លោកឧត្តមសេនីយ៍ទោ ហេង សុផល ប្រកាសផ្ដល់ពាក្យ ដល់បេក្ខជន បេក្ខនារី  ដែលចូលរួមប្រឡងជ្រើសរើសក្របខ័ណ្ឌមន្រ្តីនគរបាលជាតិ នៃស្នងការដ្ឋាននគរបាលខេត្តកំពង់ធំ

ថ្ងៃទី ២០ ខែ តុលា ឆ្នាំ២០២៥ លោកឧត្តមសេនីយ៍ទោ ហេង សុផល ប្រធានអនុគណ:កម្មការ និងជាស្នងការនគរបាលខេត្តកំពង់ធំ បានដឹកនាំក្រុមការងារផ្តល់ពាក្យ ដល់បេក្ខជន បេក្ខនារី  ដែលចូលរួមប្រឡងជ្រើសរើសក្របខ័ណ្ឌមន្រ្តីនគរបាលជាតិ នៃស្នងការដ្ឋាននគរបាលខេត្តកំពង់ធំ ។

លោកឧត្តមសេនីយ៍ទោ ហេង សុផល ប្រធានអនុគណ:កម្មការ មានប្រសាសន៍ សំណេះសំណាលជាមួយបេក្ខជន-បេក្ខនារី ដែលចូលរួមប្រឡងប្រជែងជ្រើសរើសក្របខ័ណ្ឌមន្រ្តីនគរបាលជាតិ នៃស្នងការដ្ឋាននគរបាលខេត្តកំពង់ធំ នាឱកាសនេះ ត្រូវមានរបៀបរៀបរយ រក្សាសណ្តាប់ធ្នាប់ល្អ ព្រមទាំងយកចិត្តទុកដាក់ស្ដាប់ការណែនាំ របស់ក្រុមការងារប្រឡងជ្រើសរើស ។

លោកប្រធានអនុគណ:កម្មការ បានគូសបញ្ជាក់ពីលក្ខខណ្ឌ នៃការជ្រើសរើសក្របខ័ណ្ឌមន្រ្តីនគរបាលជាតិ នៃស្នងការដ្ឋាននគរបាលខេត្តកំពង់ធំ ដល់ប្អូនៗ រួមមានៈ

ទី១-បេក្ខជនទាំងពីរភេទ ត្រូវមានសញ្ជាតិខ្មែរ ។

ទី២-មានទីលំនៅអចិន្ត្រៃយ៍ ក្នុងភូមិសាស្ត្រឃុំ-សង្កាត់ និងឃុំ-សង្កាត់ដែលជាប់ព្រំប្រទល់ ។

ទី៣-ត្រូវមានជីវប្រវត្តិច្បាស់លាស់ មានអប្បកិរិយាមារយាទល្អ ពុំធ្លាប់មានពិរុទ្ធភាពកន្លង ។

ទី៤-មានកាយសម្បទាគ្រប់គ្រាន់ និងមានសុខភាពល្អ( ឆ្លងកាត់ការត្រួតពិនិត្យភ្នែក ត្រចៀក ច្រមុះ មាត់ បេះដូង ថ្លើម សួត ជំងឺរបេង អេដស៍ គ្រុនឈាម និងតេស្តស្វែងរកសារធាតុញៀន) ។

ទី៥- មិនមានស្លាកស្នាមរបួស ឬស្លាកស្នាមសាក់។

ទី៦-បុរសមានកម្ពស់ ១,៧០ ម៉ែត្រឡើង នារីមានកម្ពស់ ១,៦៥ ម៉ែត្រឡើង និងទម្ងន់សមាមាត្រនឹងកម្ពស់ ។

ទី៧-មានសញ្ញាបត្រមធ្យមសិក្សាទុតិយភូមិ ឬសញ្ញាបត្រដែលមានតម្លៃស្មើនិងមានអាយុពី ១៨ ឆ្នាំ ដល់២៥ ឆ្នាំ គិតត្រឹមថ្ងៃប្រឡង ។

ទី៨-មានសញ្ញាបត្របរិញ្ញាបត្រ ឬបរិញ្ញាបត្ររងដែលមានតម្លៃស្មើ និងមានអាយុយ៉ាងច្រើនត្រឹម ៣០ឆ្នាំ គិតត្រឹមថ្ងៃប្រឡង ។

ជាកិច្ចចុងក្រោយ លោកស្នងការ  ប្រកាសបើកការផ្ដល់ពាក្យ ចាប់ផ្តើមពីព្រឹកថ្ងៃទី ២០ ដល់ថ្ងៃទី ២៤ ខែ តុលា ឆ្នាំ២០២៥ និងទទួលពាក្យថ្ងៃទី ២៧ ដល់ថ្ងៃទី ៣១ ខែតុលា ឆ្នាំ២០២៥ នៅការិយាល័យបុគ្គលិក នៃស្នងការដ្ឋាននគរបាលខេត្តកំពង់ធំ ៕អត្ថបទស្នងការដ្ឋាននគរបាលខេត្តកំពង់ធំ -ពិនិត្យនិងកែសម្រួលដោយអ៊ុមញឹប។