ឯកឧត្តម នួន ផារ័ត្ន ជំរុញឱ្យអាជ្ញាធរក្រុងស្រុក ខិតខំកសាងប្លង់គោល ដើម្បីអភិវឌ្ឍមូលដ្ឋានមានការរីកចម្រើន

(កំពង់ធំ)៖ ឯកឧត្តម នួន ផារ័ត្ន អភិបាលខេត្តកំពង់ធំ និងជាប្រធានគណៈបញ្ជាការឯកភាពរដ្ឋបាលខេត្ត បានដឹកនាំកិច្ចប្រជុំប្រចាំខែ របស់គណៈបញ្ជាការឯកភាពរដ្ឋបាលខេត្ត នារសៀលថ្ងៃទី១៧ ខែមករា ឆ្នាំ២០២៥ នៅសាលប្រជុំសាលាខេត្ត។

ឯកឧត្តម នួន ផារ័ត្ន បានថ្លែងអំណរគុណដល់គណៈបញ្ជាការឯកភាពរដ្ឋបាលក្រុងស្រុកទាំង៩ និងអង្គភាពពាក់ព័ន្ធទាំងអស់ ដែលបានចូលរួមថែរក្សាសុខសន្តិភាពជូនប្រជាពលរដ្ឋមានភាពសុខុដុមរមនា ជាពិសេសពិធីឆ្លងឆ្នាំសកលមានភាពសប្បាយរីករាយ មិនមានបញ្ហាអ្វីមួយកើតឡើងគួរឱ្យកត់សម្គាល់ ហើយប្រជាពលរដ្ឋបានចូលរួមយ៉ាងច្រើនកុះករផងដែរ ព្រមទាំងបានអនុវត្តបានយ៉ាងម៉ឺងម៉ាត់នូវបទបញ្ជារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការបង្ក្រាប និងទប់ស្កាត់ក្មេងទំនើង នៅក្នុងមូលដ្ឋានខ្លួនបានល្អប្រសើរ។ សូមអរគុណរដ្ឋបាលស្រុកតាំងគោកស្រុកបារាយណ៍ ស្រុកកំពង់ស្វាយ នៅក្រុងស្ទឹងសែន បានសហការទប់ស្កាត់ និងបង្ក្រាបមិនឱ្យមានបទល្មើសកើតឡើងនៅដីតំបន់បីនោះឡើយ នេះគឺជាការខិតខំប្រឹងប្រែងរបស់បញ្ជាការស្រាលទាំងអស់ ដែលបានខិតខំយកចិត្តទុកដាក់ការពារធនធានធម្មជាតិឱ្យបានគង់វង្ស។ ការរៀបចំសន្និបាតបូកសរុបការងាររដ្ឋបាលខេត្តឆ្នាំ២០២៤ និងលើកទិសដៅសម្រាប់ឆ្នាំ២០២៥នេះបានដោយជោគជ័យ ដោយមានការសហការជាមួយមន្ទីរអង្គភាព រដ្ឋបាលក្រុងស្រុក ដែលបានខិតខំអនុវត្តការងារកន្លងមក។

ឯកឧត្តមអភិបាលខេត្តបាន បានជំរុញដល់អ្នកចូលរួមទាំងអស់ និងដាក់គោលការណ៍ចំនួន៦ចំណុច ដើម្បីអនុវត្តការងារប្រកបដោយប្រសិទ្ធភាពគឺ÷ ១.ត្រូវស្លាកផ្សព្វផ្សាយអំពីតំបន់ទេសចរណ៍ និងនិម្មិតសញ្ញាផ្សេងៗទៀត ដោយដាក់តាំងនៅតាមដងផ្លូវសាធារណៈឱ្យបានច្រើនកន្លែង។ ២.បញ្ហាស្រូវ និងទឹក ត្រូវតែសម្រួលដល់បងប្អូនប្រជាពលរដ្ឋដោះស្រាយជូនពួកគាត់ឱ្យទាន់ពេលវេលា។ ៣.ពាក់ព័ន្ធទៅនឹងសុខភាពប្រជាពលរដ្ឋនៅក្នុងមូលដ្ឋាន ការបើកគ្លីនិកដែលមិនមានច្បាប់។ ៤.ការដោះស្រាយវិវាទក្រៅប្រព័ន្ធតុលាការ។ ៥.ការងារសន្តិសុខ(បញ្ហាគ្រឿងញៀន ល្បែងស៊ីសង ក្មេងទំនើង និងច្បាប់ចរាចរណ៍ផ្លូវគោក) រួមគ្នាផ្សព្វផ្សាយជូនប្រជាពលរដ្ឋឱ្យបានជ្រួតជ្រាប ដើម្បីកាត់បន្ថយគ្រោះថ្នាក់ចរាចរណ៍។ ៦. ការបាញ់ថ្នាំដើម្បីការពារជំងឺផ្សេងៗដែលរៀបចំឡើងដោយមន្ទីរសុខាភិបាល នៅក្នុងក្រុងស្ទឹងសែន។ អត្ថបទលោក ធូ កែវមុន្នី-ពិនិត្យដោយអ៊ុមញឹប។