លោកឧត្តមសេនីយ៍ត្រី មាស យ៉ត អញ្ជើញដឹកនាំក្រុមការងារ គោរពវិញ្ញាណក្ខន្ធសពលោកវរសេនីយ៍ទោ ឃុន ប៊ុនហួរ មេបញ្ជាការកងរាជអាវុធហត្ថស្រុកបារាយណ៍
(កំពង់ធំ)÷ ក្រោមការដឹកនាំរបស់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស
បានចាត់ឱ្យលោកឧត្តមសេនីយ៍ត្រី មាស យ៉ត មេបញ្ជាការ កងរាជអាវុធហត្ថកំពង់ធំ បានអញ្ជើញដឹកនាំ លោក លោកស្រី មេបញ្ជាការរងខេត្ត លោក នាយសេនាធិការរង ប្រធានមន្ទីរ ព្រមទាំងនាយទាហាន ជាច្រើនរូបទៀត នៃបញ្ជាការដ្ឋានកងរាជអាវុធហត្ថខេត្ត អញ្ជើញគោរពវិញ្ញាណក្ខន្ធសពលោក វរសេនីយ៍ទោ ឃុន ប៊ុនហួរ មេបញ្ជាការកងរាជអាវុធហត្ថស្រុកបារាយណ៍ ទទួលមរណភាពកាលពីវេលាម៉ោង ២១:២៥នាទី នៅថ្ងៃទី១១ ខែកក្កដា ឆ្នាំ២០២៦ ក្នុងជន្មាយុ៥៤ឆ្នាំ(ដោយរោគាពាធ) សពតម្កល់ធ្វើបុណ្យតាមប្រពៃណី ស្ថិតនៅសានគរ(ខ) ឃុំសានគរ ស្រុកកំពង់ស្វាយ ខេត្តកំពង់ធំ នារសៀលថ្ងៃអាទិត្យទី១២ ខែកក្កដា ឆ្នាំ២០២៦។
នៅក្នុងសមានទុក្ខដ៏ក្រៀមក្រំនេះ លោកឧត្តមសេនីយ៍ត្រី មាស យ៉ត មេបញ្ជាការ កងរាជអាវុធហត្ថខេត្តកំពង់ធំ ក៏បានចូលរួមរំលែកទុក្ខជាមួយ លោកស្រី តាំង សុខហ៊ាង ត្រូវជាភរិយា និងក្រុមគ្រួសារ និងបានបួងសួង ដល់តេជៈបារមីនៃព្រះពុទ្ធ ព្រះធម៌ ព្រះសង្ឃ តាមជួយថែរក្សាដួងវិញ្ញាណក្ខន្ធរបស់ លោកវរសេនីយ៍ទោ ឃុន ប៊ុនហួរ បានទៅសោយសុខក្នុងឋានសុគតិភពកុំបីឃ្លៀងឃ្លាតឡើយ៕ អត្ថបទ នាយរងការិយាល័យអនុសេនីយ៍ទោ ណែម សុភីន-ពិនិត្យដោយអ៊ុមញឹប។
