លោកឧត្តមសេនីយ៍ទោ ហេង សុផល អំពាវនាវ ដល់ប្រជាពលរដ្ឋ សូមចូលរួមសហការ ពាក់ព័ន្ធការងារសន្ដិសុខ សុវត្ថិភាព តាមទីតាំងរស់នៅប្រមូលផ្តុំ
(កំពង់ធំ)៖ ព្រឹកថ្ងៃចន្ទ ទី២៥ ខែឧសភា ឆ្នាំ២០២៦ លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានដឹកនាំពិធីគោរពទង់ជាតិ នៃព្រះរាជាណាចក្រកម្ពុជា នៅស្នងការដ្ឋាននគរបាលខេត្ត ដោយមានកងកម្លាំងនគរបាលចូលរួមចំនួន ៣៥៤នាក់។
បន្ទាប់ពីពិធីគោរពទង់ជាតិ លោកស្នងការបានមានប្រសាសន៍សំណេះសំណាល និងថ្លែងកោតសរសើរ ដល់កងកម្លាំងនគរបាលទាំងអស់ ដែលបានគោរព និងអនុវត្តតួនាទីភារកិច្ចដែលថ្នាក់ដឹកនាំប្រគល់ជូនយ៉ាងសកម្ម ក្នុងការបង្ការ ទប់ស្កាត់ និងបង្ក្រាបបទល្មើសគ្រប់ប្រភេទ ដើម្បីធានារក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ ជូនប្រជាពលរដ្ឋទូទាំងខេត្តកំពង់ធំ។
ក្នុងឱកាសនោះដែរ លោកឧត្តមសេនីយ៍ទោ ហេង សុផល បានអំពាវនាវដល់ប្រជាពលរដ្ឋទាំងអស់ ឱ្យចូលរួមសហការជាមួយសមត្ថកិច្ច ដោយផ្តល់ព័ត៌មានឱ្យបានទាន់ពេលវេលា នៅពេលប្រទះឃើញ ឬមានការសង្ស័យលើសកម្មភាពខុសប្រក្រតីនានា ជាពិសេសករណីជនបរទេសដែលមកស្នាក់នៅ ឬប្រមូលផ្តុំដោយមិនប្រក្រតីនៅតាមមូលដ្ឋាន ដើម្បីឱ្យកម្លាំងជំនាញអាចចុះត្រួតពិនិត្យ ស្រាវជ្រាវ និងចាត់វិធានការបានទាន់ពេលវេលា និងមានប្រសិទ្ធភាព។
លោកស្នងការបានបន្ថែមថា ការចូលរួមរបស់ប្រជាពលរដ្ឋ គឺជាកត្តាសំខាន់ក្នុងការកសាងសង្គមមួយដែលមានសុវត្ថិភាព និងគ្មានបទល្មើស ព្រោះកិច្ចការសន្តិសុខ មិនមែនជាភារកិច្ចរបស់សមត្ថកិច្ចតែមួយមុខនោះទេ ប៉ុន្តែត្រូវការការចូលរួមពីប្រជាពលរដ្ឋគ្រប់រូប។
ប្រជាពលរដ្ឋអាចទាក់ទង និងផ្តល់ព័ត៌មានតាមរយៈលេខទូរស័ព្ទដូចខាងក្រោម៖
• ស្នងការដ្ឋាននគរបាលខេត្តកំពង់ធំ៖ 097 778 0012 / 060 585 858
• អធិការដ្ឋាននគរបាលក្រុងស្ទឹងសែន៖ 097 777 7396
• អធិការដ្ឋាននគរបាលស្រុកតាំងគោក៖ 097 858 5558
• អធិការដ្ឋាននគរបាលស្រុកបារាយណ៍៖ 097 622 2881
• អធិការដ្ឋាននគរបាលស្រុកសន្ទុក៖ 097 881 5858
• អធិការដ្ឋាននគរបាលស្រុកកំពង់ស្វាយ៖ 092 900 027
• អធិការដ្ឋាននគរបាលស្រុកស្ទោង៖ 097 492 2555
• អធិការដ្ឋាននគរបាលស្រុកប្រាសាទបល្ល័ង្ក៖ 097 870 6767
• អធិការដ្ឋាននគរបាលស្រុកប្រាសាទសំបូរ៖ 097 752 7264
• អធិការដ្ឋាននគរបាលស្រុកសណ្ដាន់៖ 088 585 8488
ជាកិច្ចបញ្ចប់ លោកស្នងការបានបង្ហាញក្តីសង្ឃឹមថា ប្រជាពលរដ្ឋនឹងបន្តចូលរួមសហការជាមួយសមត្ថកិច្ចជំនាញ ក្នុងការផ្តល់ព័ត៌មានអំពីបទល្មើស ឬករណីសង្ស័យផ្សេងៗ ដើម្បីឱ្យសមត្ថកិច្ចមានមូលដ្ឋានក្នុងការចុះបង្ក្រាបបានទាន់ពេលវេលា និងមានប្រសិទ្ធភាពខ្ពស់៕ ព័ត៌មានស្នងការដ្ឋាននគរបាលខេត្តកំពង់ធំ បានពិនិត្យដោយ ទៀក យ៉ុហ៊ន។
