អភិបាលខេត្តកំពង់ធំ បានថ្លែងថាសម្បទានិកចំនួន៦៥០គ្រួសារ ដែលបានទទួលប្រើប្រាស់សម្បទានដីសង្គមកិច្ចឃុំដូង គឺមានរយៈពេល០៥ឆ្នាំ និងការវាយតម្លៃលើស្ថានភាពតាំងទីលំនៅ និងប្រើប្រាស់ដីរបស់គ្រួសារសម្បទានិកសរុបចំនួន១.២៧៥ក្បាលដី

(កំពង់ធំ)÷ ឯកឧត្តម នួន ផារ័ត្ន អភិបាលខេត្តកំពង់ធំ បានថ្លែងថាសម្បទានិកចំនួន៦៥០គ្រួសារ ដែលបានទទួលប្រើប្រាស់សម្បទានដីសង្គមកិច្ចឃុំដូង គឺមានរយៈពេល០៥ឆ្នាំ និងការវាយតម្លៃលើស្ថានភាពតាំងទីលំនៅ និងប្រើប្រាស់ដីរបស់គ្រួសារសម្បទានិកសរុបចំនួន១.២៧៥ក្បាលដី។ ឯកឧត្តមថ្លែងដូច្នេះក្នុងកម្មវិធីប្រកាសតំបន់វិនិច្ឆ័យដំណើរការចុះបញ្ជីចេញវិញ្ញាបនបត្រ សម្គាល់ម្ចាស់អចលនវត្ថុជូនសម្បទាននិកឃុំដូង ស្ថិតនៅទីតាំងដីសម្បទានសង្គមកិច្ចឃុំដូង ស្រុកប្រាសាទបល្ល័ង្ក ខេត្តកំពង់ធំ នាព្រឹកថ្ងៃទី៣០ ខែឧសភា ឆ្នាំ២០២៥។

ឆ្លៀតក្នុងឱកាសនេះឯកឧត្តម នួន ផារ័ត្ន បានថ្លែងថា ក្រុមការងារអនុវត្តតម្រោង LASED II និង LASED III ទាំងថ្នាក់ជាតិ ថ្នាក់ក្រោមជាតិ រដ្ឋបាលខេត្ត មន្ទីរវិស័យជុំវិញខេត្ត ព្រមទាំងអាជ្ញាធរមូលដ្ឋាន បានខិតខំប្រឹងប្រែងអនុវត្តសកម្មភាពគម្រោង ដើម្បីអភិវឌ្ឍទីតាំង សម្បទានដីសង្គមកិច្ចឃុំដួងរួមមាន៖ ការរៀបចំទីតាំង ការជ្រើសរើសមុខសញ្ញាអ្នកទទួលដី ការបែងចែកដី ការគាំទ្រ សម្ភារចូលតាំងទីជម្រកដំបូងដល់សម្បទានិក ការអភិវឌ្ឍកសិកម្ម និងជីវភាព និងការអភិវឌ្ឍហេដ្ឋារចនាសម្ព័ន្ធ (ផ្លូវថ្នល់ សាលារៀន ប៉ុស្តិ៍សុខភាព អគារសហគមន៍ អណ្តូងទឹក)។ តាមរយៈការគាំទ្រថវិកាពីធនាគារពិភពលោក និងរាជរដ្ឋាភិបាលកម្ពុជា ជាមួយនឹងការខិតខំប្រឹងប្រែងបានលេចចេញឡើងជាសមិទ្ធិផលដ៏ធំធេង ធ្វើឱ្យទីនេះបានក្លាយជាទីតាំងភូមិឋានសម្រាប់សម្បទានិកចំនួន ៦៥០គ្រួសារ ធ្វើការតាំងទីលំនៅ និងប្រកបរបរកសិកម្មផ្សេងៗ ដោយប្រើប្រាស់ដីដែលរាជរដ្ឋាភិបាលបែងចែកជូនក្នុង០១គ្រួសារ ទទួលបានដីលំនៅឋាន៣០ម៉ែត្រx ៤០ម៉ែត្រ និងដឹកសិកម្ម២ហិកតា។

ឯកឧត្តមអភិបាលខេត្តកំពង់ធំបានបញ្ជាក់ថា រហូតមកដល់ពេលនេះ សម្បទានិកចំនួន៦៥០គ្រួសារ ដែលបានទទួល និងប្រើប្រាស់សម្បទានដីសង្គមកិច្ចឃុំដូង គឺមានរយៈពេល០៥ឆ្នាំហើយ។ តាមរយៈការវាយតម្លៃលើស្ថានភាពតាំងទីលំនៅ និងប្រើប្រាស់ដីរបស់គ្រួសារសម្បទានិក ឃុំដូងគឺសរុបចំនួន១២៧៥ក្បាលដី ដែលបានបំពេញគ្រប់លក្ខខ័ណ្ឌដូចកិច្ចសន្យាផ្តល់ដីសម្បទានសង្គមកិច្ចឃុំដូង ក្នុងនោះ÷គ្រួសារដែលនឹងត្រូវផ្តល់ប័ណ្ណកម្មសិទ្ធិលើអចលនវត្ថុសម្រាប់ដឹទាំងពីរប្រភេទគឺមានចំនួន៦២៥គ្រួសារ ស្មើនឹង១.២៥០ក្បាលដី (ដីលំនៅឋាន៦២៥ក្បាលដី និងដឹកសិកម្ម ៦២៥ក្បាលដី) ហើយគ្រួសារដែលនឹងត្រូវផ្តល់ ស្មើនឹកម្មសិទ្ធិលើអចលនវត្តសម្រាប់តែដីលំនៅឋានមានចំនួន០៤គ្រួសារ ស្មើនឹង០៨ក្បាលដី។ ចំណែកឯ គ្រួសារចំនួន ២១គ្រួសារ ស្មើនឹង២១ក្បាលដី គឺនឹងត្រូវផ្តល់ប័ណ្ណកម្មសិទ្ធិលើអចលនវត្ថុសម្រាប់តែដឹកសិកម្មប៉ុណ្ណោះ។

ឯកឧត្តម នួន ផារ័ត្ន អភិបាលខេត្តកំពង់ធំក៏បានសំណូមពរដល់អាជ្ញាធរដែនដីត្រូវចូលរួមសហការក្នុងដំណើរការចុះបញ្ជីដីធ្លីឱ្យបានរលូន ដូច្នេះសូមជូនដំណឹងដល់បងប្អូនជាម្ចាស់ដី សហការចុះកំណត់ព្រំដីផ្លូវ ត្រពាំង ប្រឡាយទឹក ឱ្យបាន ច្បាស់លាស់ និងជួយសម្របសម្រួលដោះស្រាយវិវាទព្រំ ឬការដណ្តើមសិទ្ធិលើក្បាលដី សម្របសម្រួលឯកសារមានដូចជាអត្តសញ្ញាណប័ណ្ណ សៀវភៅគ្រួសារ សំបុត្រកំណើត សំបុត្រអាពាហ៍ពិពាហ៍ លិខិតអំណោយ ការបញ្ជាក់លីវ លែងលះ ជាដើម។ ការចុះបញ្ជីដីធ្លីគឺ មានការកំណត់ច្បាស់លាស់រវាងដីរដ្ឋ និងដឹឯកជន ការកំណត់ព្រំ និងសិទ្ធិលើក្បាលដី ការរៀបចំដែនដី បរិយាកាសគ្មានវិវាទ ដើម្បីចូលរួមចំណែកកាត់បន្ថយទំនាស់ និងកាត់បន្ថយភាពក្រីក្រ ព្រោះបើដីមានប្លង់កម្មសិទ្ធិ គឺមានការការពារដោយច្បាប់ ធានាដោយរដ្ឋ ហើយប្រជាពលរដ្ឋអាចយកប្លង់ទៅប្រើប្រាស់ ទាញយកប្រយោជន៍ ដើម្បីលើកស្ទួយជីវភាពគ្រួសាររបស់ខ្លួន។ ជាមួយគ្នានេះ ក៏សូមសំណូមពរដល់បងប្អូនប្រជាពលរដ្ឋ ត្រូវចូលរួមសហការជាមួយក្រុមការងារបច្ចេកទេសរបស់មន្ទីររៀបចំដែនដីនគរូបនីយកម្ម សំណង់និងសុរិយោដីខេត្តក្នុងការវាស់វែង បំពេញទិន្នន័យឱ្យបានគ្រប់ៗគ្នា ចៀសវាងក្រុមការងារវាស់វែងរួចហើយ នៅសល់ដីរបស់បងប្អូនដាក់ជាតិគ្មានទិន្នន័យ ពិសេសករណីមានទំនាស់រវាង អ្នកជាប់ព្រំ គួររួមគ្នាដោះស្រាយតាមវិធីសាស្រ្តឈ្នះៗទាំងអស់គ្នា ដើម្បីយើងរស់នៅក្នុងភូមិឋានប្រកបដោយសុខដុមរម្យនានឹងគ្នា។ សូមសំណូមពរដល់មន្ទីររៀបចំដែនដី នគរូបនីយកម្ម សំណង់ និងសុយោដីខេត្ត ខិតខំជំរុញការ វាស់វែងឱ្យបានចប់សព្វគ្រប់ជូនសម្បទានិកនៅទីតាំងឃុំដួង ក៏ដូចជាទូទាំងខេត្ត តាមផែនការរបស់ក្រសួងក្នុងបំណាច់ឆ្នាំ២០២៥ នាងមុខនេះ។ អត្ថបទលោក ធូ កែវមុន្នី-ពិនិត្យដោយអ៊ុមញឹប។