រដ្ឋលេខាធិការក្រសួងអភិវឌ្ឍន៍ជន អញ្ជើញក្នុងកម្មវិធីអបអរសាទរពិធីប្រារព្ធទិវាជាតិលើកកម្ពស់អនាម័យជនបទ ខួបលើកទី១៦ ថ្ងៃទី១៣ ខែវិច្ឆិកា ឆ្នាំ២០២៥
(កំពង់ធំ)÷ ពិធីប្រារព្ធទិវាជាតិលើកកម្ពស់អនាម័យជនបទ ខួបលើកទី១៦ ថ្ងៃទី១៣ ខែវិច្ឆិកា ឆ្នាំ២០២៥ ក្រោមអធិបតីភាព ឯកឧត្តម អ៉ិន ចន្ថា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នាព្រឹកថ្ងៃទី២០ ខែវិច្ឆិកា ឆ្នាំ២០២៥ នៅបរិវេណស្រុកតាំងគោក ខេត្តកំពង់ធំ។
កម្មវិធីនេះផងដែរក៏មានការអញ្ជើញចូលរួមពីឯកឧត្តម ព្រឹម រដ្ឋា អភិបាលរងខេត្តកំពង់ធំ ប្រធានមន្ទីរជុំវិញខេត្ត លោក តាន់ វាសនា ប្រធានមន្ទីរអភិវឌ្ឍន៍ជនបទខេត្តកំពង់ធំ កងកម្លាំងទាំងបី លោក ហាក់ ម៉ុងហួត អភិបាលស្រុកតាំងគោក ក្រុមប្រឹក្សាស្រុក/ឃុំ លោកអភិបាលរងក្រុង/ស្រុក ប្រជាពលរដ្ឋ និងសិស្សានុសិស្សប្រមាណជាង៣០០នាក់។
ឆ្លៀតនៅក្នុងឱកាសនេះឯកឧត្តម ព្រឹម រដ្ឋា អភិបាលរងខេត្តកំពង់ធំ បានលើកឡើងថាទិសដៅអនុវត្តចាំបាច់បន្ទាន់សម្រាប់ក្រុង/ស្រុកទាំង៩ ដែលបានបញ្ចប់ការបន្ទោបង់ពាសវាលពាសកាល (ODF+) កម្រិតខ្ពស់ ត្រូវបន្តអនុវត្តនូវផែនការដូចខាងក្រោម៖ ១-រដ្ឋបាលស្រុក/ក្រុងត្រូវចេញសេចក្តីសម្រេច បែងចែកតួនាទីទទួលខុសត្រូវ ទទួលបន្ទុកចុះតាមឃុំ និងសង្កាត់នីមួយៗ ២-ចំណែករដ្ឋបាលឃុំ/សង្កាត់ត្រូវចេញដីការបែងចែកតួនាទីទទួលខុសត្រូវរបស់ក្រុមប្រឹក្សាឃុំឱ្យទទួល បន្ទុកតាមភូមិនីមួយៗ។ ៣-ត្រូវបញ្ចូលកញ្ចប់ថវិកាអភិវឌ្ឍរបស់ស្រុក-ក្រុង ឃុំ-សង្កាត់ ឱ្យបានជាអតិបរិមាទៅលើសកម្មភាព ទឹកស្អាត និង អនាម័យ ជាមួយនេះត្រូវលើកកម្ពស់ស្មារតី វប្បធម៌ សហការឲ្យបានជិតស្និតជាមួយមន្ទីរអភិវឌ្ឍន៍ជនបទខេត្ត អង្គការដៃគូអភិវឌ្ឍន៍ និងវិស័យឯកជននានា។ ៤-បន្តផ្សព្វផ្សាយគោលការណ៍ភូមិ/ឃុំ/សង្កាត់ មានសុវត្ថិភាព របស់រាជរដ្ឋាភិបាលកម្ពុជាទាំង៧ចំណុច ជាពិសេសចំនុចទី៦ស្តីពីអនាម័យ និងបរិស្ថាន ក្នុងមូលដ្ឋានដែលត្រូវប្រឡង ប្រណាំងរៀង រាល់ឆ្នាំ។ ៥-ត្រូវដឹកនាំយុទ្ធនាការសម្អាត អនាម័យតាមទីសាធារណៈនានា ដូចជាក្នុងមូលដ្ឋាន ភូមិ ឃុំ សង្កាត់ សាលារៀន វត្តអារាម មណ្ឌលសុខភាព និងតាមដងផ្លូវសាធារណៈជាដើម។ ៦-គ្រប់ទីកន្លែងធ្វើការរបស់ស្ថាប័នរដ្ឋ វិស័យឯកជនទទួលខុសត្រូវយកចិត្តទុកដាក់ អំពីបន្ទប់ធ្វើការងារ និង បន្ទប់ទឹកជាប់ជាប្រចាំ ដោយធានាថាមានអនាម័យស្អាតជានិច្ច។
ឯកឧត្តម អ៉ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ បានគូសបញ្ជាក់ថា ក្នុងឱកាសអបអរសាទរទិវាជាតិលើកកម្ពស់អនាម័យជនបទលើកទីវាទី១៦ សូមផ្តល់ជាអនុសាសន៍ និងគំនិតផ្តួចផ្តើមសំខាន់ៗមួយចំនួនដូចខាងក្រោម៖ ទី១-បន្តពង្រឹងការងារសម្របសម្រួល និងសហប្រតិបត្តិការលើការងារលើកកម្ពស់អនាម័យជនបទតាមរយៈ យន្តការក្រុមការងារបច្ចេកទេសវិស័យផ្គត់ផ្គង់ទឹកស្អាតនិងអនាម័យជនបទទាំងថ្នាក់ជាតិ និងថ្នាក់ក្រោមជាតិ។ ទី២-ក្រសួងអភិវឌ្ឍន៍ជនបទ ក្រសួង ស្ថាប័នពាក់ព័ន្ធ និងគ្រប់ភាគីពាក់ព័ន្ធទាំងអស់ត្រូវបន្តចូលរួមសហការ ឱ្យកាន់តែទូលំទូលាយ និងជិតស្និទ្ធបន្ថែមទៀត ស្របតាមយុទ្ធសាស្ត្របញ្ចកោណដំណាក់កាលទី១ និងគោលដៅ នៃកម្មវិធីនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភា ទាក់ទងនឹងការងារលើកកម្ពស់អនាម័យជនបទ។ ទី៣-ក្រសួងអភិវឌ្ឍន៍ជនបទ ត្រូវបន្តសហការជាមួយក្រសួង ស្ថាប័នពាក់ព័ន្ធ និងដៃគូអភិវឌ្ឍ អង្គការមិនមែន រដ្ឋាភិបាល រៀបចំធ្វើបច្ចុប្បន្នភាពគោលនយោបាយ ផែនការយុទ្ធសាស្ត្រ និងផែនការសកម្មភាពវិស័យផ្គត់ផ្គង់ ទឹកស្អាត និងអនាម័យជនបទ ដើម្បីប្រើប្រាស់ជាឯកសារគតិយុត្ត និងជាផែនទីបង្ហាញផ្លូវក្នុងការងារលើកកម្ពស់ អនាម័យជនបទ។ ទី៤-ក្រសួងអភិវឌ្ឍន៍ជនបទ ត្រូវបន្តខិតខំស្វែងរកការគាំទ្រ និងកៀរគរធនធានពីដៃគូអភិវឌ្ឍនិងវិស័យឯកជន ព្រមទាំងសប្បុរសជននានាលើការងារលើកកម្ពស់អនាម័យជនបទ។
ទី៥-ក្រសួងអភិវឌ្ឍន៍ជនបទត្រូវបន្តពង្រឹងយន្តការគ្រប់គ្រងទិន្នន័យអត្រាគ្របដណ្តប់អនាម័យជនបទឱ្យ កាន់តែមានភាពច្បាស់លាស់ និងប្រកបដោយភាពជឿជាក់សម្រាប់ប្រើប្រាស់ជាមូលដ្ឋានក្នុងការតាមដានត្រួតពិនិត្យ និងវាយតម្លៃអំពីវឌ្ឍនភាពនៃការងារលើកកម្ពស់អនាម័យជនបទ។ ទី៦-ក្រសួងអភិវឌ្ឍន៍ជនបទ និងក្រសួង ស្ថាប័នពាក់ព័ន្ធ ត្រូវបន្តខិតខំស្វែងរកបច្ចេកវិទ្យាថ្មីៗទាក់ទងនឹង ការងារលើកកម្ពស់អនាម័យជនបទដែលសមស្រប និងមានភាពធន់ទៅនឹងការប្រែប្រួលអាកាសធាតុ ក៏ដូចជា ការគ្រប់គ្រងកាកសំណល់លាមកប្រកបដោយសុវត្ថិភាព និងចីរភាព។ ទី៧-ក្រសួងអភិវឌ្ឍន៍ជនបទ និងក្រសួង ស្ថាប័នពាក់ព័ន្ធ ត្រូវបន្តលើកទឹកចិត្ត និងគាំទ្រតាមគ្រប់រូបភាព ដល់ខេត្ត ក្រុង ស្រុក ខណ្ឌ ឃុំ សង្កាត់ និងភូមិដែលទទួលបានការបញ្ចប់ការបន្ទោបង់ពាសវាលពាសកាលកម្រិត មូលដ្ឋាន ដើម្បីរក្សាបាននូវនិរន្តរភាព និងឈានទៅសម្រេចបានជាខេត្ត ក្រុង ស្រុក ខណ្ឌ ឃុំ សង្កាត់ និងភូមិដែល បញ្ចប់ការបន្ទោបង់ពាសវាលពាសកាលកម្រិតខ្ពស់។
ទី៨- ក្រសួងអភិវឌ្ឍន៍ជនបទ និងក្រសួង ស្ថាប័នពាក់ព័ន្ធ ត្រូវបន្តការយកចិត្តទុកដាក់បន្ថែមទៀតចំពោះ ក្រុមងាយរងគ្រោះ គ្រួសារក្រីក្រ ជនជាតិដើមភាគតិច ស្ត្រីមេម៉ាយ ជនមានពិការភាព និងអ្នកដែលរស់នៅក្នុងមូលដ្ឋាន។ អត្ថបទលោក ធូ កែវមុន្នី.ពិនិត្យដោយអ៊ុមញឹប។
