ឯកឧត្តម រស់ សារាំ ដឹកនាំកិច្ចប្រជុំស្តីពីការពង្រឹងកិច្ចសហការ និងការអនុវត្តច្បាប់ព្រហ្មទណ្ឌ នៅក្នុងក្របខណ្ឌនៃរដ្ឋបាលស្រុកបារាយណ៍ ខេត្តកំពង់ធំ
(កំពង់ធំ)÷ នៅថ្ងៃចន្ទ១៤កើត ខែជេស្ឋ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី០៩ ខែមិថុនា ឆ្នាំ២០២៥ សាលាស្រុកបារាយណ៍ បានរៀបចំកិច្ចប្រជុំស្តីពីការពង្រឹងកិច្ចសហការ និងការអនុវត្តច្បាប់ព្រហ្មទណ្ឌ ក្រោមអធិបតីភាពដ៏ខ្ពង់ខ្ពស់ ឯកឧត្តម រស់ សារាំ ព្រះរាជអាជ្ញា នៃអយ្យការអមសាលាដំបូងខេត្តកំពង់ធំ និង លោក ឃន ចាន់ថៃ អភិបាល នៃគណៈអភិបាលស្រុកបារាយណ៍។ ដោយមានការឧបត្ថម្ភគាំទ្រពីឯកឧត្តមបណ្ឌិត ថោង ខុន ទេសរដ្ឋមន្ត្រី កិច្ចប្រជុំនេះបានប្រព្រឹត្តទៅនៅក្នុងអគារសាលប្រជុំរបស់ឯកឧត្តមបណ្ឌិតទេសរដ្ឋមន្ត្រី ស្ថិតនៅភូមិស្វាយ ឃុំបារាយណ៍ ស្រុកបារាយណ៍ ខេត្តកំពង់ធំ។
សមាសភាពចូលរួម រួមមាន ÷ លោកព្រះរាជ អាជ្ញារង លោកអភិបាលរងស្រុក លោកប្រធាន-អនុប្រធាន មន្ត្រីនៃលេខាធិការដ្ឋាន លោកក្រឡាបញ្ជី កងកម្លាំងនៃអធិការដ្ឋាននគរបាលស្រុក មូលដ្ឋានកងរាជអាវុធហត្ថស្រុក ផ្នែកប្រតិបត្តិការសឹករងស្រុក មេឃុំ មេភូមិ មន្រ្តីជលផល មន្រ្តីភូមិបាល និងមន្ត្រីនៃរដ្ឋបាលស្រុកបារាយណ៍ សរុបចំនួន ១២៣នាក់ (ស្រី១២នាក់)។
ឆ្លៀតក្នុងឱកាសនេះឯកឧត្តម រស់ សារាំ បានមានមតិស្វាគមន៍ និងបានលើកឡើងអំពីគោលបំណងសំខាន់ៗ ចំនួន០៣ ដូចខាងក្រោម÷ ១.ផ្សព្វផ្សាយអំពីក្រមនីតិវិធីព្រហ្មទណ្ឌកម្ពុជា ដោយធ្វើបទបង្ហាញសង្ខេបដោយលោក សាយ វាសនា ព្រះរាជអាជ្ញារង។ ២.ពង្រឹងទំនាក់ទំនង និងពង្រីកកិច្ចសហការក្នុងការអនុវត្តច្បាប់ព្រហ្មទណ្ឌ។ ៣.ជំរុញ បង្ការ និងបង្ក្រាបបទល្មើសចាំបាច់សំខាន់ៗ រួមមាន បទល្មើសគ្រឿងញៀន, ក្មេងទំនើង, ចរាចរណ៍, ឃាតកម្ម, ហិង្សា, លួចឆក់ប្លន់, ឆបោកតាមប្រព័ន្ធទំនាក់ទំនងសង្គម, ល្បែងសុីសង, កម្ចីក្រៅផ្លូវការគ្មានអាជ្ញាបណ្ណ, ជលផល និងនេសាទខុសច្បាប់, ធនធានធម្មជាតិ, ក្លែងបន្លំឯកសារ, ផ្តល់ឯកសារដោយទុច្ចរិត, សុំផ្តល់ឯកសារដោយទុច្ចរិត និងបទល្មើសសុំផ្តល់លិខិតបញ្ជាក់មិនពិត។ ៤.ដោះស្រាយបញ្ហាប្រឈមនានារវាងស្ថាប័នអយ្យការអមសាលាដំបូងខេត្ត និងអាជ្ញាធររដ្ឋបាលភូមិ ឃុំ ស្រុក។
ឯកឧត្តម រស់ សារាំ ស្នើសុំឱ្យថ្នាក់ដឹកនាំរដ្ឋបាលស្រុកបារាយណ៍ កងកម្លាំងទាំងបី មេឃុំ មេភូមិ មន្រ្តីជលផល មន្ត្រីភូមិបាល និងមន្ត្រីទាំងអស់ ចូលរួមផ្តល់កិច្ចសហការគាំទ្រនូវយុទ្ធនាការ និងការអនុវត្តគោលនយោបាយនានា របស់ក្រសួងយុត្តិធម៌ ដើម្បីបម្រើសេវាយុត្តិធម៌ជូនប្រជាពលរដ្ឋឱ្យបានឆាប់រហ័ស ត្រឹមត្រូវ តម្លាភាព និង ប្រសិទ្ធភាព ព្រមទាំងបន្តធ្វើកិច្ចសហការឲ្យកាន់តែស្អិតរមួត ក្នុងការបង្ការទប់ស្កាត់ និងបង្ក្រាបបទល្មើសទាំងឡាយ ក្នុងដែនសមត្ថកិច្ចស្រុកបារាយណ៍ នៃខេត្តកំពង់ធំ ឲ្យកាន់តែមានប្រសិទ្ធភាពខ្ពស់។ អត្ថបទអយ្យការអមសាលាដំបូងខេត្តកំពង់ធំ-ពិនិត្យដោយអ៊ុមញឹប។
