ប្រធានមន្ទីរកិច្ចការនារីខេត្តកំពង់ធំ ជំរុញឱ្យក្រុមការងារយេនឌ័រមន្ទីរអង្គភាព និងក្រុង ស្រុក ផ្សព្វផ្សាយដល់ស្ត្រីចូលរួមការងារសង្គមឱ្យបានច្រើន ដើម្បីទទួលបានបទពិសោធន៍ និងចំណេះដឹង

(កំពង់ធំ)៖ លោកស្រី ស៊ិន ស៊ីផាន ប្រធានមន្ទីរកិច្ចការនារីខេត្តកំពង់ធំ ជំរុញឱ្យក្រុមការងារយេនឌ័រមន្ទីរអង្គភាព និងក្រុង ស្រុក ផ្សព្វផ្សាយដល់ស្ត្រីចូលរួមការងារសង្គមឱ្យបានច្រើន ដើម្បីទទួលបានបទពិសោធន៍ និងចំណេះដឹង ក្នុងកិច្ចប្រជុំប្រចាំឆមាសទី១ ឆ្នាំ២០២៥ ជាមួយក្រុមការងារយេនឌ័រតាមមន្ទីរ អង្គភាពជុំវិញខេត្ត, អង្គការពាក់ព័ន្ធក្នុងខេត្ត និងការិយាល័យសង្គមកិច្ច និងសុខមាលភាពសង្គម ក្រុង ស្រុក ទាំង៩ នៅសាលប្រជុំមន្ទីរកិច្ចការនារី ថ្ងៃទី១៦ ខែមិថុនា ឆ្នាំ២០២៥។

នៅក្នុងឱកាសនោះ លោកស្រី ស៊ិន ស៊ីផាន បានមានប្រសាសន៍ថា កិច្ចប្រជុំប្រចាំឆមាសទី១ ដែលរៀបចំនាពេលនេះ ពិតជាមានសារៈសំខាន់ណាស់ដល់ស្ថាប័ន អង្គភាពពាក់ព័ន្ធ ដើម្បីមានឱកាស ក្នុងការរាយការណ៍ដល់ថ្នាក់ដឹកនាំ អំពីវឌ្ឍនភាព បញ្ហាប្រឈម ដំណោះស្រាយ និងផែនការបន្តរបស់ខ្លួន ដើម្បីជាមូលដ្ឋានក្នុងការពង្រឹង តាមរយៈការផ្សព្វផ្សាយ និងជួយគាំទ្រដល់ផ្នែកតម្រូវការប្រជាពលរដ្ឋ ឱ្យយល់ច្បាស់ និងចូលរួមក្នុងកិច្ចការងារនេះ។

លោកស្រីបានបន្ថែនថា ការផ្តល់ឱកាស និងការជំរុញភាពអង់អាចដល់ស្ត្រី ដើម្បីធ្វើឱ្យប្រសើរឡើងនូវ សិទ្ធិ ឋានៈ តួនាទី និងជីវភាពរស់នៅរបស់មន្ត្រីរាជការជានារី នៅក្នុងអង្គភាពរបស់ខ្លួន។ និងបន្តលើកកម្ពស់សមធម៌យេនឌ័រ ក្នុងការបណ្តុះបណ្តាលបំពាក់បំប៉នជំនាញបច្ចេកទេស ដើម្បីបង្កើនសមត្ថភាពរបស់ស្ត្រីក្នុងការផ្តល់ឱកាសដល់ស្ត្រី និងកូនស្រីឱ្យទទួលបាននូវចំណេះដឹង ជំនាញបច្ចេកទេសថ្មីៗបន្ថែមទៀត ព្រមទាំងបង្កើនការចូលរួមរបស់ស្ត្រីឱ្យបានកាន់តែច្រើនឡើង តាមរយៈការលើកកម្ពស់សិទ្ធិ និងឋានៈ របស់ស្ដ្រី គ្រប់ថ្នាក់ ដើម្បីឱ្យស្ត្រីបានចូលរួមកាន់តែសកម្មក្នុងការធ្វើសេចក្តីសម្រេចនានា។

ជាចុងក្រោយលោកស្រីបាន បានស្នើដល់ អស់លោក លោកស្រី ដែលមានវត្តមាននាពេលនេះ ចូលរួមឱ្យបានផុសផុលដើម្បីឱ្យកិច្ចប្រជុំទទួលបានលទ្ធផលផ្លែផ្កា ព្រមទាំងជំរុញដល់ក្រុមការងារយេនឌ័រតាមមន្ទីរ អង្គភាពជុំវិញខេត្ត អង្គការពាក់ព័ន្ធក្នុងខេត្ត និងការិយាល័យសង្គមកិច្ច និងសុខមាលភាពសង្គម ក្រុង ស្រុក ទាំង៩ សូមជួយផ្សព្វផ្យាយនៅអង្គភាពរៀងៗខ្លួន និងក្នុងសហគមន៍ ដើម្បីឱ្យពួកគាត់បានយល់ដឹងនូវចំណុចសំខាន់ៗក្នុងការលើកកម្ពស់សមភាពយេនឌ័រ ក្នុងការចូលរួមអភិវឌ្ឍន៏សេដ្ឋកិច្ច និងសង្គមជាតិយើងអោយកាន់តែរីកចម្រើនថែមទៀត៕ អត្តបទដោយ សូរហ៊ាន សំអាង-ពិនិត្យដោយអ៊ុមញឹប។