ឯកឧត្តមបណ្ឌិត សួង ណយ ដឹកនាំវេទិកាសិក្ខាសាលាស្តីពី ដំណោះស្រាយហិរញ្ញវត្ថុក្នុងវិស័យ កសិកម្ម សិប្បកម្ម សេវាកម្ម និងពាណិជ្ជកម្ម នៅក្រុងស្ទឹងសែន
(កំពង់ធំ)÷ នៅថ្ងៃទី២៣ ខែឧសភា នៅសាលប្រជុំសាលាក្រុងស្ទឹងសែន ឯកឧត្តមបណ្ឌិត សួង ណយ ប្រធានក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារផលិតផលខ្មែរខេត្តកំពង់ធំ បានដឹកនាំវេទិកាសិក្ខាសាលាស្តីពី ដំណោះស្រាយហិរញ្ញវត្ថុក្នុងវិស័យ កសិកម្ម សិប្បកម្ម សេវាកម្ម និងពាណិជ្ជកម្ម។ ដោយមានសមាសភាពអញ្ជើញចូលរួមសរុបចំនួន៦១រូប ក្នុងនោះមកពីស្ថាប័នថ្នាក់ជាតិចំនួន ៣រូប មន្ទីរតាមវិស័យចំនួន៧រូប រួមមានមន្ទីរ(១. កសិកម្ម រុក្ខាប្រមាញ់ និងនេសាទ ២.ឧស្សាហកម្ម បច្ចេកវិទ្យា វិទ្យាសាស្រ្ត និងនវានុវត្តន៍ ៣.មន្ទីរពាណិជ្ជកម្ម ៤. មន្ទីរធនធានទឹកឧតុនិយម ៥.មន្ទីរអភិវឌ្ឍន៍ជនបទ ៦. មន្ទីរទេសចរណ៍) រដ្ឋបាលក្រុងស្ទឹងសែន និងការិយាល័យចំណុះរដ្ឋបាលក្រុងចំនួន ១៥រូប ចៅសង្កាត់ចំនួន៣រូប សហគមន៍កសិកម្ម៦ចំនួន៦រូប សិប្បកម្មចំនួន១៧រូប ស្ថាប័នហិរញ្ញវត្ថុ (ARDB, KE, SME Bank និង Sathapana bank) ចំនួន១១រូប។
ឯកឧត្តមបណ្ឌិត សួង ណយ បានបញ្ជាក់ថាវេទិកាសិក្ខាសាលានៅថ្ងៃនេះ បានចែករំលែកព័ត៌មានយ៉ាងច្បាស់លាស់ និងពិភាក្សាយ៉ាងសកម្មអំពី÷ ប្រភពហិញ្ញវត្ថុពីស្ថាប័នហិរញ្ញវត្ថុខាងលើ ដែលមានការប្រាក់សមរម្យតាមវិស័យដូចជា កសិកម្ម សិប្បកម្ម ឧស្សាហកម្ម សេវាកម្ម ភស្តុភា និងពាណិជ្ជកម្ម។ ការគ្រប់គ្រង ការប្រើប្រាស់ថវិកាឱ្យចំគោលដៅ។ របៀបស្នើសុំហិរញ្ញប្បទាន និងហិរញ្ញវត្ថុ តាមរយៈការណែនាំ និងពន្យល់ដោយស្ថាប័នហិរញ្ញវត្ថុ (សម្រាប់អ្នកដែលមានបំណងចង់ដាក់ពាក្យស្នើសុំ)។ លក្ខខណ្ឌ ប្រភេទការប្រាក់ និងឱកាសទទួលបានកញ្ចប់ថវិកាពិសេសដូចបណ្តាស្រុកមុនៗដែរ។ មន្ទីរកសិកម្ម ឧស្សាហកម្ម ពាណិជ្ជកម្ម កិច្ចការនារី អភិវឌ្ឍន៍ ជនបទ ធនធានទឹក បានឆ្លើយតប និងដោះស្រាយដោយប្រទាក់ក្រឡាគ្នា ពីការដាំដុះ បង្កបង្កើនផល បច្ចេកទេសកែច្នៃវេចខ្ចប់ ចុះបញ្ជីទីផ្សារ ទឹកស្អាត ប្រព័ន្ធស្រោចស្រព និងនូវរាល់សំណួរ និងសំណូមពររបស់ប្រជាពលរដ្ឋ។
ឯកឧត្តមបណ្ឌិត សួង ណយ ប្រធានក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារផលិតផលខ្មែរខេត្តកំពង់ធំបានស្នើឱ្យ រដ្ឋបាលក្រុងត្រូវចាត់តាំងជនបង្គោលតាមវិស័យឲ្យបន្តការផ្សព្វផ្សាយ ដោយសហការជាមួយ ចៅសង្កាត់ មេភូមិ សហគមន៍កសិកម្ម អាជីវករ ជនបង្គោល។ ស្ថាប័នហិរញ្ញវត្ថុបន្តសហការសម្របសម្រួល ណែនាំដល់ក្រុមផលិត សិប្បករ អាជីវករ សេវាករ ក្នុងការបំពេញឯកសារតាមលក្ខខណ្ឌដើម្បីទទួលបានឥណទាន និងថវិកាឥតសំណងពីស្ថាប័នហិរញ្ញវត្ថុទាំងនោះផងដែរ។
សូមបញ្ជាក់ផងដែរថា វេទិកានេះជាជំហានសំខាន់ក្នុងការបំពេញគោលដៅរបស់រាជរដ្ឋាភិបាលក្នុងការកាត់បន្ថយភាពក្រីក្រ និងលើកកម្ពស់ជីវភាពប្រជាពលរដ្ឋតាមរយៈការផ្តល់ដំណោះស្រាយហិរញ្ញវត្ថុដ៏ច្បាស់លាស់។ ការចូលរួមពីស្ថាប័នជាតិ និងមូលដ្ឋានបង្ហាញពីការសហការល្អរវាងភាគីពាក់ព័ន្ធ។ អត្ថបទឯកឧត្តមបណ្ឌិត សួង ណយ
