ប្រគល់ជម្រកស្នាក់នៅថ្មី ដើម្បីគ្រួសារវីរយុទ្ធជន ការពារព្រំដែនកម្ពុជា-ថៃ នៅភូមិកប់ថ្លុក ស្រុកកំពង់ស្វាយ ខេត្តកំពង់ធំ
ខេត្តកំពង់ធំ៖ ជម្រកស្នាក់នៅថ្មីដែលបានដឹកនាំសាងសង់ដោយឧត្ដមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ រួមជាមួយអាជ្ញាធរដែនដី និងសប្បុរសជននានា បានសាងសង់រួចរាល់ ប្រគល់ជូនគ្រួសារវីរយុទ្ធជន កងការពារព្រំដែនកម្ពុជា-ថៃ នៅភូមិកប់ថ្លុក ឃុំដំរីស្លាប់ ស្រុកកំពង់ស្វាយ ខេត្តកំពង់ធំ នៅរសៀលថ្ងៃទី១៣ ខែតុលា ឆ្នាំ២០២៥ ។
ឧត្ដមសេនីយ៍ទោ សោម ស៊ុន បានបញ្ជាក់ថា៖ ជម្រកស្នាក់នៅដែលទើបបានសាងសង់រួចរាល់នៅពេលនេះ មានទំហំ ៤ម៉ែត្រ x ៦ម៉ែត្រ សាងសង់ពីឈេី ជញ្ជាំងនិងដំបូលប្រក់ស័ង្កសី រនាបក្រាលក្តារ មានកំពស់ ២ម៉ែត្រមួយតឹក ផុតពីដី ដែលជាការចូលរួមចំណែកពីសប្បុរសជននានា ដើម្បីសាងសង់ជូនលោកស្រី កាន ឡឹង អាយុ ៣៥ឆ្នាំ មានកូនតូចៗនៅនៅក្នុងបន្ទុកចំនួន ៦នាក់ ជាភរិយារបស់លោក ភឿន ភីន វីរយុទ្ធជនកងការពារព្រំដែនកម្ពុជា-ថៃ លេខ៤០៣ គ្មានផ្ទះសម្រាប់ស្នាក់នៅ ដោយកន្លងទៅជាច្រើនឆ្នាំមកហើយ បានទៅរស់នៅជាមួយស្វាមីក្នុងទីតាំងបន្ទាយ រហូតមកដល់ពេលផ្ទុះសង្គ្រាម ឈ្លានពានពីពួកចោរសៀម ទេីបបានវិលត្រឡប់មកកាន់ស្រុកកំណើតវិញ ។ ហើយបច្ចុប្បន្នស្វាមីគាត់កំពុងជាប់ដៃការពារបូណភាពទឹកដី នៅព្រំដែនកម្ពុជា-ថៃ ទិសយោធភូមិភាគទី៤ ។
នៅក្នុងឱកាសប្រគល់ជម្រកស្នាក់នៅថ្មីនេះ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានឧបត្ថម្ភស្បៀងអាហារ គ្រឿងឧបភោគបរិភោគ ភេសជ្ជៈ មុង ភួយ កន្ទេល ខ្នេីយ និងសម្ភារប្រើប្រាស់ មួយចំនួនជូនលោកស្រី កាន ឡឹង ផងដែរ ។
លោកស្រី កាន ឡឹង រំភើបចិត្តរកអ្វីប្រៀបផ្ទឹមពុំបាន ដែលបានទទួលជម្រកស្នាក់នៅថ្មីសម្រាប់កូនៗ ដែលកន្លងមកសុំផ្ទះបងប្អូនស្នាក់នៅ អស់រយៈពេលជាងបីខែកន្លងមកហើយ និងសូមថ្លែងអំណរគុណ ដ៍ជ្រាលជ្រៅជាទីបំផុតចំពោះឧត្ដមសេនីយ៍ទោ សោម ស៊ុន និងសហការី អាជ្ញាធរដែនដី និងសប្បុរសជនទាំងអស់ ដែលបានជួយឧបត្ថម្ភដល់គាត់ ដែលកំពុងមានជីវភាពលំបាកខ្វះខាតនៅពេលនេះ និងសូមគោរពជូនពរឯកឧត្តម លោក លោកស្រីទាំងអស់ សូមទទួលបាននូវពុទ្ធពរទាំងបួនប្រការកុំបីឃ្លៀងឃ្លាតឡើយ ។អត្ថបទតំបន់ប្រតិបត្តិការសឹករងកំពង់ធំ-ពិនិត្យនិងកែសម្រួលដោយអ៊ុមញឹប។
