ឧត្តមសេនីយ៍ទោ សោម ស៊ុន ត្រួតពិនិត្យការស្ថាបនាផ្លូវក្រាលគ្រួសក្រហមប្រវែងជាង ២១គីឡូម៉ែត្រពីទីរួមស្រុកសណ្តាន់ ទៅកាន់ឃុំដងកាំបិត អំណោយដ៏ថ្លៃថ្លារបស់សម្ដេចធិបតី ហ៊ុន ម៉ាណែត និងលោកជំទាវ

ខេត្ដកំពង់ធំ៖ នៅព្រឹកថ្ងៃទី០១ ខែកុម្ភៈ ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកសណ្ដាន់ បានដឹកនាំសហការីទៅត្រួតពិនិត្យការស្ថាបនាផ្លូវលំក្រាលគ្រួសក្រហមមួយខ្សែ ប្រវែងជាង ២១គីឡូម៉ែត្រ ពីទីរួមស្រុកសណ្ដាន់ឆ្ពោះទៅកាន់ឃុំដងកាំបិត ស្រុកសណ្ដាន់ ខេត្តកំពង់ធំ ដែលជាអំណោយដ៏ថ្លៃថ្លារបស់សម្ដេចមហាបបរអធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា តាមរយៈឯកឧត្តម នាយឧត្តម សេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរៈភូមិន្ទ មេបញ្ជាការកងទ័ពជើងគោក ប្រធានក្រុមការងាររាជរដ្ឋាភិបាលចុះមូលដ្ឋានស្រុកសណ្ដាន់ ខេត្តកំពង់ធំ ។

ឧត្តមសេនីយ៍ទោ សោម ស៊ុន បានបញ្ជាក់ថា ផ្លូវលំក្រាលគ្រួសក្រហមមួយខ្សែប្រវែង ២១,១៥០ម៉ែត្រនេះ បានបើកការដ្ឋានស្ថាបនានៅថ្ងៃទី.១៧ ខែ ធ្នូ ឆ្នាំ ២០២៤ បើគិតមកដល់ពេលនេះមានរយៈពេលជិតពីរខែកន្លងមកហើយ ។  ហើយផ្លូវនេះត្រូវបានធ្វើលូ ក្រាលបេតុងបាត ប្រវែង១៣០ម៉ែត្រការ៉េ ដើម្បីរំដោះទឹកជន់លិចនៅក្នុងរដូវវស្សាដែលមានកម្ពស់ ១,៨០ម៉ែត្រ ស្ថិតនៅតំបន់អូរពពេល ក្នុងឃុំដងកាំបិត ស្រុកសណ្ដាន់ ខេត្តកំពង់ធំ ។

ឧត្តមសេនីយ៍ទោ សោម ស៊ុន ក្នុងនាមអនុប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកសណ្ដាន់ បានគូស បញ្ជាក់ថា អាជ្ញាធរដែនដី និងប្រជាពលរដ្ឋនៅក្នុងស្រុកសណ្ដាន់ ខេត្តកំពង់ធំ ពិសេសនៅឃុំដងកាំបិត និងឃុំសណ្ដាន់ មានសេចក្តីរំភេីបរីករាយយ៉ាងខ្លាំងដែលបានទទួលផ្លូវថ្មីមួយខ្សែនេះ ងាយស្រួលក្នុងការធ្វើដំណើរដឹកកសិផលផ្សេងៗ ពីឃុំសណ្ដាន់ឆ្ពោះទៅកាន់ឃុំដងកាំបិត និងពីឃុំដងកាំបិតមកកាន់ទីរួមស្រុកសណ្ដាន់  និងបានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចមហាបបរអធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវ ព្រមទាំងឯកឧត្តមនាយឧត្តមសេនីយ៍ ម៉ៅ សុផាន់ ដែលបានយកចិត្តទុកដាក់ដោះស្រាយនូវរាល់ការលំបាកជូនប្រជាជននៅស្រុកសណ្តាន់ ខេត្តកំពង់ធំ  និងសូមគោរពជូនពរសម្តេច និងលោកជំទាវ ព្រមទាំងឯកឧត្តមនាយឧត្ដមសេនីយ៍ទទួលបាននូវពុទ្ធពរទាំងបួនប្រការកុំបីឃ្លៀងឃ្លាតឡើយ ។អត្ថបទតំបន់សឹករងកំពង់ធំ។