អភិបាលខេត្តកំពង់ធំផ្ដល់គោលការណ៍ ៧ ចំណុច ដល់មន្ទីរ អង្គភាពនិងអាជ្ញាធរក្រុង ស្រុក ឃុំ សង្កាត់ទាំងអស់ត្រូវសូមលើកទឹកចិត្តឲ្យបន្តខិតខំបំពេញកិច្ចការឲ្យកាន់តែមានប្រសិទ្ធភាព ដើម្បីបម្រើសេវា និងឧត្តមប្រយោជន៍ដល់ប្រជាពលរដ្ឋ
(កំពង់ធំ) ៖ ឯកឧត្តម នួន ផារ័ត្ន អភិបាលខេត្តកំពង់ធំផ្ដល់គោលការណ៍ ៧ ចំណុច ដល់មន្ទីរ អង្គភាពនិងអាជ្ញាធរក្រុង ស្រុក ឃុំ សង្កាត់ទាំងអស់ត្រូវសូមលើកទឹកចិត្តឲ្យបន្តខិតខំបំពេញកិច្ចការឲ្យកាន់តែមានប្រសិទ្ធភាព ដើម្បីបម្រើសេវា និងឧត្តមប្រយោជន៍ដល់ប្រជាពលរដ្ឋ ។
ឯកឧត្តម នួន ផារ័ត្ន ថ្លែងក្នុងបិទសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់មន្ទីររៀបចំដែនដី នគររូបនីយកម្ម និងសំណង់ខេត្តកំពង់ធំ ថ្ងៃទី២១ ខែតុលា ឆ្នាំ២០២៥ ។
ឯកឧត្តម បានបញ្ជាក់ថារាជរដ្ឋាភិបាលអាណត្តិទី៧នេះ ក្នុងយុទ្ធសាស្ត្របញ្ចកោណ ដំណាក់កាលទី១ បានកំណត់យកជាអាទិភាពគន្លឹះ៥ គឺ មនុស្ស ផ្លូវ ទឹក ភ្លើង និងបច្ចេកទេសវិទ្យា ជាពិសេសបច្ចេកវិទ្យាឌីជីថល។
ឯកឧត្តម បន្តថាអាជ្ញាធរគ្រប់ជាន់ថ្នាក់ស្ថាប័នពាក់ព័ន្ធ ព្រមទាំងមន្រ្តីជំនាញទាំងអស់ ដែលបាននិងកំពុងអនុវត្តការងារបម្រើសេវាសាធារណៈជូនប្រជាពលរដ្ឋត្រូវយកចិត្តទុកដាក់ដូចខាងក្រោម៖
១៖ យកចិត្តទុកដាក់តាមដានរាល់ការណែនាំរបស់ក្រសួង និងរដ្ឋបាលខេត្តក្នុងការងារចុះបញ្ជីដីធ្លីមានលក្ខណៈជាប្រព័ន្ធឲ្យបានចប់តាមផែនការដើម្បីផ្ទេរកម្មសិទ្ធិជូនប្រជាពលរដ្ឋ ។
២៖ ចូលរួមជំរុញយន្តការគណៈកម្មាធិការរៀបចំដែនដី និងនគរូបនីយកម្មថ្នាក់ខេត្ត និងថ្នាក់ក្រុង-ស្រុក ដើម្បីបង្កើនប្រសិទ្ធភាពការងាររៀបចំដែនដី ។
៣៖ ជំរុញការងារកំណត់តំបន់ទីប្រជុំជន និងការធ្វើផែនការប្រើប្រាស់ដីក្នុងទីប្រជុំជនត្រូវរៀបចំប្លង់គោលដោយផ្តោតលើទំហំផ្លូវ ប្រព័ន្ធលូ អាងស្តុបទឹក និង កន្លែងទុកដាក់សំរាម។
៤៖ ជំរុញការងារដោះស្រាយវិវាទដីធ្លី តាមយន្តការគណៈកម្មាធិការសុរិយោដី ឲ្យបានល្អប្រសើរ ពិសេសត្រូវធ្វើផែនការដោះស្រាយវិវាទ ។
៥៖ ពង្រឹងការចុះត្រួតពិនិត្យសំណង់ជាប្រចាំនិងសហការជាមួយស្ថាប័នពាក់ព័ន្ធ ដើម្បីផ្សព្វផ្សាយឲ្យប្រជាពលរដ្ឋអនុវត្តតាមបទប្បញ្ញត្តិសំណង់ទប់ស្កាត់ឲ្យបានទាន់ពេលវេលានៅសំណង់ដែលសាងសង់ខុសច្បាប់ ពិសេស ឃុំ សង្កាត់ ត្រូវពិនិត្យមើលតាមដងស្ទឹងកុំឲ្យប្រជាពលរដ្ឋសាងសង់សំណង់នៅជាប់មាត់ស្ទឹង។
៦៖ បន្តកិច្ចសហការជាមួយគណៈកម្មាធិការ សម្បទានដីសង្គមកិច្ចថ្នាក់ជាតិ និងគណៈកម្មាធិការប្រើប្រាស់និងបែងចែកដីថ្នាក់ខេត្ត ដើម្បីអនុវត្តគម្រោង LASED III តាមផែនការគ្រោងទុក ។
៧៖ គ្រប់មន្ទីរ អង្គភាពត្រូវចូលរួម សហការអនុវត្តការងារស្របតាមជវភាពនៃប្រព័ន្ធតួអង្គតែមួយ ។
ឯកឧត្តម នួន ផារ័ត្ន សូមវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ថ្នាក់ដឹកនាំនិងមន្ដ្រីរាជការទាំងអស់នៅមន្ទីររៀបចំដែនដី នគរូបនីយកម្ម សំណង់ និងសុរិយាដី ខេត្តកំពង់ធំ និងអាជ្ញាធរពាក់ព័ន្ធគ្រប់លំដាប់ថ្នាក់ ដែលបំពេញការងារប្រកបដោយឆន្ទៈខ្ពស់ និងទទួលបានលទ្ធផលល្អ ហើយក៏សូមលើកទឹកចិត្តឲ្យបន្តខិតខំបំពេញកិច្ចការឲ្យកាន់តែមានប្រសិទ្ធភាព ដើម្បីបម្រើសេវា និងឧត្តមប្រយោជន៍ដល់ប្រជាពលរដ្ឋ។ អត្ថបទដោយ សូរហ៊ាន សំអាង-ពិនិត្យដោយអ៊ុមញឹប។
