គណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្តកំពង់ធំ នាំយករទេះរុញ គ្រឿងឧបភោគបរិភោគ និងថវិកាមួយចំនួនឧបត្ថម្ភជូនអតីតយុទ្ធជនពិការនៅឃុំដងកាំបិត ស្រុកសណ្ដាន់
ខេត្តកំពង់ធំ៖ នៅព្រឹកថ្ងៃទី១២ ខែកក្កដា ឆ្នាំ ២០២៦ ឧត្តមសេនីយ៍ទោ សោម ស៊ុន អនុប្រធានប្រចាំការ និងជាប្រធានលេខាធិការដ្ឋាន តំណាងឯកឧត្តម នួន ផារ័ត្ន អភិបាលខេត្ត ប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្តកំពង់ធំ បានដឹកនាំសហការី ទៅសំណេះសំណាលសាកសួរសុខទុក្ខ និងនាំយករទេះរុញ សម្រាប់ជនពិការចំនួនមួយគ្រឿង និងគ្រឿងឧបភោគបរិភោគ ព្រមទាំងថវិកាមួយចំនួន ដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវ ទៅឧបត្ថម្ភជូនអតីតយុទ្ធជនពិការ ដោយសារសង្គ្រាម រស់នៅភូមិស្រែខ្សាច់ ឃុំដងកាំបិត ស្រុកសណ្ដាន់ ខេត្តកំពង់ធំ ។
លោកតាព្រិន្ទបាលឯក ម៉ា វុន អាយុ៦៣ឆ្នាំ បានបញ្ជាក់ថា គាត់ធ្លាប់បានចូលបម្រើក្នុងជួរកងទ័ព នៅឆ្នាំ១៩៨៦ នៅអង្គភាពយោធាស្រុកសណ្ដាន់ ខេត្តកំពង់ធំ ហើយត្រូវបានជាន់មីនបណ្ដាលឲ្យដាច់ជើងខាងស្ដាំ នៅក្នុងសមរភូមិខ្សាច់ធំ ស្ថិតក្នុងឃុំដងកាំបិត ស្រុកសណ្ដាន់ ខេត្តកំពង់ធំ កាលពីឆ្នាំ១៩៨៧។ បច្ចុប្បន្នគាត់មានជំងឺដាច់សសៃឈាម ស្លាប់មួយជំហៀងខ្លួនបែ៉កខាងស្ដាំ បន្ថែមលើជើងដែលពីការនៅប៉ែកខាងស្ដាំផងដែរ។ បណ្ដាលឲ្យគាត់មិនអាចប្រើប្រាស់ឈើច្រត់ ដើម្បីទប់ខ្លួនក្នុងការធ្វើដំណើរបាន ។ ហើយនៅពេលថ្មីៗកន្លងទៅនេះ ភរិយារបស់គាត់ក៏បានទទួលមរណភាពចោលគាត់ទៀត សព្វថ្ងៃគាត់រស់នៅជាមួយកូន ដែលជាអ្នកជួយបីបាច់ថែរក្សា ។
ឧត្តមសេនីយ៍ទោ សោម ស៊ុន បាន សំណេះសំណាលសាកសួរសុខទុក្ខ ដោយក្តីអាណិតអាសូរយ៉ាងខ្លាំង និងបានថ្លែងនូវការដឹងគុណចំពោះវិរភាពដ៏អង់អាចក្លាហានរបស់អតីតយុទ្ធជនរបស់យើង ដែលបានបូជាសាច់ស្រស់ឈាមស្រស់ ក្នុងសម័យសង្គ្រាមស៊ីវិលនៅកម្ពុជា ដោយបានរួមចំណែកជាមួយសម្តេចតេជោហ៊ុន សែន ធ្វើឲ្យប្រទេសជាតិយើងមានសុខ សន្តិភាព និងការឯកភាពជាតិពេញលេញដូចសព្វថ្ងៃនេះ ។
នៅក្នុងឱកាសនេះ ឧត្តមសេនីយ៍ទោ សោម ស៊ុន បានប្រគល់ជូនរទេះរុញសម្រាប់ជនពិការចំនួនមួយគ្រឿង ដែលជាអំណោយរបស់លោក គួ លីហួត ប្រធានមជ្ឈមណ្ឌលស្តាលទ្ធភាព ពលកម្មកាយសម្បទា ក្រោមការគ្រប់គ្រង មូលនិធិជនពិការ ព្រមទាំងអង្ករចំនួន១០០គីឡូក្រាម មីជាតិចំនួន២កេស ទឹកត្រីទឹកស៊ីអ៊ីវចំនួន ២យួរ ត្រីខកំប៉ុងចំនួន២យួរ និងថវិកាមួយចំនួន ដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ្រចន្ទមុន្នី ជូនលោកតា ម៉ា វុន ដើម្បីបានប្រើប្រាស់ និងដោះស្រាយការហូបចុកប្រចាំថ្ងៃផងដែរ។
លោកតាព្រិន្ទបាលឯក ម៉ា វុន សូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នីព្រមទាំងគណៈកម្មការអតីតយុទ្ធជននិងនិវត្តជនកម្ពុជាខេត្តកំពង់ធំ ដែលបានផ្ដល់រទេះរុញ គ្រឿងឧបភោគបរិភោគ និងថវិកាដល់រូបគាត់។
