រដ្ឋបាលខេត្តកំពង់ធំ បានរៀបចំសម្អាតអនាម័យបរិស្ថាន ដើម្បីអបអរសាទរពិធីបណ្តែតប្រទីប បង្ហោះគោម និងពិធីបួងសួងចម្រើនសិរីសួស្តី ក្នុងក្រុងស្ទឹងសែន ខេត្តកំពង់ធំ
(កំពង់ធំ)÷ នៅព្រឹកថ្ងៃទី០៣ ខែវិច្ឆិកា ឆ្នាំ២០២៥ ឯកឧត្តម ព្រឹម រដ្ឋា អភិបាលរងខេត្ត និងឯកឧត្តម អ៊ុង វុទ្ធី អភិបាលរងខេត្ត ជាប្រធានអនុគណៈកម្មការសុខភាព អនាម័យ និងបរិស្ថាន បានដឹកនាំសមាជិក មន្ត្រីរាជការនៃមន្ទីរ-អង្គភាពជុំវិញខេត្ត មន្ត្រីសាលាខេត្ត កងកម្លាំងប្រដាប់អាវុធ និងប្រជាពលរដ្ឋក្នុងក្រុងស្ទឹងសែន ប្រមាណ៤០០នាក់ បានរួមគ្នាធ្វើពលកម្មសម្អាតអនាម័យ បរិស្ថាន ដើម្បីអបអរសាទរពិធីបណ្តែត ប្រទីប បង្ហោះគោម និងពិធីបួងសួងចម្រើនសិរីសួស្តី ក្នុងក្រុងស្ទឹងសែន ខេត្តកំពង់ធំ នឹងប្រារព្ធពិធីនាថ្ងៃទី០៤ ខែវិច្ឆិកា ឆ្នាំ២០២៥ ខាងមុខនេះ ។
ពិធីធ្វើពលកម្មសម្អាតអនាម័យបរិស្ថាននេះ បានជួបជុំគ្នានៅសួនស្ទឹងសែន ហើយធ្វើសកម្មភាពសម្អាតអនាម័យ(សំរាម)នៅតាមដងផ្លូវ និងទីសាធារណៈមួយចំនួននៅក្នុងក្រុងស្ទឹងសែន ខេត្តកំពង់ធំ។
ថ្លែងនៅក្នុងកម្មវិធីធ្វើពលកម្មនេះ ឯកឧត្តម ព្រឹម រដ្ឋា បានលើកឡើងថា ដោយមានការយកចិត្តទុកដាក់ខ្ពស់ពីឯកឧត្តម នួន ផារ័ត្ន អភិបាលខេត្តកំពង់ធំ បានរៀបចំឱ្យក្រុមការងារសម្អាតអនាម័យបរិស្ថាននៅក្រុងស្ទឹងសែន ដើម្បីឱ្យមានភាពស្រស់ស្អាត ក្នុងការទាក់ទាញភ្ញៀវជាតិ និងអន្តរជាតិមកទស្សនាពិធីបណ្តែត ប្រទីប បង្ហោះគោម និងពិធីបួងសួងចម្រើនសិរីសួស្តីកើតមានដល់បងប្អូនប្រជាពលរដ្ឋក្នុងខេត្តកំពង់ធំ ក៏ដូចនៅក្នុងទូទាំងប្រទេសកម្ពុជាផងដែរ។
ជាចុងក្រោយឯកឧត្តម ព្រឹម រដ្ឋា អភិបាលរងខេត្ត និងឯកឧត្តមអ៊ុង វុទ្ធី អភិបាលរងខេត្ត បានដឹកនាំក្រុមការងារចុះធ្វើពលកម្មសម្អាតអនាម័យផ្ទាល់ ក្នុងបរិវេណក្រុងស្ទឹងសែន។ ឯកឧត្តមក៏បានជំរុញ និងលើកទឹកចិត្តដល់ក្រុមការងារទាំងអស់ដែលបានចូលរួមសហការសម្អាតអនាម័យ យកទៅដាក់ឲ្យបានត្រឹមត្រូវ ដោយបានបែងចែកសំរាមទៅតាមប្រភេទ គឺជាការញែកសំរាម ដើម្បីងាយស្រួលក្នុងគ្រប់គ្រង និងទុកដាក់តាមលក្ខណ:បច្ចេកទេស ពីព្រោះសំរាមជាប្រភពមេរោគ ដែលអាចចម្លងមេរោគលឿនបំផុតទៅមនុស្ស និងសត្វ។ ការគ្រប់គ្រងសំណល់រឹង សំរាមបានត្រឹមត្រូវតាមលក្ខណ:បច្ចេកទេស គឺជាការចូលរួមកាត់បន្ថយការប៉ះពាល់ដល់សុខភាពសាធារណ: និងបរិស្ថាន ព្រមទាំងបានបង្កើននូវសោភ័ណភាព ដែលជាបំណងប្រាថ្នារបស់មនុស្សជាតិ។ រយ:មួយព្រឹក ត្រូវបានបញ្ចប់ការធ្វើពលកម្មសម្អាតអនាម័យនេះ។ អត្ថបទមន្ទីរបរិស្ថានខេត្តកំពង់ធំ.ពិនិត្យដោយអ៊ុមញឹប។
