ឯកឧត្តម ចាន់ យុត្ថា លើកទឹកចិត្តបេក្ខជនត្រៀមប្រឡងបាក់ឌុប ឆ្នាំ២០២៦ ឱ្យទទួលបាននិទ្ទេសល្អប្រសើរ និងទទួលបានរង្វាន់បន្ថែមពីក្រុមការងារ
(កំពង់ធំ ) ៖ ឯកឧត្តម ចាន់ យុត្ថា លើកទឹកចិត្តបេក្ខជនត្រៀមប្រឡងបាក់ឌុប ឆ្នាំ២០២៦ ឱ្យទទួលបាននិទ្ទេសល្អប្រសើរ និងទទួលបានរង្វាន់បន្ថែមពីក្រុមការងារ។
នៅថ្ងៃទី០២ ខែសីហា ឆ្នាំ២០២៦ប្រធានក្រុមការងារចុះមូលដ្ឋានឃុំប្រឡាយ និងឃុំពពក ស្រុកស្ទោង បានលើកទឹកចិត្តដូច្នេះក្នុងឱកាសដែលលោក និងសហការី បានអញ្ជើញចុះជួបសំណេះសំណាលផ្ទាល់ជាមួយប្អូនៗសិស្សានុសិស្សថ្នាក់ទី១២ និងអាណាព្យាបាល នៅវិទ្យាល័យ ជា ស៊ីម ប្រឡាយ ដែលនឹងត្រូវប្រឡងសញ្ញាបត្រមធ្យមសិក្សាទុតិយភូមិ នាថ្ងៃទី១០ ខែសីហា ឆ្នាំ២០២៦ ខាងមុខនេះ។
ជាមួយគ្នានេះដែរ ឯកឧត្តមប្រធានក្រុមការងារ ក៏បានប្រកាសជាផ្លូវការនូវរង្វាន់លើកទឹកចិត្តពិសេសបន្ថែម សម្រាប់ប្អូនៗសិស្សានុសិស្ស បេក្ខជនណា ដែលខិតខំប្រឹងប្រែងរៀនសូត្រ ប្រឡងជាប់ និងទទួលបានលទ្ធផលល្អប្រសើរ (និទ្ទេសល្អ) ក្នុងការប្រឡងបាក់ឌុបសម័យប្រឡងខាងមុខនេះ។
ឯកឧត្តមមានជំនឿចិត្តយ៉ាងមុតមាំថា ការយកចិត្តទុកដាក់ និងការគាំទ្រទាន់ពេលវេលានេះ គឺជាកម្លាំងចិត្តដ៏ធំធេងសម្រាប់ប្អូនៗសិស្សានុសិស្សនៅវិទ្យាល័យ ជា ស៊ីម ប្រឡាយ ក្នុងការបោះជំហានទៅប្រឡងប្រជែងយកសញ្ញាបត្រមធ្យមសិក្សាទុតិយភូមិ ក្រោមពាក្យស្លោក «ចេះ គឺជាប់» ប្រកបដោយភាពជឿជាក់ និងស្មារតីមុះមុត។
សូមបញ្ជាក់ថា នៅក្នុងពិធីសំណេះសំណាលផ្តាំផ្ញើ និងសួរសុខទុក្ខនិងលើកទឹកចិត្តយ៉ាងយកចិត្តទុកដាក់នេះ ឯកឧត្តម ចាន់ យុត្ថា បានឧបត្ថម្ភថវិកាសម្រាប់ទ្រទ្រង់ការចំណាយលើការធ្វើដំណើរ ការស្នាក់នៅ និងចំណីអាហារជូនដល់សិស្សានុសិស្សទាំងអស់ដែលត្រូវធ្វើដំណើរទៅប្រឡងដល់ក្រុងស្ទឹងសែន ចំនួន១១៧នាក់ ក្នុង១ទទួលបានថវិកា៦០ ០០០រៀល ក្នុងនោះសិស្សក្រីក្រ ២១នាក់ ទទលបានការបន្ថែនចំនួន
៦០.០០០រៀលទៀត ដើម្បីជួយសម្រាលបន្ទុកសេដ្ឋកិច្ចគ្រួសាររបស់អាណាព្យាបាល ពិសេសសិស្សានុសិស្សដែលមានជីវភាពខ្វះខាត។ អត្ថបទ រដ្ឋបាលស្រុកស្ទោង-ពិនិត្យដោយអ៊ុមញឹប។
