ប្រធានក្រុមការងារចុះមូលដ្ឋានស្រុកស្ទោង ឧបត្ថម្ភដើមឈើ និងផ្កា១,០០០ដើម សម្រាប់លម្អ នៅវិទ្យាល័យរស្មីសោភ័ណ

(កំពង់ធំ)÷ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានក្រុមការងារចុះមូលដ្ឋានស្រុកស្ទោង បានឧបត្ថម្ភកូនឈើ និងផ្កាជាច្រើនមុខសម្រាប់ដាំលម្អយកម្លប់ សួនច្បារក៏ដូចជាលើកកម្ពស់បរិស្ថាន នៅវិទ្យាល័យរស្មីសោភ័ណ ស្ថិតនៅក្នុងភូមិសាមក្អោក ឃុំទ្រា ស្រុកស្ទោង ខេត្តកំពង់ធំ កាលពីព្រឹកថ្ងៃទី ៣១ ខែឧសភា ឆ្នាំ២០២៥។

ទាំងនេះសឱ្យឃើញពីការយកចិត្តទុកដាក់របស់ឯកឧត្តម ក្នុងនាមប្រធានក្រុមការងារចុះមូលដ្ឋានស្រុកស្ទោង ក៏ដូចជាបានជួយអភិវឌ្ឍន៍មូលដ្ឋាននិងលើកកម្ពស់វិស័យអប់រំ ព្រមទាំងបណ្ដុះនូវស្មារតីស្រឡាញ់បរិស្ថានរបស់យុវជន ហើយនាំគ្នាដាំដើមឈើឡើងវិញនៅក្នុងវិទ្យាល័យរស្មីសោភ័ណក៏ដូចជានៅក្នុងស្រុកស្ទោង ឱ្យបានស្រស់ស្អាត និងខៀវបំព្រងគ្រប់រដូវកាល។

ជាមួយគ្នានេះលោក សុទ្ធ វិច្ឆិកា នាយកវិទ្យាល័យរស្មីសោភ័ណ បានថ្លែងអំណរគុណយ៉ាងជ្រៅជ្រៅបំផុតដល់ឯកឧត្តម ថោ ជេដ្ឋា និងសហការីដែលបានជួយជួសជុលបន្ទប់ទឹក បង្គន់អនាម័យ ព្រមទាំងអគារមួយចំនួននៅវិទ្យាល័យសោភ័ណឱ្យបានស្រស់ស្អាតថែមទៀតក៏ដូចជាការឧបត្ថម្ភនូវដើមឈើ និងដើមផ្កាសម្រាប់ដាំលម្អសាលារៀននៅក្នុងឱកាសនេះផងដែរ។

សូមបញ្ជាក់ថាឯកឧត្តម ថោ ជេដ្ឋា រដ្ឋមន្ត្រីធនធានទឹក និងឧតុនិយម និងដឹកនាំក្រុមគ្រូពេទ្យមកជួយព្យាបាលជំងឺដោយឥតគិតថ្លៃជូនពុកម៉ែបងប្អូនប្រជាពលរដ្ឋនៅក្នុងមូលដ្ឋាន និងស្រុកស្ទោងទាំងមូលដោយឥតគិតថ្លៃចាប់ពីថ្ងៃទី៥ -៦ និងថ្ងៃទី៧ ខែកក្កដា ឆ្នាំ២០២៥ នៅទីតាំងវិទ្យាល័យរស្មីសោភ័ណនេះ ហើយដើមឈើដែលបានប្រគល់ជូនលោកនាយកសាលានៅក្នុងឱកាសនេះមានដើមឈើយកម្លប់ចំនួន ៥០០ដើម និងដើមផ្កាក្រដាសចំនួន៥០០ដើមផងដែរ។ អត្ថបទរដ្ឋបាលស្រុកស្ទោង-ពិនិត្យដោយអ៊ុមញឹប។