អនុរដ្ឋលេខាធិការក្រសួងព័ត៌មាន បានដាក់គោលការណ៍៤ចំណុច ដើម្បីឱ្យមន្ទីរព័ត៌មានខេត្តកំពង់ធំនិងមន្ត្រីមានការរីកចម្រើនក្នុងវិស័យព័ត៌មាន

(កំពង់ធំ)÷ ឯកឧត្តម អ៊ុីវ ផល្លី អនុរដ្ឋលេខាធិការក្រសួងព័ត៌មាន តំណាងដ៏ខ្ពង់ខ្ពស់ឯកឧត្តម នេត្រ ភត្រ្តា រដ្ឋមន្ត្រីក្រសួងព័ត៌មាន បានជួបសំណេះសំណាលជាមួយមន្ត្រីរាជការ នៃមន្ទីរព័ត៌មានខេត្តកំពង់ធំ និងដាក់គោលការណ៍៤ចំណុច ដើម្បីឱ្យមន្ទីរព័ត៌មានខេត្តកំពង់ធំនិងមន្ត្រីមានការរីកចម្រើនក្នុងវិស័យព័ត៌មាន នៅព្រឹកថ្ងៃទី២៧ ខែវិច្ឆិកា ឆ្នាំ២០២៥ សាលប្រជុំមន្ទីរព័ត៌មានខេត្តកំពង់ធំ។

ពិធីសំណេះសំណាងជាមួយមន្ត្រីរាជការនេះផងដែរឯកឧត្តម អ៊ុីវ ផល្លី បានលើកយកគោលការណ៍៤ចំណុចសំខាន់ៗមួយចំនួនដែលជាការណែនាំរបស់ឯកឧត្តមរដ្ឋមន្ត្រី ក្រសួងព័ត៌មានគឺ៖ ១-ការរៀបចំសន្និបាតបូកសរុបលទ្ធផលការងាររបស់មន្ទីរ ឆ្នាំ២០២៥ និងលើកទិសដៅសម្រាប់ឆ្នាំ២០២៦ ក្នុងនោះត្រូវដាក់បញ្ចូលទាំងការអភិវឌ្ឍរបស់មន្ទីរផងដែរ។ ២- តួនាទីដឹកនាំ គ្រប់គ្រងវិស័យព័ត៌មាន និងសោតទស្សន៍ ដែលជាការងារស្នូល តែឥឡូវយើងមានតួនាទីស្នូលមួយទៀត គឺកិច្ចការសាធារណមតិ ដែលកំពុងដើរតួយ៉ាងសំខាន់។ ៣- ជំរុញនិងគាំទ្រការអភិវឌ្ឍធនធានមនុស្ស។ ៤-កិច្ចការសាធារណមតិ។

ឯកឧត្តមអនុរដ្ឋលេខាធិការក្រសួងព័ត៌មាន បានគូសបញ្ជាក់ថា ការផលិតព័ត៌មាន ត្រូវមានគុណភាព ទាំងខ្លឹមសារ និងរូបភាពល្អ ទាក់ទាញ ចំណាប់អារម្មណ៍ (លឿន ត្រូវបានផ្ទៀងផ្ទាត់មុនការផ្សាយ)។ ការផលិតបទយកការណ៍ ត្រូវផ្តោតសំខាន់លើសក្តានុពលរបស់ខេត្ត និងនៅតាមមូលដ្ឋាន ដើម្បីទាក់ទាញឱ្យបងប្អូនជាពលរដ្ឋ និងមហាជនចាប់អារម្មណ៍។ ចំពោះក្រុមសាធារណៈមតិ ត្រូវតែយកចិត្តទុកដាក់តាមដានរាល់ព័ត៌មានផ្សេងៗដែលគេវាយប្រហារនៅក្នុងខេត្ត មន្ទីរអង្គភាព ក្រុងស្រុក ត្រូវតែចុះទៅដល់គោលដៅ និងបំភ្លឺជូនសាធារណៈជនឱ្យបានទាន់ពេលវេលា។ មន្រ្តីដែលត្រូវចុះយកព័ត៌មាន ត្រូវតែមានភាពរឹងមាំ ក្នុងការសរសេរអត្ថបទ រូបភាព និងវីដេអូ ឱ្យបានលឿនបំផុត ដើម្បីធ្វើការចេញផ្សាយឱ្យបានលឿនជូនដល់បងប្អូនប្រជាពលរដ្ឋ។

ជាចុងក្រោយឯកឧត្តមអ៊ុីវ ផល្លី អនុរដ្ឋលេខាធិការក្រសួងព័ត៌មាន បានសង្កត់ធ្ងន់ចំពោះការប្រឆាំងនឹងព័ត៌មានក្លែងក្លាយគ្រប់ទម្រង់ ដើម្បីធានាបាននូវសន្តិសុខ ព័ត៌មាន ជាដំណើរការ ការការពារសង្គម ពីព័ត៌មានមិនពិត មិនត្រឹមត្រូវ ឬចេតនាបំពាន ប៉ុន្តែដើម្បីប្រឆាំងព័ត៌មានក្លែងក្លាយមានប្រសិទ្ធភាព ត្រូវទាមទារការចូលរួមពីប្រជាពលរដ្ឋពីគ្រប់មជ្ឈដ្ឋានដោយមានការអប់រំដល់ប្រជាពលរដ្ឋអំពីការវាយតម្លៃព័ត៌មាន
ការផ្តល់ព័ត៌មានត្រឹមត្រូវ និងឆាប់រហ័ស ការចូលរួមពីអ្នកបង្កើតមាតិការ ព័ត៌មានក្លែងក្លាយវាបង្កផលលំបាកដល់ប្រជាពលរដ្ឋ និងសង្គម ប្រជាពលរដ្ឋជួបការលំបាក ក្នុងការបែងចែកព័ត៌មានពិត និងព័ត៌មានក្លែងក្លាយ ជំរុញនិងគាំទ្រការការអភិវឌ្ឍធនធានមនុស្ស ក្នុងវិស័យព័ត៌មាននិងសោទស្សន៍ តាម រយៈរៀបចំការបណ្តុះបណ្តាល និងធ្វើវិក្រិតការជាប្រចាំលើលើមុខជំនាញវិជ្ជាជីវៈ។ អត្ថបទលោក ធូ កែមុន្នី.ពិនិត្យដោយអ៊ុមញឹប។