អភិបាលស្រុកតាំងគោក បានលើកឡើងថាការវិនិយោគលើវិស័យអប់រំ ជាការវិនិយោគលើយុវជន ដើម្បីអនាគតរបស់ប្រទេសជាតិ

(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក នាព្រឹកថ្ងៃទី០១ ខែវិច្ឆិកា ឆ្នាំ២០២៥នេះ បានអញ្ជើញជាអធិបតីក្នុងពិធីបើកបវេសនកាលឆ្នាំសិក្សាថ្មី ២០២៥-២០២៦ នៅវិទ្យាល័យទ្រៀល ស្រុកតាំងគោក និងដោយមានការចូលរួមពីលោកគ្រូអ្នកគ្រូ អាណាព្យាបាលសិស្ស រួមទាំងមានសិស្សានុសិស្សជាច្រើននាក់ផងដែរ។

នាកាសនោះលោក ហាក់ ម៉ុងហួត អភិបាលស្រុកតាំងគោក ក៏បានអានសារលិខិតដ៏មានអត្ថន័យរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា នៃថ្ងៃបើកបវេសនកាលឆ្នាំសិក្សាថ្មី ២០២៥-២០២៦ ដោយក្នុងសារលិខិតនេះ សម្តេចបានសម្តែងនូវក្តីសោមនស្សរីករាយក្រៃលែង និងប្រកបដោយភាពស្និទ្ធស្នាលជាមួយជនរួមជាតិ លោកគ្រូអ្នកគ្រូ សាស្ត្រាចារ្យ ក្មួយៗសិស្សានុសិស្ស ទាំងអស់គ្រប់ភូមិសិក្សា ដែលកំពុងអបអរសាទរការបើកបវេសនកាលឆ្នាំសិក្សាថ្មី នៅទូទាំងកម្ពុជា នាថ្ងៃទី០១ ខែវិច្ឆិកា ឆ្នាំ២០២៥នេះ។

សាររបស់សម្តេចនាយករដ្ឋមន្ត្រី បានបញ្ជាក់ទៀតថា រាជរដ្ឋាភិបាលកម្ពុជា នីតិកាលទី៧ នៃរដ្ឋសភា នៅតែបន្តយកចិត្តទុកដាក់ខ្ពស់លើវិស័យអប់រំ តាមរយៈការបន្តរិះរកវិធានការ និងយុទ្ធសាស្ត្របន្ថែមទៀត ដើម្បីធ្វើយ៉ាងណាឱ្យសាលារៀនក្លាយជាអង្គភាពផ្តល់សេវាសាធារណៈប្រកបដោយប្រសិទ្ធភាពខ្ពស់ អភិបាលកិច្ចល្អ និងមានគណនេយ្យភាពចំពោះប្រជាជន និងសហគមន៍ ដោយការពង្រឹងអភិបាលកិច្ចសាលារៀន និងការលើកកម្ពស់សកម្មភាពបង្រៀននិងរៀន តម្រង់ឆ្ពោះទៅរក ការកែលម្អលទ្ធផលនៃការសិក្សារបស់សិស្សកាន់តែប្រសើរឡើង ប្រកបដោយវិន័យ សីលធម៌ គុណធម៌ និង ឥរិយាបថថ្លៃថ្នូរ សក្តិសមជាកុលបុត្រ កុលធីតាខ្មែរ និងជាទំពាំងស្នងឫស្សីរបស់ជាតិ។

ថ្លែងនាឱកាសនោះដែរលោក ហាក់ ម៉ុងហួត បានបញ្ជាក់ថា ការវិនិយោគលើវិស័យអប់រំ តាមរយៈបន្តពង្រឹងអភិបាលក្នុងកិច្ចសាលារៀន ការអនុវត្តស្តង់ដាសាលារៀនគំរូ គឺដើម្បីជាការចូលរួមបណ្តុះបណ្តាលដល់យុវជនឱ្យមានចំណេះដឹង មានអត្តចរិតល្អ សីលធម៌ល្អ និងសុជីវធម៌ល្អ ទាំងនៅក្នុងគ្រួសារ និងក្នុងសហគមន៍ ក្លាយជាធនធានមនុស្សដែលសង្គមជាតិត្រូវការ ក្នុងការចូលរួមចំណែកយ៉ាងសំខាន់ដើម្បីចូលរួមអភិវឌ្ឍប្រទេសជាតិ នាពេលអនាគត់ផងដែរ។

ជាមួយនេះផងដែរ លោក ហាក់ ម៉ុងហួត ក៏បានជំរុញមាតាបិតា អាណាព្យាបាលត្រូវចូលរួមឲ្យបានសកម្មជាមួយសាលារៀន ក្នុងការលើកកម្ពស់ការសិក្សារបស់បុត្រធីតារបស់ខ្លួន និងជួយតាមដានការសិក្សាទាំងនៅផ្ទះ និងនៅសាលារៀន។ សិស្សានុសិស្សគ្រប់គ្នាត្រូវធ្វើខ្លួនជាមនុស្សមានវិន័យ ជាគំរូដល់សិស្សប្អូន ជាទំពាំងល្អដើម្បីស្នងឫស្សី ត្រូវខិតខំសិក្សារៀនសូត្រឲ្យបានក្លាយជាសិស្សពូកែ ដើម្បីទទួលបាននូវចំណេះដឹងពិតប្រាកដ ដើម្បីជំរុញឲ្យខ្លួនយើងមានអនាគតល្អត្រចះត្រចង់ ហើយប្រទេសជាតិមានការរីកចំរើនទៅបានក៏អាស្រ័យទៅលើធនធានមនុស្សសម្បូរបែបមានជំនាញពិតប្រាកដ ដែលកើតចេញពីការខិតខំពីសិស្សានុសិស្ស និងយុវជនផងដែរ។

លោកអភិបាលស្រុក បានណែនាំដល់សិក្សានុសិស្សត្រូវខិតខំរៀនសូត្រឲ្យបានខ្ជាប់ខ្ជួន ដើម្បីអនាគតខ្លួន គ្រួសារ និងសង្គមជាតិ និងចៀសឲ្យឆ្ងាយពីគ្រឿងញៀន ល្បែងស៊ីសង បងតូចបងធំ ព្រោះវានាំឲ្យខូចអនាគតខ្លួនឯងផងដែរ៕ អត្ថបទរដ្ឋបាលស្រុកតាំងគោក-ពិនិត្យដោយអ៊ុមញឹប។