ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ចាត់តាំងកម្លាំងដឹកជញ្ជួនគ្រឿងឈេី និងសម្ភារៈសំណង់ ដេីម្បីសាងសង់ជម្រកស្នាក់នៅ ជូនគ្រួសារវិរៈយុទ្ធជនកងការពារព្រំដែនកម្ពុជា ថៃ ដែលគ្មានផ្ទះស្នាក់នៅ នៅស្រុកកំពង់ស្វាយ ខេត្តកំពង់ធំ
ខេត្តកំពង់ធំ៖ នៅព្រឹកថ្ងៃទី១២ ខែតុលា ឆ្នាំ២០២៥ ឧត្ដមសេនីយ៍ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ បានចាត់តាំងកម្លាំង ដឹកជញ្ជូនគ្រឿងឈេី និងសម្ភារៈសំណង់ សម្រាប់សាងសង់ជម្រកស្នាក់នៅបណ្តោះអាសន្ន ជូនគ្រួសារវិរៈយុទ្ធជន គ្មានផ្ទះស្នាក់នៅ ភូមិកប់ថ្លុក ឃុំដំរីស្លាប់ ស្រុកកំពង់ស្វាយ ខេត្តកំពង់ធំ ដែលស្វាមីរបស់គាត់កំពុងជាប់ដៃ ក្នុងភារកិច្ចការពារបូរណភាពទឹកដី នៅតំបន់ព្រំដែនកម្ពុជាថៃ ទិសយោធភូមិភាគទី ៤។
ឧត្ដមសេនីយ៍ទោ សោម ស៊ុន បានបញ្ជាក់ថា លោកស្រី កាន ឡឹង មានអាយុ ៣៥ ឆ្នាំ មានកូនតូចៗនៅក្នុងបន្ទុកចំនួន ៦ នាក់ ហើយកន្លងមកបានទៅរស់នៅក្នុងអង្គភាពកងការពារព្រំដែនកម្ពុជា ថៃ លេខ ៤០៣ ជាមួយស្វាមី រហូតដល់ថ្ងៃសៀមឈ្លានពានទឹកដីកម្ពុជា នៅតំបន់មុំបី ទេីបស្វាមីគាត់បានឲ្យគាត់មករស់ជាមួយបងប្អូននៅស្រុកកំណើតវិញ ដោយមានកូនប្រុសទេីបតែបានអាយុ ៣ ថ្ងៃប៉ុណ្ណោះ តែពេលមកដល់ភូមិកំណើត គាត់មិនមានផ្ទះស្នាក់នៅទេ ដោយសុំផ្ទះបងប្អូនស្នាក់នៅបណ្តោះអាសន្ន ។
ឧត្ដមសេនីយ៍ទោ សោម ស៊ុន ក៏បានបញ្ជាក់បន្ថែមទៀតថា ដោយទទួលបានពត៌មានពីការលំបាកខ្វះខាតនេះ បានខិតខំប្រឹងប្រែងរកសប្បុរសជន និងរៀបចំស័ង្កសីដែលជាអំណោយរបស់សម្តេចមហាបវរធិបតីហ៊ុន ម៉ាណែត និងលោកជំទាវ ដេីម្បីទៅរៀបចំសាងសង់ជម្រកស្នាក់នៅបណ្តោះអាសន្នជូនគ្រួសារលោកស្រី កាន ឡឹង ឲ្យបានរួចរាល់នៅពេលដ៏ខ្លីខាងមុខនេះ ។
ហើយឧត្ដមសេនីយ៍ទោ សោម ស៊ុន ក៏បានថ្លែងអំណរគុណដ៏ជ្រាលជ្រៅជាទីបំផុតចំពោះបងប្អូនលោកស្រីកានឡឹង និងអាជ្ញាធរដែនដីដែលបានផ្ដល់ដីធ្លី ជូនគ្រួសារលោកស្រី កាន ឡឹង សាងសង់ជម្រកស្នាក់នៅបណ្តោះ អាសន្ននៅពេលនេះ និងសូមគោរពជូនពរលោក លោកស្រីទាំងអស់គ្នាសូមទទួលបាននូវពុទ្ធពរទាំងបួនប្រការកុំបីឃ្លៀងឃ្លាតឡើយ ។រូបភាពតំបន់ប្រតិបត្តិការសិករងកំពង់ធំ-ពិនិត្យដោយអ៊ុមញឹប។
