មេបញ្ជាការតំបន់ប្រតិបត្តិការសឹករងកំពង់ធំ ផ្សព្វផ្សាយសភាពការណ៍ថ្មីៗ និងពង្រឹងតួនាទីភារកិច្ចរបស់កងយោធពលខេមរភូមិន្ទ ដេីម្បីការពារជាតិ សាសនា និងព្រះមហាក្សត្រ
(ខេត្តកំពង់ធំ)៖ នៅព្រឹកថ្ងៃទី២៣ ខែមិថុនា ឆ្នាំ ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំកិច្ចប្រជុំ ផ្សព្វផ្សាយសភាពការណ៍ថ្មីៗ ដែលកើតមានឡើងនៅលើឆាកអន្តរជាតិ ។ ការកេីតឡេីងនូវសង្គ្រាមរវាងអ៉ីស្រាអែល និងអ៉ីរ៉ង់ ដោយមានការគាំទ្រពីសហរដ្ឋអាមេរិក ចូលជួយអ៉ីស្រាអែលក្នុងការវាយប្រហារអ៉ីរ៉ង់ ។ ព្រមជាមួយនេះ ក៍បានបញ្ជាក់ជូនអំពីស្ថានការណ៍ ទូទៅរវាងកម្ពុជានិងថៃ និងសភាពការណ៍តាមខ្សែបន្ទាត់ព្រំដែន ដែលកងយោធពលខេមរភូមិន្ទយើងកំពុងឈរជេីងយ៉ាងរឹងមាំ ក្នុងការការពារបូរណភាពទឹកដី និងការឆ្លើយតប យ៉ាងមុឺងម៉ាត់ប្រកបដោយស្មារតីទទួលខុសត្រូវខ្ពស់របស់ប្រមុខរាជរដ្ឋាភិបាលនៃព្រះរាជាណាចក្រកម្ពុជា ក្នងការបិទច្រកព្រំដែននៅតំបន់មួយចំនួន ព្រមទាំងការឆ្លើយតបក្នុងការបិទការនាំចូលប្រេងឥន្ធនៈ និងឧស្ម័នគ្រប់ប្រភេទទាំងស្រុងពីប្រទេសថៃចូលក្នុងប្រទេសកម្ពុជា ។
ឧត្តមសេនីយ៍ទោ សោម ស៊ុន ក៏បានផ្សព្វផ្សាយពីស្មារតីស្នេហាជាតិរបស់ប្រជាជនកម្ពុជានៅគ្រប់ទិសទី គ្រប់ស្រទាប់វណ្ណៈ និងគ្រប់គណបក្សនយោបាយ ក្នុងការគាំទ្រប្រមុខរាជរដ្ឋាភិបាល ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការចាត់វិធានការណ៍យ៉ាងមុឺងម៉ាត់ក្នុងវិស័យការពារជាតិ ការពារបូណភាពទឹកដី និងការដាក់ពាក្យបណ្ដឹងទៅតុលាការយុត្តិធម៌អន្តរជាតិ អាយសុីជេ ដេីម្បីដោះស្រាយតំបន់ប្រសាទតាមាន់តូច ប្រាសាទតាមាន់ធំ ប្រសាទតាក្របី និងតំបន់មុំបី ដេីម្បីបញ្ចប់ជម្លោះ រវាងភាគីកម្ពុជា និងភាគីថៃហេីយកម្ពុជាត្រៀមទទួលយកនូវការកាត់ក្ដីរបស់តុលាការយុត្តិធម៌អន្តរជាតិទាំងស្រុង ។
ឧត្តមសេនីយ៍ទោ សោម ស៊ុន បានប្រគល់ភារកិច្ចសំខាន់ៗមួយចំនួន ជូនដល់កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ទីមួយ ត្រូវត្រៀមខ្លួនរួចជាស្រេច រួមជាមួយគ្រឿងបំពាក់ មធ្យោបាយនានា តាមបទបញ្ជារបស់ប្រមុខរាជរដ្ឋាភិបាល និងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ក្នុងភារកិច្ចការពារជាតិ ការពារបូរណភាពទឹកដី ។ ទីពីរ ត្រូវត្រៀមបម្រុងកងកម្លាំង ដើម្បីជួយសង្គ្រោះប្រជាពលរដ្ឋ ដែលរងគ្រោះដោយគ្រោះទឹកជំនន់ ។ និងទីបី ចូលរួមជាមួយអាជ្ញាធរដែនដី គ្រប់លំដាប់ថ្នាក់ ក្នុងសកម្មភាពនានាជួយដល់សង្គមជាតិ បម្រើប្រជាជន និងបម្រើបងប្អូនអតីតយុទ្ធជន ដែលធ្លាប់មានគុណបំណាច់ចំពោះជាតិ និងមាតុភូមិ ។
នាយទាហាន នាយទាហានរង និងពលទាហាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានប្តេជ្ញាចិត្តដាច់ខាត គោរពប្រតិបត្តិយ៉ាងម៉ឺងម៉ាត់ តាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់ នៃកងយោធពលខេមរភូមិន្ទ និងបទបញ្ជារបស់មេបញ្ជាការតំបន់ប្រតិបត្តិការសឹករងកំពង់ធំ ឲ្យទទួលបានជោគជ័យ និងមានប្រសិទ្ធភាពខ្ពស់។ អត្ថបទតំបន់សឹករងកំពង់ធំ.ពីនិត្យដោយអ៊ុមញឹប។
