ឧត្ដមសេនីយ៍ទោ សោម ស៊ុន ផ្សព្វផ្សាយគោលនយោបាយភូមិឃុំ សង្កាត់មានសុវត្ថិភាព និងផ្សព្វផ្សាយសាររបស់សម្តេចតេជោហ៊ុន សែនក្នុងទិវាបុណ្យជាតិ ៧ មករា នៅឃុំដងកាំបិត ស្រុកសណ្តាន់
ខេត្តកំពង់ធំ៖ នៅព្រឹកថ្ងៃទី៧ ខែមករា ឆ្នាំ២០២៦ ឧត្ដមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ អនុប្រធានគណៈបញ្ជាការឯកភាពរដ្ឋបាលខេត្ត និងជាប្រធានក្រុមការងាររបស់រាជរដ្ឋាភិបាលចុះមូលដ្ឋាន ឃុំដងកាំបិត ស្រុកសណ្តាន់ ខេត្តកំពង់ធំ បានអញ្ជើញជាអធិបតីភាពក្នុងពិធីផ្សព្វផ្សាយគោលនយោបាយ ភូមិ ឃុំ សង្កាត់មានសុវត្ថិភាព បំពាក់សំលៀកបំពាក់ជូនប្រជាការពារនៅទូទាំងឃុំ និងផ្សព្វផ្សាយសាររបស់សម្ដេចអគ្គមហាមហាសេនាបតីតេជោ ហ៊ុន សែន ក្នុងឱកាសរំឭកខួបទី៤៧ នៃទិវាជ័យជម្នះ ៧មករា ។ ដែលពិធីនេះប្រព្រឹត្តទៅនៅវត្តស្រែវាលខាងកេីត ដោយមានការចូលរួមពីក្រុមការងាររបស់រាជរដ្ឋាភិបាលថ្នាក់ខេត្ត ស្រុក និងអាជ្ញាធរដែនដី ឃុំ ភូមិ ប្រជាការពារ និងប្រជាពលរដ្ឋយ៉ាងច្រើនកុះករផងដែរ ។
លោក លន់ យ៉េន ប្រធានក្រុមប្រឹក្សាឃុំដងកាំបិត បានអានរបាយការណ៍ស្វាគមន៍ ដោយគូសបញ្ជាក់អំពីសភាពការណ៍ទូទៅ នៃការអនុវត្តន៍គោលនយោបាយភូមិ ឃុំ មានសុវត្ថិភាព និងស្ថានភាពជីវភាពរស់នៅរបស់ប្រជាពលរដ្ឋនៅក្នុងឃុំ និងបានសង្កត់ធ្ងន់ថា ប្រជាពលរដ្ឋនៅទូទាំងឃុំ មានការគាំទ្រយ៉ាងពេញទំហឹងចំពោះការដឹកនាំរបស់ប្រមុខរាជរដ្ឋាភិបាលកម្ពុជា ក្នុងការដោះស្រាយបញ្ហាព្រំដែនរវាងកម្ពុជា និងថៃ ។
ឧត្តមសេនីយ៍ទោ សោម ស៊ុន បានថ្លែងនូវការកោតសរសើរចំពោះអាជ្ញាធរដែនដី ភូមិ ឃុំ និងប៉ុស្តិ៍នគរបាលរដ្ឋបាលឃុំ ដែលបានខិតខំប្រឹងប្រែងរួមគ្នាការពារសន្តិសុខ សុវត្ថិភាព រក្សាសណ្តាប់ធ្នាប់ និងបម្រើប្រជាជនបានល្អប្រសើរ ។
នៅក្នុងឱកាសនេះ ឧត្តមសេនីយ៍ទោ សោម ស៊ុន បានផ្សព្វផ្សាយគោលនយោបាយ ភូមិ ឃុំ សង្កាត់ មានសុវត្ថិភាពទាំង ៧ចំណុច របស់រាជរដ្ឋាភិបាល និងបំពាក់សំលៀកបំពាក់ជូនប្រជាការពារនៅទូទាំងឃុំ ចំនួន ៦០ នាក់ ព្រមទាំងបានឧបត្ថម្ភសំលៀកបំពាក់ចំនួន ១០បាល់ ជូនប្រជាពលរដ្ឋផងដែរ ។
ឧត្តមសេនីយ៍ទោ សោម ស៊ុន បានផ្សព្វផ្សាយសាររបស់សម្ដេចអគ្គមហាមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ដែលបានផ្ញើរជូនជនរួមជាតិ នៅក្នុងខួបលើកទី៤៧ ទិវាបុណ្យជាតិ ៧មករា ដោយបានគូសបញ្ជាក់ថា៖ ខួបលើកទី៤៧ នៃថ្ងៃជ័យជម្នះ ៧មករា ជាប្រវត្តិសាស្ត្រដែលបានផ្ដួលរំលំរបបប្រល័យពូជសាសន៍ ប៉ុល ពត សង្គ្រោះជាតិ និងប្រជាជនកម្ពុជា ឱ្យមានជីវិតរស់ឡើងវិញ បើកឡើងនៅសករាជថ្មីរបស់កម្ពុជា គឺឯករាជ្យ សេរីភាព ប្រជាធិបតេយ្យ និងវឌ្ឍនភាពសង្គម ។ ក្នុងសាររបស់សម្ដេចតេជោ ហ៊ុន សែន ក៏បានសង្កត់ធ្ងន់ថា ប្រទេសថៃបានបង្ករសង្គ្រាមរំលោភបំពានកម្ពុជាយ៉ាងកំរោល មកលើបូរណភាពទឹកដីនៃព្រះរាជាណាចក្រកម្ពុជា ដោយបានវាយប្រហារលើគោលដៅស៊ីវិលនានាមិនរើសមុខ ដោយប្រើប្រាស់អាវុធធំ តូច ទំនើបគ្រប់ប្រភេទ ទាំងជើងគោក ជើងទឹក និងជើងអាកាស បង្កនូវមហន្តរាយយ៉ាងធំធេងដល់ប្រជាពលរដ្ឋកម្ពុជា ដែលកំពុងរស់នៅយ៉ាងសុខសាន្ត ។ សកម្មភាពនេះ បានរំលោភយ៉ាងធ្ងន់ធ្ងរបំផុតលើដែនអធិបតេយ្យភាព និងបូរណភាពទឹកដីកម្ពុជា បំពានធម្មនុញ្ញអង្គការសហប្រជាជាតិ បំពានធម្មនុញ្ញអាស៊ាន និងមិនគោរពស្មារតីនៃសហគមន៍អាស៊ានឡើយ ។
ក្នុងសាររបស់សម្ដេចតេជោ ហ៊ុន សែន ក៍បានអំពាវនាវដល់ជនរួមជាតិនៅគ្រប់ទិសទី សូមបន្តរួមសាមគ្គីគ្នាជាធ្លុងមួយ ក្រោមបាវចនា ជាតិ សាសនា ព្រះមហាក្សត្រ និងរួមសាមគ្គីជុំវិញរាជរដ្ឋាភិបាលប្រកបដោយជំនឿមុតមាំ ចំពោះបុព្វហេតុដ៏យុត្តិធម៌របស់យើង ។អត្ថបទតំបន់ប្រតិបត្តិការសឹករងកំពង់ធំ-ពិនិត្យដោយអ៊ុមញឹប។
