកទេសដល់ប្រជាកសិករ អំពីការប្រើប្រាស់ជី និងថ្នាំកសិកម្មឱ្យបានត្រឹមត្រូវ សុវត្ថិភាព និងមានប្រសិទ្ធភាព។ អាជីវករទាំងអស់ត្រូវបន្តអនុវត្តការធ្វើអាជីវកម្មដោយគោរពច្បាប់ និងស្តង់ដារបច្ចេកទេស ដើម្បីរួមចំណែកលើកកម្ពស់គុណភាពផលិតកម្មកសិកម្ម និងការពារសុខភាពអ្នកប្រើប្រាស់។
យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ គិតត្រឹមឆ្នាំ២០២៦ ខេត្តបានរៀបចំវគ្គបណ្តុះបណ្តាលអប់រំសមត្ថភាពវិជ្ជាជីវៈដល់អាជីវករលក់ជី និងថ្នាំកសិកម្មចំនួន១៤វគ្គ ដែលមានសិក្ខាកាមសរុប១,៧១៧នាក់។
ដោយឡែក វគ្គដែលកំពុងដំណើរការនាពេលនេះ មានសិក្ខាកាមចំនួន១៧០នាក់ មកពី១៦រាជធានី-ខេត្ត។
វគ្គបណ្តុះបណ្តាលនេះ ផ្តោតលើការលើកកម្ពស់ការយល់ដឹងអំពីច្បាប់ បទដ្ឋានគតិយុត្ត និងបច្ចេកទេសពាក់ព័ន្ធនឹងការគ្រប់គ្រង ការរក្សាទុក ការដឹកជញ្ជូន ការតាំងលក់ និងការប្រើប្រាស់ជី និងថ្នាំកសិកម្មឱ្យបានត្រឹមត្រូវ សំដៅធានាសុវត្ថិភាពអ្នកប្រើប្រាស់ លើកកម្ពស់គុណភាពផលិតកម្មកសិកម្ម និងជំរុញការអភិវឌ្ឍវិស័យកសិកម្មប្រកបដោយចីរភាព។
ក្នុងឱកាសនោះដែរ ឯកឧត្តម អភិបាលរងខេត្ត បានអំពាវនាវដល់សិក្ខាកាមទាំងអស់ ខិតខំសិក្សា ស្វែងយល់ និងផ្លាស់ប្តូរបទពិសោធន៍ ដើម្បីយកចំណេះដឹងដែលទទួលបានទៅអនុវត្តប្រកបដោយប្រសិទ្ធភាព និងផ្សព្វផ្សាយបន្តដល់ប្រជាកសិករនៅតាមមូលដ្ឋាន រួមចំណែកលើកកម្ពស់ផលិតភាព គុណភាព និងសុវត្ថិភាពក្នុងវិស័យកសិកម្មកម្ពុជា។
អត្ថបទដោយ លោក ថុង ពុលររិទ្ធី
ពិនិត្យនឹងកែសម្រួលដោយលោកស្រី កែវ បូរី
