លោកឧត្តមសេនីយ៍ទោ ហេង សុផល ដាក់ចេញជាទិសដៅលើការងារចំនួន ០៨ ចំនុច ដល់កងកម្លាំងយកទៅអនុវត្តឱ្យទទួលបានប្រសិទ្ធភាព
(កំពង់ធំ)÷ព្រឹកថ្ងៃទី ១៨ ខែ ឧសភា ឆ្នាំ២០២៦ លោកឧត្តមសេនីយ៍ទោ ហេង សុផល ស្នងការនគរបាលខេត្ត បានដឹកនាំកិច្ចប្រជុំ បូកសរុបសភាពការណ៍ និងលទ្ធផលកិច្ចប្រតិបត្តិការប្រចាំឆមាសទី ១ នឹងលើកទិសដៅការងារបន្ត ឆ្នាំ២០២៦ ដល់កងកម្លាំងចូលរួមចំនួន ២៨០ នាក់ នៅសាលប្រជុំស្នងការដ្ឋាននគរបាលខេត្ត ។
ជាកិច្ចចាប់ផ្តើម លោកឧត្តមសេនីយ៍ទោ ហេង សុផល
បានថ្លែងថា កិច្ចប្រជុំគឺដើម្បីត្រួតពិនិត្យលើពិនិត្យវឌ្ឍនភាពការងារ ដែលកងកម្លាំងអនុវត្តបាន នាពេលកន្លងមក និងលើកទិសដៅការងារសម្រាប់អនុវត្តបន្ត នាពេលខាងមុខ ។
ឆ្លៀតក្នុងឱកាសនោះ លោកឧត្តមសេនីយ៍ទោស្នងការ បានលើកឡើងអំពីសភាពការណ៍ ថ្មីៗ នៃការប្រព្រឹត្តទៅ របស់សង្គមជាតិ និងអន្តរជាតិ រយៈពេលកន្លងមក ជាពិសេសជម្លោះរវាងប្រទេសមហាអំណាច លើពិភពលោក និងជម្លោះព្រំដែន ដែលបង្ករដោយការឈ្លានពានរបស់កងទ័ពថៃ មកលើបូរណភាពទឹកដី នៃព្រះរាជាណាចក្រកម្ពុជា យើង ។
ដើម្បីធានាបាននូវសន្តិភាព នាពេលបច្ចុប្បន្ន និងអនាគត លោកឧត្តមស្នងការ មានប្រសាសន៍ បូកសរុប និងដាក់ចេញជាទិសដៅលើការងារចំនួន ០៨ ចំនុច ដល់កងកម្លាំងត្រូវអនុវត្តឱ្យទទួលបានប្រសិទ្ធភាព÷
១-បន្តពង្រឹងវិធានការជំនាញ និងការអនុវត្តច្បាប់ សំដៅ
បង្ការ ទប់ស្កាត់ បទល្មើសគ្រប់ប្រភេទ ធានារក្សាសន្តិសុខ សុវត្ថិភាព សណ្តាប់ធ្នាប់ ជូនសង្គមជាតិ និងប្រជាពលរដ្ឋ ។
២-ការងារសណ្តាប់ធ្នាប់សាធារណៈ .ចរាចរណ៍ផ្លូវគោក ត្រូវបង្កើនវិធានការផ្សព្វផ្សាយអប់រំ អំពីច្បាប់ចរាចរណ៍ គ្រប់ទម្រង់ រូបភាព ដល់មហាជនគ្រប់ស្រទាប់វណ្ណៈ តាមគ្រឹះស្ថាន សាលារៀន មជ្ឈមណ្ឌល រោងចក្រសហគ្រាស ដើម្បីលើកកម្ពស់ ការយល់ដឹង និងចូលរួមអនុវត្ត ឱ្យទទួលបានលទ្ធផលល្អប្រសើរ ,.ការងារសណ្តាប់ធ្នាប់ ត្រូវខិតខំរៀបចំសម្រួលសណ្តាប់ធ្នាប់តាមទីប្រជុំជន បញ្ចៀសការកកស្ទះចរាចរណ៍ ។
៣-ការងារអគ្គីភ័យ ត្រូវធ្វើសមយុទ្ធ ជាក់ស្តែងលើផែនទី (កំណត់ភូមិសាស្ត្រអាទិភាព ច្រកសង្គ្រោះ) រៀបចំ កម្លាំង មធ្យោបាយ ធ្វើការហ្វឹកហាត់ ត្រៀមអន្តរាគមន៍ និង សង្គ្រោះ ត្រូវផ្សព្វផ្សាយតាមរយៈវេទិកា (ភូមិ-ឃុំ-សង្កាត់ មានសុវត្ថិភាព) អំពីវិធានការបង្ការ ពន្លត់អគ្គិភ័យបឋមដោយប្រើប្រាស់ ឧបករណ៍បែបបុរាណ ឬសម័យ ហើយចូលរួម ជាចលនាជាមួយកម្លាំងពន្លត់អគ្គិភ័យស្ម័គ្រចិត្តនៅមូលដ្ឋាន ។
៤-ការងារគ្រប់គ្រងអាវុធគ្រឿងផ្ទុះ ត្រួតពិនិត្យធ្វើបច្ចុប្បន្នភាពអាវុធជាតិផ្ទុះ ចុះផ្សព្វផ្សាយតាមរយៈវេទិការសាធារណៈ(គោលនយោបាយ ភូមិ ឃុំ សង្កាត់ មានសុវត្ថិភាព) នូវច្បាប់ លិខិតបទដ្ឋាននានា ដែលពាក់ព័ន្ធការប្រើប្រាស់អាវុធខុសច្បាប់និង គ្រោះថ្នាក់ដោយសារយុទ្ធភ័ណ្ឌមិនទាន់ផ្ទុះនៅតាមមួលដ្ឋាន ។
៥-ការងារគាំទ្រ ដល់ប៉ុស្តិ៍នគរបាលរដ្ឋបាល ត្រូវបញ្ចុះកម្លាំងគាំទ្រប៉ុស្តិ៍បេសកកម្ម(វែង-ខ្លី) ការផ្ទេរ ការលើកកម្ពស់ សមត្ថភាពជំនាញ ប្តូរឥរិយាបថមន្ត្រីប៉ុស្តិ៍ ត្រូវជម្រុញការផ្តល់ សេវាតាមតម្រូវការចាំបាច់នានា ពង្រឹង ការគ្រប់គ្រងមនុស្ស មធ្យោបាយ អាវុធជាតិផ្ទុះ មុខរបរពិសេស (ពិសេស ការគ្រប់គ្រងវត្តមានជនបរទេសក្នុង មូលដ្ឋាន តាមរយៈលិខិតឆ្លងដែន ទិដ្ឋាការស្នាក់នៅ និងមុខរបរ)។
៦-ការងារអត្តសញ្ញាណកម្ម ជំរុញការងារគ្រប់គ្រងស្ថិតិប្រជាពលរដ្ឋ .ការផ្តល់សេវាសៀវភៅស្នាក់នៅ .សៀវភៅគ្រួសារ .ការផ្តល់អត្តសញ្ញាណបណ្ណ័ សញ្ជាតិខ្មែរ ទាំងផ្តល់ថ្មី និង ផ្តល់ទុតិយតា ជូនដល់ប្រជាពលរដ្ឋ ។
៧-ការងារអន្តោប្រវេសន៍ បន្តគ្រប់គ្រងជនបរទេសអន្តោប្រវេសន្តដែលបានស្នាក់នៅក្នុងភូមិសាស្ត្រខេត្ត និង រៀបចំផ្តល់សេវាស្របច្បាប់ បន្តត្រួតពិនិត្យលើជនបរទេសមកស្នាក់នៅខុសច្បាប់ ដើម្បីអនុវត្តតាមនីតិវិធី ។
៨-ការងារភស្ដុភា និងហិរញ្ញវត្ថុ បន្តលើការងារគ្រប់គ្រងទ្រព្យសម្បត្តិរដ្ឋបំពេញបែបបទបើកប្រាក់បៀវត្ស និងសម្ភារៈផ្សេងសម្រាប់បំរើការងារនៅក្នុងអង្គភាព ជូនដល់កងកម្លាំងនគរបាល ។
ជាកិច្ចចុងក្រោយលោកស្នងការ បានប្រគល់ម៉ាស៊ីនកុំព្យូទ័រ និងម៉ាស៊ីនព្រីនធ័រ ដែលជាអំណោយដ៏ថ្លៃថ្លារបស់ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដល់ការិយាល័យកិច្ចការប៉ុស្តិ៍នគរបាលរដ្ឋបាលចំនួន ០១ គ្រឿង និងអធិការដ្ឋាននគរបាលទាំង ០៩ក្រុង-ស្រុក ចំនួន ០១ គ្រឿង ព្រមទាំងសម្ភារៈការិយាល័យ និងអាវភ្លៀងមួយចំនួនទៀត ៕ អត្ថបទស្នងការដ្ឋាននគរបាលខេត្តកំពង់ធំ-ពិនិត្យដោយអ៊ុមញឹប។
