ឧត្ដមសេនីយ៍ទោ សោម ស៊ុន ដឹកនាំកងកម្លាំងចម្រុះត្រួតពិនិត្យការដុះលូតលាស់ព្រៃឈើធម្មជាតិឡេីងវិញ ក្រោយរងការកាប់ទន្ទ្រានរយៈពេលជាងមួយឆ្នាំកន្លងទៅ នៅតំបន់ដែនជម្រកសត្វព្រៃ ព្រៃឡង់ ខេត្តកំពង់ធំ
ខេត្តកំពង់ធំ៖ នៅរសៀលថ្ងៃទី ១៣ ខែវិច្ឆិកា ឆ្នាំ២០២៥ ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ដ្រៃយ៍គណកម្មការការការពារ ទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំ បានដឹកនាំកងកម្លាំងចម្រុះ ប្រចាំការនៅទីបញ្ជាការស្រាលបង្ក្រាបបទល្មើសធនធានធម្មជាតិ នៅតំបន់អូរសោម ក្នុងភូមិសាស្ត្រស្រុកសណ្តាន់ ខេត្តកំពង់ធំ បានទៅពិនិត្យមេីលការដុះលូតលាស់ព្រៃឈើធម្មជាតិឡេីងវិញ ក្រោយរងការកាប់ទន្ទ្រានពីក្រុមជនល្មេីសព្រៃឈើ រយៈពេលជាងមួយឆ្នាំកន្លងទៅ ដែលកងកម្លំាងចម្រុះ បង្ក្រាប និងធ្វើការគ្រប់គ្រងជាសម្បត្តិធម្មជាតិរបស់រដ្ឋ នៅតំបន់អូរទ្រាក ក្នុងដែនជម្រកសត្វព្រៃ ព្រៃឡង់ ស្ថិតនៅក្នុងភូមិសាស្ត្រស្រុកសណ្តាន់ ខេត្តកំពង់ធំ ។
ឧត្ដមសេនីយ៍ទោ សោម ស៊ុន បានថ្លែងនូវការកោតសរសើរចំពោះកងកម្លាំងចម្រុះប្រចាំការនៅទីបញ្ជាការស្រាលតំបន់អូរសោម ដែលបានរួមសហការគ្នាបានល្អ ក្នុងការធ្វើសកម្មភាពការពារទប់ស្កាត់ និងបង្ក្រាបបទល្មើសធនធានធម្មជាតិ នៅក្នុងដែនជម្រកសត្វព្រៃ ព្រៃឡង់ ក្នុងរយៈពេលជាងមួយឆ្នាំកន្លងទៅ ដោយយេីងបានរកឃេីញ និងបង្ក្រាបបានការលួចកាប់ទន្ទ្រានព្រៃឈើយកដីរបស់រដ្ឋជាច្រើនកន្លែង ហេីយយេីងបានគ្រប់គ្រង ទប់ស្កាត់មិនឲ្យមានការដាំដុះដំណាំផ្សេងៗ ដេីម្បីទុកឲ្យព្រៃឈើធម្មជាតិដុះលូតលាស់ឡើងវិញ សម្រាប់សង្គមជាតិយើងទាំងអស់គ្នា ។
ឧត្តមសេនីយ៍ទោ សោម ស៊ុន បានណែនាំដល់កងម្លាំងចម្រុះទាំងអស់ ត្រូវបន្តរួមគ្នា អនុវត្តន៍ឲ្យមានប្រសិទ្ធភាពនូវបទបញ្ជារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងថ្នាក់ដឹកនាំគ្រប់លំដាប់ថ្នាក់ នៃកងយោធពលខេមរភូមិន្ទ ព្រមទាំងបទបញ្ជារបស់ឯកឧត្តមអភិបាលខេត្ត ប្រធានគណបញ្ជាការឯកភាពរដ្ឋបាលខេត្តកំពង់ធំ ក្នុងភារកិច្ចការពារ ទប់ស្កាត់ និងបង្ក្រាបឲ្យបានដាច់ខាត ការកាប់ទន្ទ្រានព្រៃឈើយកដីរបស់រដ្ឋធ្វើជាកម្មសិទ្ធិ និងការកាប់ដឹកជញ្ជូនឈើដោយខុសច្បាប់ ពិសេសនៅក្នុងដែនជម្រកសត្វព្រៃ ព្រៃឡង់នេះ ដោយត្រូវរកឲ្យឃេីញ និងចាប់ឃាត់ខ្លួនជនល្មើសរួមជាមួយវត្ថុតាងជាក់ស្តែង បញ្ជូនទៅកាន់តុលាការដើម្បីផ្តន្ទាទោសតាមច្បាប់ដោយគ្មានការលើកលែងឡេីយ ។អត្ថបទតំបន់ប្រតិបត្តិការសិស្សរងកំពង់ធំ-ពិនិត្យដោយអ៊ុម ញឹប។
