មេបញ្ជាការតំបន់ប្រតិបត្តិការសឹករងកំពង់ធំ នាំយកថវិកាមូលនិធិយោធិនពលី មរណៈ ចំនួន ១០,០០០,០០០រៀល ទៅប្រគល់ជូនគ្រួសារលោកវរសេនីយ៍ត្រី ពុធ សំអាន ដែលបានពលីជីវិតនាពេលកន្លងទៅ
ខេត្តកំពង់ធំ៖ នៅរសៀលថ្ងៃទី៣០ ខែមិថុនា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំសហការី នាំយកថវិកាមូលនិធិយោធិនពលី មរណៈ ចំនួន ១០,០០០,០០០រៀល ទៅប្រគល់ជូនក្រុមគ្រួសារលោកវរសេនីយ៍ត្រី ពុធ សំអាន នាយរងផ្នែកគិលានដ្ឋាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានពលីជីវិតដោយរោគាពាធ និងដោយរបួសចាស់សើររើ កាលពីពេលកន្លងទៅថ្មីៗ ។ ដែលពិធីនេះប្រព្រឹត្តទៅនៅគេហដ្ឋាននៃគ្រួសារសព ស្ថិតនៅភូមិថ្នល់បែកខាងកើត ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ។
ឧត្តមសេនីយ៍ទោ សោម ស៊ុន បានសំណេះសំណាលសាកសួរសុខទុក្ខជាមួយក្រុមគ្រួសារសព ដោយបានថ្លែងនូវការសោកស្ដាយស្រណោះអាឡោះអាល័យជាពន់ពេក ចំពោះការបាត់បង់យុទ្ធមិត្ត ដែលធ្លាប់រួមអាវុធ និងរួមការងារជាមួយគ្នា អស់រយៈពេលជាង ៣ទសវត្សរ៍កន្លងមកហើយ នឹងបានដុតធូបគោរពវិញ្ញាណក្ខន្ធ និងសូមបួងសួងដល់វិញ្ញាណក្ខន្ធលោក បានទៅកាន់សុគតិភពកុំបីឃ្លៀងឃ្លាតឡើយ ។ ហើយនៅក្នុងឱកាសនេះដែរ ឧត្តមសេនីយ៍ទោ សោម ស៊ុន ក៏បានប្រគល់ថវិកាមូលនិធិយោធិនពលី មរណៈ ជូនដល់ក្រុមគ្រួសារសព ចំនួន ១០លានរៀល ដើម្បីចាត់ចែងប្រើប្រាស់តាមតម្រូវការចាំបាច់ផ្សេងៗ ក្នុងជីវភាពប្រចាំថ្ងៃ ។
លោកស្រី ហ៊ុន សោភ័ណ្ឌ ដែលត្រូវជាភរិយា សពលោកវរសេនីយ៍ត្រី ពុធ សំអាន បានថ្លែងនូវការគោរពដឹងគុណដ៏ជ្រាលជ្រៅជាទីបំផុត ចំពោះឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ព្រមទាំងនាយទាហាន នាយទាហានរង និងពលទាហាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលកន្លងមកបានចាត់ចែងរៀបចំពិធីបុណ្យសព ជូនស្វាមីរបស់គាត់បានយ៉ាងល្អប្រសើរ ។ ជាមួយនោះដែរ ក៏បានឧបត្ថម្ភថវិកាគោលនយោបាយផ្សេងៗ ជាបន្តបន្ទាប់ ដើម្បីលើកទឹកចិត្តនិងជួយដោះស្រាយជីវភាពក្រុមគ្រួសាររបស់គាត់បានយ៉ាងល្អប្រសើរ ។ អត្ថបទតំបន់ប្រតិបត្តិការសឹករងកំពង់ធំ។ពិនិត្យដោយអ៊ុមញឹប។
