ប្រធានមន្ទីរព័ត៌មានខេត្តកំពង់ធំ ដឹកនាំកិច្ចប្រជុំប្រចាំខែកក្កដា ឆ្នាំ២០២៦ និងលើកទិសដៅខែបន្ត
(កំពង់ធំ)÷ លោកស្រី ង៉ែត ណារីន ប្រធានមន្ទីរព័ត៌មានខេត្តកំពង់ធំ បានដឹកនាំកិច្ចប្រជុំប្រចាំខែកក្កដា ឆ្នាំ២០២៦ និងលើកទិដៅបន្ត ដើម្បីឱ្យការងាររបស់មន្ទីរព័ត៌មាន មានការរីកចម្រើនជាបន្តបន្ទាន់ ដែលប្រព្រឹត្តទៅនៅរសៀលថ្ងៃពុធ ទី១៥ ខែកក្កដា ឆ្នាំ២០២៦ នៅសាលប្រជុំមន្ទីរព័ត៌មានខេត្តកំពង់ធំ។
នៅក្នុងកិច្ចប្រជុំនេះផងដែរ ក៏មានការអញ្ជើញចូលរួមពីលោក-លោកស្រីអនុប្រធានមន្ទីរ លោក-លោកស្រីប្រធាន/អនុប្រធានការិយាល័យទាំង៥ មន្ត្រី និងមន្រ្តីកិច្ចសន្យាច្រើនរូបផងដែរ។
ជាមួយគ្នានេះផងដែរលោកស្រីប្រធានមន្ទីរព័ត៌មានខេត្តកំពង់ធំ ក៏បានឱ្យប្រធានការិយាល័យនីមួយៗ ឡើងរាយការណ៍ពីរបាយការណ៍ប្រចាំខែកក្កដា ឆ្នាំ២០២៦។
ក្នុងពិធីសំណេះសំណាលជាមួយមន្ត្រីរាជការ លោកស្រី ង៉ែត ណារីន បានលើកឡើងថា មន្ទីរព័ត៌មានខេត្តកំពង់ធំ បានដំណើរការចុះយកព័ត៌មាន ថតរូបភាពយកមកតែងនិពន្ធ ចងក្រងអត្ថបទព័ត៌មានផលិតកម្មវិធីផ្សេងៗ និងស្ថិតអប់រំខ្លីៗ ដើម្បីផ្សព្វផ្សាយតាមបណ្តាញវិទ្យុFM ទូរទស្សន៍ជាតិខេត្ត និងបានបញ្ជូនខ្លឹមសារមកវិទ្យុ និងរូបភាពមកទូរទស្សន៍ជាតិកម្ពុជា ឱ្យជួយផ្សព្វផ្សាយផងដែរ។ ទន្ទឹមនេះមន្ទីរព័ត៌មានខេត្តក៏បានយកចិត្តទុកដាក់ខ្ពស់ក្នុងការចាក់ផ្សាយបន្តពី វិទ្យុ ទូរទស្សន៍ជាតិកម្ពុជា ជាប្រចាំតាមរយៈវិទ្យុ ទូរទស្សន៍ នៅក្នុងខេត្ត នូវរាល់ព្រឹត្តិការណ៍ និងព័ត៌មានសំខាន់ៗស្តីពីព្រះរាជសកម្មភាពព្រះមហាក្សត្រ និងសកម្មភាព ព្រឹទ្ធសភា រដ្ឋសភា ប្រមុខរាជរដ្ឋាភិបាល ព្រមទាំងបានរាយការណ៍នូវព័ត៌មានប្លែកៗ ទាន់ហេតុការណ៍ និងព្រឹត្តិការណ៍ ដែលកើតមានក្នុងមូលដ្ឋានរបស់ខ្លួនមកក្រសួងបានទាន់ពេលវេលា និងធ្វើការត្រួតពិនិត្យជាប្រចាំគ្រប់ ប្រព័ន្ធផ្សព្វផ្សាយក្នុងខេត្តផងដែរ។
លោកស្រីបានបន្តទៀតទៀតថា មន្ទីរព័ត៌មានខេត្ត ជាសេនាធិការរបស់ក្រសួងព័ត៌មាន ដែលបំពេញតួនាទីទ្រទ្រង់ផ្នែក បច្ចេកទេស និងវិស័យព័ត៌មានសម្រាប់ការងារព័ត៌មាននៅថ្នាក់ក្រោមជាតិដោយសម្រេចបាននូវ លទ្ធផលដូចខាងក្រោម៖ ១.នៅក្នុងមន្ទីរ ថ្នាក់ដឹកនាំ ជាមួយមន្ត្រីក្រោមឱវាទមានការសហការគ្នាបានល្អ និងផ្តល់ បទពិសោធន៍ឲ្យគ្នាទៅវិញទៅមក ជាពិសេសមានភាពសាមគ្គីគ្នាបានល្អប្រសើរ។ ២.ថ្នាក់ដឹកនាំ និងមន្ត្រីនៃមន្ទីរព័ត៌មានខេត្តមានការទំនាក់ទំនងល្អជាមួយបណ្តាមន្ទីរ ជំនាញនានា និងស្ថាប័នផ្សេងៗក្នុងខេត្ត មិនដែលមានបញ្ហាអ្វីនោះឡើយ។ ៣.មន្ទីរព័ត៌មានខេត្តតែងតែគោរពអនុវត្តតាមការណែនាំ និងការចង្អុលបង្ហាញរបស់ថ្នាក់ ដឹកនាំខេត្ត និងមានការចូលរួម សហការជាមួយថ្នាក់ដឹកនាំមន្ទីរអង្គភាពនានាក្នុងខេត្ត។
លោកស្រី ង៉ែត ណារីន ប្រធានមន្ទីរព័ត៌មានខេត្តកំពង់ធំ បានធ្វើការបូកសរុប និងលើកទិសដៅសម្រាប់អនុវត្តបន្តរួមមាន÷ បង្កើនការចុះផលិតព័ត៌មានឱ្យបានច្រើន ដើម្បីផ្សព្វផ្សាយតាមវិទ្យុខេត្ត ទូរទស្សន៍ខេត្ត ទូរទស្សន៍ជាតិកម្ពុជា និងគេហទំព័រនានា។ បង្កើនការផ្សព្វផ្សាយដល់អ្នកសារព័ត៌មានឱ្យមកធ្វើការចុះបញ្ជីឱ្យបានគ្រប់ៗគ្នា។ បង្កើនគុណភាពផ្តល់សេវាសាធារណលើវិស័យព័ត៌មាន និងសោតទ្យន៍ (ដល់មូលដ្ឋាន)។ ចុះធ្វើបទយកការណ៍តាមមូលដ្ឋានតាមរដូវកាល។ ជំរុញនិងតាមដានអ្នកសារព័ត៌មានក្នុងខេត្ត និងឆ្លងកាត់មកចុះបញ្ជី។ តាមដានធ្វើបច្ចុប្បន្នភាពលើម្ចាស់ស្ថានីយ៍ វិទ្យុ ទូរទស្សន៍ ទីតាំងតាមបង្គោលនីមួយៗ ដែលមានបំពាក់ម៉ាស៊ីនផ្សាយតាមទីតាំងនីមួយៗ។ តាមដានការបោះពុម្ពផ្សាយទស្សនាវដ្ដី ព្រឹត្តបត្តិ និងប្រមូលព័ត៌មានមកផ្សាយតាមផេក និងវិទ្យុ ទូរទស្សន៍ និងគេហទំព័រនានា បន្តតាមដានការចុះផ្សាយ និងបន្សាបព័ត៌មានក្លែងក្លាយទាំងឡាយតាមគ្រប់មធ្យោបាយ ដែលបង្កឱ្យមានអសន្តិសុខ និងសណ្តាប់ធ្នាប់ដល់សង្គមជាតិ។ បង្កើតកម្មវិធីផ្សាយផ្ទាល់ព័ត៌មានថ្មីៗតាមផេកវិទ្យុ និងទូរទស្សន៍ខេត្តកំពង់ធំ។ អត្ថបទលោក ធូ កែវមុន្នី
