ឧត្តមសេនីយ៍ទោ សោម ស៊ុន ណែនាំមេបញ្ជាការគ្រប់អង្គភាពនៅសមរភូមិក្រោយ ត្រូវស្រាវជ្រាវ ដោះស្រាយ និងបម្រើសេចក្តីត្រូវការ ជូនយោធិន នៅសមរភូមិមុខ និងក្រុមគ្រួសារ
ខេត្តកំពង់ធំ៖ នៅរសៀលថ្ងៃទី៣០ ខែតុលា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ តំណាងគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ បានដឹកនាំកិច្ចប្រជុំ ប្រគល់ភារកិច្ចចាំបាច់មួយចំនួន ជូនដល់ថ្នាក់ដឹកនាំក្រុមលេខាធិការដ្ឋាន នៃគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ រួមជាមួយមេបញ្ជាការផ្នែកសឹករងក្រុងស្រុកទាំង៩ នៅក្នុងខេត្ត ដើម្បីស្រាវជ្រាវដោះស្រាយ និងបម្រើសេចក្តីត្រូវការចាំបាច់នានា ជូនដល់យោធិន ដែលកំពុងជាប់ដៃបំពេញភារកិច្ចក្នុងការការពារបូរណភាពទឹកដី នៅសមរភូមិមុខ ដែលមានគ្រួសារនៅខាងក្រោយជួបការលំបាកខ្វះខាត ។
ឧត្តមសេនីយ៍ទោ សោម ស៊ុន បានបញ្ជាក់ថា ៖ ដោយអនុវត្ត តាមបទបញ្ជារបស់ឯកឧត្តមទេសរដ្ឋមន្ត្រី នាយឧត្តមសេនីយ៍កិត្តិសង្គហបណ្ឌិត គន់ គីម អនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា នឹងបានការឯកភាពពីឯកឧត្តម នួន ផារ័ត្ន អភិបាលខេត្ត ប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ ។ សំណូមពរមេបញ្ជាការគ្រប់បណ្ដាផ្នែកសឹករងក្រុងស្រុកទាំង៩ ត្រូវរួមសហការជាមួយអាជ្ញាធរដែនដី គ្រប់លំដាប់ថ្នាក់នៅមូលដ្ឋាន ដើម្បីធ្វើការស្រាវជ្រាវមុខសញ្ញាក្រុមគ្រួសារវីរយុទ្ធជនរបស់យើងដែលនៅជួរខាងមុខ ហើយមានជីវភាពលំបាកខ្វះខាត ឬមានជម្រកស្នាក់នៅមិនសមរម្យ ដើម្បីចាត់វិធានការនានាជួយដោះស្រាយជូនពួកគាត់ឲ្យបានល្អប្រសើរ ។
ឧត្តមសេនីយ៍ទោ សោម ស៊ុន បានបញ្ជាក់បន្ថែមទៀតថា៖ មេបញ្ជាការកងកម្លាំងគ្រប់បណ្ដាកងឯកភាពចំណុះនៃបញ្ជាការដ្ឋានតំបន់ប្រតិបត្តិការសឹឹករងកំពង់ធំ ។ ក្រៅពីការត្រៀមកម្លាំងនិងមធ្យោបាយគ្រប់គ្រាន់ ដើម្បីអនុវត្តតាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ក្នុងភារកិច្ចការពារបូរណភាពទឹកដី និងការចូលរួមបង្ក្រាបបទល្មើសធនធានធម្មជាតិ កងកម្លំាងទាំងអស់ ត្រូវចូលរួមអនុវត្តភារកិច្ចសមរភូមិក្រោយ បម្រើឲ្យសមរភូមិមុខ ដោយត្រូវជួយដោះស្រាយនូវរាល់ការលំបាកផ្សេងៗ តាមការដែលអាចធ្វេីទៅបាន និងរាយការណ៍ជូនថ្នាក់ដឹកនាំ ដេីម្បីជួយដោះស្រាយជូនដល់ក្រុមគ្រួសារយោធិនរបស់យើង ដែលកំពុងជាប់ដៃនៅសមរភូមិមុខ ឲ្យបានល្អ និងទាន់ពេលវេលា ។អត្ថបទតំបន់ប្រតិបត្តិការសឹករងកំពង់ធំ-ពិនិត្យដោយអ៊ុមញឹប។
