រដ្ឋបាលខេត្តកំពង់ធំជំរុញឱ្យមន្ទីរជំនាញនិងអង្គភាពពាក់ព័ន្ធយកចិត្តទុកដាក់ធ្វើផែនការវិនិយោគបីឆ្នាំរំកិល ២០២៧-២០២៩ ឲ្យបានទាន់ពេលវេលា
(កំពង់ធំ) ÷ ឯកឧត្តម ហ៊ឹម លីម៉េង អភិបាលរងខេត្តបានជំរុញឱ្យមន្ទីរជំនាញ និងអង្គភាពពាក់ព័ន្ធខិតខំយកចិត្តទុកដាក់ធ្វើផែនការវិនិយោគបីឆ្នាំរំកិល ២០២៧-២០២៩ ឲ្យបានទាន់ពេលវេលា។ ឯកឧត្តមលើកឡើងដូចនេះក្នុងកិច្ចប្រជុំស្តីពីការផ្សព្វផ្សាយសេចក្តីណែនាំស្តីពីការរៀបចំនិងកសាងកម្មវិធីវិនិយោគបីឆ្នាំរំកិលខេត្ត ២០២៧-២០២៩ ព្រឹកថ្ងៃទី២៨ ខែកក្កដា ឆ្នាំ ២០២៦ នៅសាលប្រជុំរដ្ឋបាលខេត្តកំពង់ធំ។
ឯកឧត្តមបញ្ជាក់ថាគោលបំណងនៃកិច្ចប្រជុំនេះគីដើម្បីឲ្យអ្នកពាក់ព័ន្ធយល់ពីខ្លឹមសារនៃសេចក្តីណែនាំស្តីពីការរៀបចំ និងកសាងកម្មវិធីវិនិយោគបីឆ្នាំរំកិលខេត្តបានយល់ពីខ្លឹមសារលិខិតបទដ្ឋាននានាកញ្ចប់ថវិកាប្រចាំឆ្នាំ សារសំខាន់នៃការចូលរួម និងចូលរួមកសាងកម្មវិធីវិនិយោគបីឆ្នាំរំកិលខេត្ត។
ឯកឧត្តមបានបន្ថែមថាកម្មវិធីនេះមានសារៈសំខាន់សំរាប់ការរៀបចំផែនការ និងសូចនាករដើម្បីវាស់វែង និងបញ្ចូលសកម្មភាពអត្ថិភាពដើម្បើធ្វើឲ្យផែនការតាមការរំពឹងទុកទទួលបានជោគជ័យ។
ដូច្នេះគ្រប់ភាគីពាក់ព័ន្ធត្រូវក្ដាប់ឲ្យបានពីគោលបំណង នៃសេចក្តីណែនាំស្តីពីការរៀបចំ និងកសាងកម្មវិធីវិនិយោគបីឆ្នាំរំកិលខេត្ត ព្រមទាំងទទួលបានការណែនាំពីនិតិវិធីនៃការរៀបចំ នឹងកសាងកម្មវិធីវិនិយោគបីឆ្នាំរំកិលខេត្តដោយបានយល់ និងចេះបំពេញតារាងគោលមួយចំនួនដែលបានជូនភ្ជាប់។
ឯកឧត្តមសំណូមពរដល់គ្រប់ភាគីពាក់ព័ន្ធទាំងអស់ត្រូវធ្វើយ៉ាងណារៀប ចំផែនការនេះទៅតាមកាលកំណត់និងទាន់ពេលវេលា។
