ឧត្តមសេនីយ៍ទោ សោម ស៊ុន ជួបយុទ្ធមិត្តធ្លាប់រួមអាវុធក្នុងសម័យសង្គ្រាមស៊ីវិលមានជំងឺជាទម្ងន់
(ខេត្តកំពង់ធំ)៖ លោកអនុសេនីយ៍ឯក ថុន ស៊ីធឿន ហៅមាំង អតីតប្រធានកងអនុសេនាធំស៊ើបការយោធាខេត្តកំពង់ធំ ក្នុងទសវត្សរ៍ឆ្នាំ៩០។ បច្ចុប្បន្នជាអតីតយុទ្ធជន រស់នៅក្នុងភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
លោក ថុន ស៊ីធឿន ធ្លាប់បានឆ្លងកាត់សមរភូមិជាច្រើនក្នុងសម័យសង្គ្រាមស៊ីវិល ក្នុងភារិច្ចការការពារទប់ស្កាត់មិនឱ្យរបបប្រល័យពូជសាសន៍ប៉ុលពត វិលត្រឡប់មកវិញបានហើយត្រូវបានរបួសពិការ នៅដេីមឆ្នាំ១៩៩៨ មុនការអនុវត្តនយោបាយឈ្នះ ឈ្នះ របស់សម្តេចតេជោ ហ៊ុន សែន ដែលបានបញ្ចប់សង្គ្រាមស៊ីវិលនៅចុងឆ្នាំ១៩៩៨ ។ បច្ចុប្បន្នថុន សុីធឿន មានជំងឺជាទម្ងន់ ត្រូវបានមន្ទីរពេទ្យបង្អែកខេត្ត ប្រគល់ជូនក្រុមគ្រួសារឲ្យវិលត្រឡប់មកកាន់លំនៅដ្ឋានវិញ
នៅព្រឹកថ្ងៃទី២១ ខែកុម្ភៈ ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ប្រធានសមាគមអតីតយុទ្ធជនកម្ពុជាខេត្តកំពង់ធំ បានដឹកនាំសហការីទៅពិនិត្យស្ថានភាពជាក់ស្ដែង និងបានស្ដាប់សំណូមពរជាលើកចុងក្រោយពីលោក ថុន ស៊ីធឿន សុំឲ្យជួយមើលការខុសត្រូវចំពោះក្រុមគ្រួសារគាត់ផង ស្របពេលដែលភរិយារបស់គាត់កំពុងមានជំងឺទឹកនោមផ្អែមរ៉ាំរ៉ៃប្រចាំកាយផងដែរ។
ឧត្តមសេនីយ៍ទោ សោម ស៊ុន បានណែនាំដល់ភរិយានិងក្រុមគ្រួសារលោក ថុន ស៊ីធឿន ត្រូវខិតខំថែរក្សាសុខភាពឱ្យបានល្អ នឹងត្រូវមើលថែលោក ថុន ស៊ីធឿន នៅក្នុងដំណាក់កាលនៃជីវិតចុងក្រោយឲ្យបានល្អប្រសើរ ហើយគណៈកម្មាធិការសមាគមអតីតយុទ្ធជនកម្ពុជា ខេត្តកំពង់ធំ សូមដឹងគុណជានិច្ចចំពោះវីរភាពរបស់លោកអនុសេនីយ៍ឯក ថុន ស៊ីធឿន ដែលធ្លាប់មានគុណបំណាច់ចំពោះជាតិនិងមាតុភូមិក្នុងសម័យសង្គ្រាម នាពេលកន្លងទៅ និងសន្យាជួយគាំទ្រ ព្រមទាំងទំនុកបម្រុងនូវរាល់ការខ្វះខាតក្នុងជីវភាពប្រចាំថ្ងៃដល់ក្រុមគ្រួសាររបស់គាត់ តាមលទ្ធភាពដែលអាចធ្វើទៅបាន ។
នៅក្នុងឱកាសនេះឧត្តមសេនីយ៍ទោ សោម ស៊ុន បានជួយឧបត្ថម្ភស្បៀងអាហារគ្រឿង ឧបភោគបរិភោគ និងថវិកាមួយចំនួន ដែលជាអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ជូនក្រុមគ្រួសារលោក ថុន ស៊ីធឿន ផងដែរ។ អត្ថបទតំបន់សឹករងកំពង់ធំ-ពិនិត្យនិងកែសម្រួលដោយអ៊ុមញឹប។
