លោកអភិបាលស្រុកស្ទោង បានលើកឡើងថា សំណង់ហេដ្ឋារចនាសម្ព័ន្ធ សមិទ្ធផលច្រើនស្អេកស្កះក្នុងវត្ត គឺជាការរួបរួមសាមគ្គីនិងលះបង់ខ្ពស់របស់ប្រជាពុទ្ធបរិស័ទចំណុះជើងវត្ត
(កំពង់ធំ) ÷ លោកអភិបាលស្រុកស្ទោងបានលើកឡើងថា សំណង់ហេដ្ឋារចនាសម្ព័ន្ធ សមិទ្ធផលច្រើនស្អេកស្កះក្នុងវត្ត គឺជាការរួបរួមសាមគ្គីនិងលះបង់ខ្ពស់របស់ប្រជាពុទ្ធបរិស័ទចំណុះជើងវត្ត លោក សាយ គឹមឡម បានលើកឡើងដូច្នេះក្នុងពិធីសម្ពោធកាត់ខ្សែបូរដាក់ឱ្យប្រើប្រាស់សមិទ្ធផលនានានៅក្នុងវត្តទួលព្រះស្រី ស្ថិតនៅក្នុងឃុំសំព្រោជ ស្រុកស្ទោង ខេត្តកំពង់ធំ កាលពីព្រឹកថ្ងៃទី២៦ ខែឧសភា ឆ្នាំ២០២៦ ។
ជាមួយគ្នានេះលោកបានអំពាវនាវបន្ថែមទៀតដល់ពុទ្ធបរិស័ទចំណុះជើងវត្តជិតឆ្ងាយត្រូវបន្តវប្បធម៌ដ៏ល្អផូរផង់នេះដើម្បីឱ្យវត្តអារាម កាន់តែរីកចម្រើន ជាពិសេសតម្កល់ព្រះពុទ្ធសាសនាឱ្យបានរុងរឿងគ្រប់ ៥,000ព្រះវស្សា តាមពុទ្ធានុញ្ញាត ហើយត្រូវធ្វើការអភិវឌ្ឍវត្តអារាមតាមប្លង់មេច្បាស់លាស់ ជាពិសេសទៀតជាទីអារាមដែលខៀវបំព្រងដោយធម្មជាតិរុក្ខជាតិសួនច្បារចម្រុះពណ៌ និងជាទីមនោរម្យរបស់ពុទ្ធបរិស័ទ។
ទន្ទឹមនឹងនេះលោកបានក្រើនរំលឹកផងដែរដល់ព្រះគ្រូចៅអធិការ លោកអាចារ្យគណៈកម្មការវត្តគ្រប់វត្ត និងមន្ត្រីការិយាល័យជំនាញពាក់ព័ន្ធ ត្រូវពិនិត្យបានហ្មត់ចត់និងច្បាស់លាស់បំផុតក្នុងការយក បរិវេណវត្តអារាមធ្វើចេតិយជាលក្ខណៈបុគ្គលដែលបានធ្វើឱ្យប៉ះពាល់ដល់អារម្មណ៍ពុទ្ធបរិស័ទ អាចក្លាយជាទម្រង់សំណង់អាណាធិបតេយ្យថែមទៀត ហើយលោកនិងឱ្យសហការីធ្វើជំរឿនចេតិយនៅតាមបណ្ដាវត្តអារាមនានាឱ្យបានជាក់លាក់បំផុត។ លើសពីនេះលោកបានលើកទឹកចិត្តដល់យុវជន សិស្សានុសិស្សត្រូវខិតខំសិក្សារៀនសូត្រឱ្យអស់ពីលទ្ធភាពដើម្បីក្លាយជាទំពាំងស្នងឬស្សីក្នុងបរិបទបច្ចេកវិទ្យាទំនើបដើម្បីជ្រោងសេដ្ឋកិច្ចជាតិឱ្យបានរឹងមាំ ជាមូលធនមនុស្សក្នុងការការពារមរណភាពទឹកដីពីសត្រូវឈ្លានពានថែមទៀត ហើយឪពុកម្ដាយ អាណាព្យាបាលត្រូវជំរុញនិងលើកទឹកចិត្តការសិក្សានេះឱ្យបានទូលំទូលាយ បន្តតាមដានការសិក្សារៀនសូត្ររបស់កូនចៅ ឱ្យក្លាយជាមនុស្សប្រកបដោយសីលធម៌ គុណធម៌ ចាកផុតពីអបាយមុខនិងក្មេងទំនើង។
លោក សាយ គឹមឡម ក៏បានអំពាវនាវដល់ប្រជាពលរដ្ឋក្នុងមូលដ្ឋានជាពិសេសសិស្សានុសិស្សនិងយុវជនត្រូវ បន្តធ្វើពហិការទំនិញឬផលិតផលរបស់ប្រទេសសៀម និងលើកកម្ពស់ ផលិតផលក្នុងស្រុក ផលិតផលនៅក្នុងមូលដ្ឋានដើម្បីចូលរួមចំណែកយ៉ាងធំធេង ក្នុងការលើកកម្ពស់សេដ្ឋកិច្ចមូលដ្ឋាន សេដ្ឋកិច្ចជាតិទាំងមូលថែមទៀត។
សូមបញ្ជាក់ផងដែរថាក្នុងឱកាសនោះ លោកអភិបាលស្រុកស្ទោង ព្រមទាំងសហការីនិងព្រះមន្ត្រីសង្ឃ សាលាអនុគុណស្រុកបានចូលរួមបុណ្យនូវបច្ច័យចំនួន២លាន ១២ម៉ឺនរៀល និង១០ដុល្លារអាមេរិកផងដែរ។ អត្ថបទ រដ្ឋបាលស្រុកស្ទោង
* ព័ត៌មានស្រុកស្ទោង បានពិនិត្យដោយ ទៀក យ៉ុហ៊ន
