ឯកឧត្តម ហ៊ុន ម៉ានី មានប្រសាសន៍ថា «យុវជន គឺជាអ្នកការពារបច្ចុប្បន្នកាល ដើម្បីផ្ទេរទៅឱ្យអ្នកជំនាន់ក្រោយ»

(កំពង់ធំ)៖ នាឱកាសនៃពិធីសម្ពោធដាក់ឱ្យប្រើប្រាស់ជាផ្លូវការអគារស្នាក់ការ និងសមិទ្ធផលនានារបស់ស.ស.យ.ក. ខេត្តកំពង់ធំ នារសៀលថ្ងៃទី១៥ ខែឧសភា ឆ្នាំ២០២៥ ឯកឧត្តម ហ៊ុន ម៉ានី បានថ្លែងអំណរគុណ និងធ្វើការកោតសរសើរចំពោះថ្នាក់ដឹកនាំ និងសមាជិក សមាជិការទាំងអស់របស់ ស.ស.យ.ក ខេត្តកំពង់ធំ ព្រមទាំងសម្តែងនូវការអបអរសាទរចំពោះសមិទ្ធផលនានាដែលស.ស.យ.ក. ខេត្តកំពង់ធំសម្រេចបានជាបន្តបន្ទាប់ ជាពិសេសគឺ អគារទីស្នាក់ការ ស.ស.យ.ក. ខេត្តកំពង់ធំ ដែលបានសម្ពោធដាក់ឱ្យប្រើប្រាស់ជាផ្លូវការនាពេលនេះ។ ទន្ទឹមនេះ ឯកឧត្តមក៏បានបង្ហាញការជឿជាក់យ៉ាងមុតមាំថាទីស្នាក់ការថ្មីនេះ នឹងក្លាយជាមជ្ឈមណ្ឌលមួយយ៉ាងសំខាន់ ក្នុងការជំរុញ និងបង្កើនប្រសិទ្ធភាពការងាររបស់យុវជន ជាពិសេសជួយជំរុញកិត្យានុភាពរបស់ ស.ស.យ.ក. ខេត្តកំពង់ធំផងដែរ។

ផ្សារភ្ជាប់នឹងការលើកឡើងខាងលើ ឯកឧត្តមបានមានប្រសាសន៍ថា «យុវជន គឺជាអ្នកការពារបច្ចុប្បន្នកាល ដើម្បីផ្ទេរទៅឱ្យអ្នកជំនាន់ក្រោយ» ក្នុងន័យនេះ ឯកឧត្តមចង់បញ្ជាក់ទៅដល់យុវជនថា ក្នុងនាមជាយុវជនបន្តវេន ត្រូវមានតួនាទីថែរក្សាការពារសុខសន្តិភាពផង និងជាអ្នកកសាងសុខសន្តិភាពផង ដើម្បីផ្ទេរទៅឱ្យអ្នកជំនាន់ក្រោយ ជាក់ស្ដែងប្រទេសកម្ពុជាមានសុខសន្តិភាពបានក្នុងពេលបច្ចប្បន្ន គឺកើតចេញពីការលះបង់របស់អ្នកជំនាន់មុន ដោយបានដាក់ជីវិតធ្វើជាដើមទុនវិនិយោគ ដើម្បីទទួលបានសុខសន្តិភាព ហើយសុខសន្តិភាពនេះទៀតសោត គឺត្រូវពឹងផ្អែកលើកត្តារួបរួមសាមគ្គី ដូចព្រះរាជបណ្តាំរបស់សម្ដេចព្រះបរមរតនកោដ្ឋ «ខ្មែររួបរួមខ្មែរខ្លាំង»។ ឯកឧត្តមបានបន្តថា ដូច្នេះហើយ ក្នុងនាមយើងជាយុវជនជំនាន់ក្រោយត្រូវបន្តខិតខំប្រឹងប្រែងថែរក្សាការពារ និងកសាងសុខសន្តិភាពឱ្យបានកាន់តែប្រសើរឡើង និងគង់វង្សបន្ថែមទៀតផងដែរ។ រដ្ឋបាលខេត្តកំពង់ធំ