ឧត្តមសេនីយ៍ទោ សោម ស៊ុន ដឹកនាំសហការី ទៅត្រួតពិនិត្យស្ថានភាពជីវភាពរស់នៅ របស់អតីតយុទ្ធជន ដែលមានដី តែមានជម្រកស្នាក់នៅមិនសមរម្យ ដើម្បីសាងសង់ផ្ទះថ្មីជូនគាត់ នៅស្រុកប្រាសាទបល្ល័ង្ក ខេត្តកំពង់ធំ
ខេត្តកំពង់ធំ៖ នៅព្រឹកថ្ងៃទី១៦ ខែវិច្ឆិកា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ តំណាងគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ បានដឹកនាំសហការី ទៅស្វែងយល់អំពីសុខទុក្ខ និងជីវភាពរស់នៅរបស់អតីតយុទ្ធជន ដែលមានដី តែមានជម្រកស្នាក់នៅមិនសមរម្យ រស់នៅភូមិថ្នល់ ឃុំទួលគ្រើល ស្រុកប្រាសាទបល្ល័ង្ក ខេត្តកំពង់ធំ ។
លោកតាពលបាលឯក សេង ផល អាយុ ៦៥ឆ្នាំ បានបញ្ជាក់ថា៖ បច្ចុប្បន្នគាត់ជាបុរសពោះម៉ាយ មានកូនចំនួន ៥នាក់ ក្នុងនោះមានមួយនាក់បានទទួលមរណភាពហើយ នឹងមានគ្រួសាររួចហើយចំនួនបីនាក់ ។ នៅសល់កូនពៅមួយនាក់និងចៅបួននាក់ រស់នៅជាមួយគាត់ ។ គាត់ធ្លាប់បានចូលបម្រើក្នុងជួរកងទ័ពនៅឆ្នាំ១៩៨៤ នៅអង្គភាពយោធាស្រុកកំពង់ស្វាយ ខេត្តកំពង់ធំ ហើយបានត្រូវរបួសដោយសារអំបែងគ្រាប់ បណ្តាលឲ្យគាត់ពិការរាងកាយ នៅក្នុងសមរភូមិប្រយុទ្ធ នៅតំបន់សំណង់ទឹក ៣០កញ្ញា ក្នុងឃុំដំរីស្លាប់ ស្រុកកំពង់ស្វាយ ខេត្តកំពង់ធំ នៅឆ្នាំ១៩៨៩ ។ បច្ចុប្បន្នគាត់មានជីវភាពលំបាកខ្វះខាត និងមានជម្រកស្នាក់នៅមិនសមរម្យ ។
ឧត្តមសេនីយ៍ទោ សោម ស៊ុន បានសូមអធ្យាស្រ័យចំពោះការយឺតយ៉ាវក្នុងការសាងសង់ផ្ទះថ្មី ជូនគាត់ ដោយសារគម្រោងសាងសង់ផ្ទះថ្មីបន្ថែមទៀត នៅតាមមូលដ្ឋាននានាក្នុងខេត្តកំពង់ធំ ទើបតែទទួលបាននៅត្រីមាសទី៤ ឆ្នាំ ២០២៥នេះ ហើយក្រុមការងារ និងដំណើរការសាងសង់ផ្ទះថ្មី ដែលមានទំហំ ៥ម៉ែត្រគុណនិង ៧ម៉ែត្រ សាងសង់ពីសរសរបេតុង ឆ្អឹងដែក រនាបក្រាលក្តារ ជញ្ជាំងស្មាតប៊ត មានតសំយ៉ាបផ្ទះបាយប្រវែង ៣ម៉ែត្រ ទៅខាងក្រោយផ្ទះ ព្រមទាំងមានបង្គន់អនាម័យមួយខ្នងផងដែរ ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា តាមរយៈឯកឧត្តមទេសរដ្ឋមន្ត្រី នាយឧត្តមសេនីយ៍ គន់ គីម អនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា សម្រាប់ផ្ដល់ជូនគាត់នៅពេលដ៏ខ្លីខាងមុខនេះ ។
លោកតាពលបាលឯក សេង ផល រំភើបចិត្ត អួលដើមករ សប្បាយរីករាយរកអ្វីប្រៀបផ្ទឹមពុំបាន និងបានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចតេជោ ហ៊ុន សែន និងសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈឯកឧត្តមទេសរដ្ឋមន្ត្រី នាយឧត្តមសេនីយ៍ គន់ គីម ដែលបានចាត់តាំងក្រុមការងារនៃគណៈកម្មាធិការសមាគមអតីតយុទ្ធជន និងនិវត្ដជនកម្ពុជា ខេត្តកំពង់ធំ សាងសង់ផ្ទះថ្មីជូនគាត់នៅពេលខាងមុខនេះ និងសូមគោរពជូនពរសម្ដេច ឯកឧត្តម លោក លោកស្រីទាំងអស់ សូមទទួលបាននូវពុទ្ធពរទាំង ៤ប្រការកុំបីឃ្លាតទៀតឡើយ ។
នៅក្នុងឱកាសនេះ ឧត្តមសេនីយ៍ទោ សោម ស៊ុន បានចាត់តាំងក្រុមការងារដើម្បីវាស់វែងទីតាំងសម្រាប់សាងសង់ផ្ទះលេីដីកម្មសិទ្ធិរបស់គាត់ នឹងបានឧបត្ថម្ភស្បៀងអាហារគ្រឿងឧបភោគបរិភោគមានអង្ករចំនួន ៥០គីឡូក្រាម មីខ្លាឃ្មុំចំនួនមួយកេស និងទឹកត្រី ទឹកសុីអុីវចំនួនពីរយួរ ជូនក្រុមគ្រួសារលោកតាពលបាលឯក សេង ផល សម្រាប់ដោះស្រាយជីវភាពប្រចាំថ្ងៃ ចំពេលដែលគាត់កំពុងខ្វះខាតស្បៀងអាហារប្រចាំថ្ងៃផងដែរ ។ តំបន់ប្រតិបត្តិការសឹករងកំពង់ធំ-ពិនិត្យដោយអ៊ុមញឹប។
