ឯកឧត្តម ទ្រី ដាលុច ស្ពានថ្នល់គឺជាសរសៃឈាមនិងដង្ហើមសេដ្ឋកិច្ចដ៏មានសារៈសំខាន់បំផុតរបស់បងប្អូនប្រជាពលរដ្ឋកម្ពុជា ក្នុងការប្រកបមុខរបរចិញ្ចឹមជីវិត
(កំពង់ធំ)៖ ឯកឧត្តម ទ្រី ដាលុច តំណាងដ៏ខ្ពង់ខ្ពស់ លោកអ្នកឧកញ៉ា បណ្ឌិត ទ្រី ភាព ប្រធានក្រុមការងារយុវជនចុះមូលដ្ឋានស្រុកប្រាសាទបល្ល័ង្ក បានអញ្ជើញជាអធិបតីភាពក្នុងពិធីបញ្ចុះបឋមសិលាសាងសង់ស្ពានដែកបាឡេឆ្លងស្ទឹងស្ទោងមួយខ្សែ ដែលស្ថិតនៅក្នុងភូមិគេន្ទាក ឃុំសាគ្រាម ស្រុកប្រាសាទបល្ល័ង្ក ខេត្តកំពង់ធំ នាថ្ងៃទី២៧ ខែមិថុនា ឆ្នាំ២០២៦។ ស្ពាននេះមានបណ្ដោយ១១៣ម៉ែត្រ ទទឹង៦ម៉ែត្រ ដែលអាចទ្រទម្ងន់បាន ២៥តោន គ្រោងចំណាយថវិកាអស់២២០,០០០ដុល្លារសហរដ្ឋអាមេរិក។
លោក គង់ សំអាត អភិបាលស្រុកប្រាសាទបល្ល័ង្ក បានមានប្រសាសន៍ថា ក្រោមការយកចិត្តទុកដាក់ដ៏ខ្ពង់ខ្ពស់ពីសំណាក់ សម្តេចមហាបវរធិបតី ហ៊ុន ម៉ាណែត និងលោកជំទាវ បណ្ឌិត ពេជ ចន្ទមុន្នី តាមរយ: លោកអ្នកឧកញ៉ា បណ្ឌិត ទ្រី ភាព បានសាងសង់ស្ពានបាឡេឆ្លងស្ទឹងមួយកន្លែង ដើម្បីឱ្យមានភាពងាយស្រួលក្នុងការធ្វើដំណើរ ក៏ដូចជាការដឹកជញ្ជូនកសិផលរបស់បងប្អូនប្រជាពលរដ្ឋក្នុងឃុំ និងក្រៅឃុំ ពិសេសជួយសម្រួលការធ្វើដំណើរដល់បងប្អូនប្រជាពលរដ្ឋ សិស្សានុសិស្ស កុមារាកុមារី ទៅសាលារៀន លោកយាយលោកតាទៅកាន់ទីវត្តអារាម។
លើសពីនេះ លោកអភិបាលបានបន្តថាហេដ្ឋារចនាសម្ព័ន្ធផ្លូវស្ពានថ្នល់ទាំងអស់គឺជាសរសៃឈាមដ៏មានសារៈសំខាន់បំផុត សម្រាប់បម្រើឱ្យសេដ្ឋកិច្ចក្នុងស្រុកនិងក្រៅស្រុកលើគ្រប់វិស័យ និងក៏ជាបេះដូងនៃចរន្តសេដ្ឋកិច្ចរបស់បងប្អូនប្រជាពលរដ្ឋដែលបានធ្វើដំណើរឆ្លងកាត់ លើសពីនេះសម្រាប់ដឹកកសិផលទៅកាន់ទីផ្សារបានកាន់តែលឿននិងឆាប់រហ័ស។ ការសាងសង់ហេដ្ឋារចនាសម្ព័ន្ធ ប្រព័ន្ធធារសាស្ត្របាននឹងកំពុងកើតឡើងនៅតាមបណ្ដាឃុំនីមួយៗទូទាំងស្រុកប្រាសាទបល្ល័ង្ក ក្រោមការឧបត្ថម្ភ និងគាំទ្រ ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈលោកអ្នកឧកញ៉ា បណ្ឌិតទ្រី ភាព ជាបន្តបន្ទាប់ប្រមុខរាជរដ្ឋាភិបាលក៏មានគម្រោងជាច្រើនទៀត ដើម្បីសាងសង់នូវហេដ្ឋារចនាសម្ព័ន្ធស្ពានថ្នល់ ប្រព័ន្ធធារសាស្ត្រ ដាក់អំពូលសូឡាបំភ្លឺនៅតាមដងផ្លូវក្នុងស្រុកប្រាសាទបល្ល័ង្ក ឱ្យកាន់តែច្រើនបន្ថែមទៀតផងដែរ។
ឯកឧត្តម ទ្រី ដាលុច បានគូសបញ្ជាក់ ផ្លូវ ស្ពាន គឺជាសរសៃឈាមនៃដង្ហើមសេដ្ឋកិច្ចជាតិ និងជាអាទិភាពគន្លឹះទី២ ក្នុងចំណោមអាទិភាពគន្លឹះទាំង៥ “មនុស្ស ផ្លូវ ទឹក ភ្លើង និងបច្ចេកវិទ្យា” នៃយុទ្ធសាស្ត្របញ្ចកោណ ដំណាក់កាលទី១ ។ ក្នុងនោះដែរ នៅក្នុងបញ្ចកោណទី២ គឺ “ការធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែង” បានផ្តោតលើកិច្ចការអាទិភាពចំនួន៥ ហើយកិច្ចការអាទិភាពទី២ គឺការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន ដែលមានគោលដៅជាយុទ្ធសាស្ត្រ ក្នុងការបន្តកសាង និងពង្រឹងមូលដ្ឋាន និងតំបន់ដាច់ស្រយាល សម្រាប់បង្កើនផលិតភាព, លើកកម្ពស់ភាពប្រកួតប្រជែង និងជំរុញការរស់នៅរបស់បងប្អូនប្រជាពលរដ្ឋឲ្យកាន់តែមានភាពល្អប្រសើរ ប្រកបដោយជីវភាពធូរធារ តាមរយៈ ការបង្កើនប្រសិទ្ធភាពហេដ្ឋារចនាសម្ព័ន្ធគាំទ្រ ការកសាង និងការអភិវឌ្ឍហេដ្ឋារចនាសម្ព័ន្ធថ្មីៗ។
លើសពីនេះទៀតឯកឧត្តម ទ្រី ដាលុច បានសំណូមពរដល់អ្នកប្រើប្រាសផ្លូវ ស្ពានទាំងអស់ សូមចូលរួមថែរក្សាផ្លូវថ្នល់ ស្ពាននេះ ឲ្យបានគង់វង្ស យូរអង្វែង ដោយមិនត្រូវដឹកជញ្ជូនទំនិញលើសទម្ងន់លើផ្លូវថ្នល់និង ស្ពាន ដែលធ្វើឱ្យស្រុតផ្លូវថ្នល់ ឬបែកលូកាត់ទទឹងផ្លូវ ឬបាក់ស្ពាន។
ឆ្លៀតក្នុងឱកាសនេះ ឯកឧត្តម ទ្រី ដាលុច ក៏បាននាំយកនូវអំណោយដ៏ថ្លៃថ្លារបស់លោកអ្នកឧកញ៉ាបណ្ឌិត ទ្រី ភាព មកចែកជូនដល់ ស្រុក ឃុំ កងកម្លាំងប្រដាប់អាវុធ និងលោកយាយជីលោកតាជីជាង ១០០ នាក់ ដែលបានអញ្ជើញចូលរួមក្នុងកម្មវិធីនេះ ដោយចំណាយថវិកាអស់ប្រមាណ ៣០,០០០,០០០ រៀល។ អត្ថបទ រដ្ឋបាលស្រុកប្រាសាទបល្ល័ង្ក-ពិនិត្យដោយដោយអ៊ុមញឹប។
