មន្ត្រីជំនាញបសុព្យាបាលខេត្តកំពង់ធំ ចុះចាក់ថ្នាំការពារជំងឺសត្វគោ-ក្របី ជូនប្រជាកសិករ
(កំពង់ធំ)៖ មន្ត្រីជំនាញនៃការិយាល័យផលិតកម្មនិងបសុព្យាបាលខេត្តកំពង់ធំបានចុះអនុវត្តយុទ្ធនាការចាក់ថ្នាំការពារជំងឺសត្វគោ និងក្របី ជូនប្រជាកសិករ នៅភូមិចំបក់បញ្ញា ឃុំបន្ទាយស្ទោង ស្រុកស្ទោង ខេត្តកំពង់ធំ ក្នុងគោលបំណងទប់ស្កាត់ការរាតត្បាតជំងឺឆ្លងលើសត្វ និងការពារទ្រព្យសម្បត្តិរបស់ប្រជាពលរដ្ឋ។
លោក ចាន់ បញ្ញវ័ន្ត ប្រធានការិយាល័យផលិតកម្មនិងបសុព្យាបាលនៃមន្ទីរកសិកម្មរុក្ខាប្រមាញ់និងនេសាទខេត្តកំពង់ធំ បានលើកឡើងថា ការចាក់ថ្នាំការពារជាប្រចាំ គឺជាវិធានការសំខាន់ក្នុងការបង្ការនិងកាត់បន្ថយការឆ្លងរាលដាលជំងឺលើសត្វគោ និងក្របី ដែលអាចបង្កផលប៉ះពាល់ដល់ការចិញ្ចឹម និងជីវភាពរបស់ប្រជាកសិករ។
ប្រធានភូមិចំបក់បញ្ញាលោក ជា ច្រុច បានថ្លែងអំណរគុណដល់មន្ត្រីជំនាញពិសេសរាជរដ្ឋាភិបាលដែលបានយកចិត្តទុកដាក់ចុះផ្តល់សេវាចាក់ថ្នាំការពារដល់ប្រជាពលរដ្ឋដោយផ្ទាល់ដើម្បីជួយលើកកម្ពស់សុខភាពសត្វនិងបង្កើនទំនុកចិត្តក្នុងការចិញ្ចឹមសត្វ។
ប្រជាកសិករបានសម្តែងការរីករាយនិងអរគុណដល់មន្ត្រីជំនាញអាជ្ញាធរភូមិ.ឃុំដោយចាត់ទុកថាការចាក់ថ្នាំការពារជួយកាត់បន្ថយហានិភ័យជំងឺសត្វរក្សាបានផលិតភាពនិងរួមចំណែកលើកកម្ពស់ជីវភាពគ្រួសារឱ្យកាន់តែប្រសើរឡើង។
ជាមួយគ្នានេះ ការចុះចាក់ថ្នាំការពារសត្វគោ និងក្របីនេះ គឺជាសកម្មភាពដ៏មានសារៈសំខាន់ក្នុងការបង្ការ និងទប់ស្កាត់ជំងឺឆ្លងលើសត្វរួមចំណែករក្សាសុខភាពសត្វបង្កើនផលិតភាពនៃការចិញ្ចឹមនិងលើកកម្ពស់ជីវភាពរស់នៅរបស់ប្រជាកសិករស្របតាមគោលនយោបាយអភិវឌ្ឍវិស័យបសុសត្វប្រកបដោយចីរភាព។
