ផ្ទះមួយខ្នងរបស់លោកពលបានឯក ឡាំ សុខុម នាយទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រូវបានខ្យល់កន្ត្រាក់កួចបក់បោក បណ្ដាលឲ្យខូចខាតទាំងស្រុង
ខេត្តកំពង់ធំ៖ នៅរសៀលថ្ងៃទី ៩ ខែមិថុនា ឆ្នាំ២០២៦ ភ្លៀងមួយមេ និងខ្យល់កន្ត្រាក់ បានគួចបក់បោកធ្វើឲ្យប៉ើងដំបូលផ្ទះមួយខ្នងទំហំ ៩ម៉ែត្រ គុណនឹង ១៣ម៉ែត្រ សាងសង់ពីឈើ ជញ្ជាំងនិងដំបូលប្រក់ស័ង្កសី នៅភូមិអូររំដេង ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ របស់លោកពលបាលឯក ឡាំ សុខុម នាយទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ បណ្ដាលឱ្យខូចខាតទាំងស្រុង។
ដោយទទួលបានព័ត៌មាននេះ នៅព្រឹកថ្ងៃទី ១០ ខែមិថុនា ឆ្នាំ ២០២៦ ឧត្តមសេនីយ៍ទោ សោម ស៊ុន បានដឹកនាំសហការី នាំយកស័ង្កសី គ្រឿងឈើ ស្បៀងអាហារ គ្រឿងឧបភោគបរិភោគ និងថវិកាមួយចំនួន ដើម្បីដំណើរការជួសជុលជម្រកស្នាក់នៅបណ្ដុះអាសន្ន ជូនលោកពលបាលឯក ឡាំសុខុម ដែលមានភរិយានិងកូនតូចៗចំនួន ២នាក់ នៅក្នុងបន្ទុក ។
លោកពលបាលឯក ឡាំ សុខុម បានបញ្ជាក់ថា៖ នៅវេលារសៀល ម៉ោងប្រមាណជា ៤ និង ៣០នាទី ថ្ងៃទី ៩ ខែមិថុនា ឆ្នាំ២០២៦ ម្សិលមិញនេះមានភ្លៀងមួយមេ និងខ្យល់កន្ត្រាក់បានគួចបោកបក់យ៉ាងខ្លាំង សំដៅផ្ទះគាត់ ដែលពេលនោះ គាត់និងភរិយា រួមជាមួយនិងកូនតូចៗចំនួន ២នាក់ កំពុងស្នាក់នៅក្នុងផ្ទះនេះ ។ ហើយពេលនោះខ្យល់កន្ទ្រាក់បានគួចប៉ើងដំបូលផ្ទះគាត់របើកទាំងអស់ចេញទៅខាងក្រៅផ្ទះ បណ្ដាលឱ្យគាត់និងក្រុមគ្រួសារ មានការភ័យខ្លាចយ៉ាងខ្លាំង ព្រមជាមួយនោះដែររួមជាមួយទ្រព្យសម្បត្តិ សម្ភារៈប្រើប្រាស់ទាំងអស់ ត្រូវទទឹកជោគ និងមួយចំនួនត្រូវបានខូចខាតផងដែរ។
ឧត្តមសេនីយ៍ទោ សោម ស៊ុន បានថ្លែងនូវការសោកស្ដាយចំពោះការខូចខាតដោយឧបទ្ទវហេតុនេះ និងបានណែនាំដល់លោកពលបាលឯក ឡាំ សុខុម និងភរិយា ព្រមទាំងកូនតូចៗ រកកន្លែងស្នាក់នៅបណ្ដោះអាសន្នសិន ដើម្បីក្រុមការងារជួយរៀបចំដឹកជញ្ជូនឈើ និងសម្ភារៈមួយចំនួនមកជួយជួសជុលឱ្យបានស្នាក់នៅបណ្ដោះអាសន្នសិន ។ ហើយនៅក្នុងឱកាសនេះដែរ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងសហការី បានជួយឧបត្ថម្ភស័ង្កសីចំនួន ៥០សន្លឹក និងស្បៀងអាហារ គ្រឿងឧបភោគបរិភោគ ព្រមទាំងថវិកាមួយចំនួន ដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវ ដើម្បីដំណើរការជួសជុលជម្រកស្នាក់នៅបណ្ដោះអាសន្ន និងដោះស្រាយការលំបាកខ្វះខាតនៅពេលនេះបានមួយគ្រាផងដែរ ។
លោកពលបាលឯក ឡាំ សុខុម បានសូមគោរពថ្លែងអំណរគុណដ៍ជ្រាលជ្រាលជ្រៅជាទីបំផុតចំពោះមេបញ្ជាការតំបន់ប្រតិបត្តិការសឹករងកំពង់ធំ ដែលជានិច្ចកាលតែងតែផ្សាភ្ជាប់ពីសុខទុក្ខ ជាមួយយោធិនក្រោមឱវាទគ្រប់ៗរូប និងបងប្អូនអតីតយុទ្ធជនដែលមានជីវភាពលំបាកខ្វះខាតនៅក្នុងខេត្តកំពង់ធំ។ អត្ថបទតំបន់ប្រតិបត្តិការសឹករងកំពង់ធំ-ពិនិត្យដោយអ៊ុមញឹប។
