កម្លាំងជំនាញ នៃស្នងការដ្ឋាននគរបាលខេត្តកំពង់ធំ បំបែកករណីឃាតកម្ម ដែលកើតឡើងនាពេលថ្មីៗនេះ នៅស្រុកសណ្ដាន់
(កំពង់ធំ)៖ លោកឧត្តមសេនីយ៍ត្រី ទិត សំណាង ស្នងការរងផែនការងារនគរបាលព្រហ្មទណ្ឌនៃស្នងការដ្ឋាននគរបាលខេត្តកំពង់ធំ បានឱ្យដឹង នៅព្រឹកថ្ងៃទី១៦ ខែមករា ឆ្នាំ២០២៦ ថា៖ កម្លាំងជំនាញ នៃស្នងការដ្ឋាននគរបាលខេត្តកំពង់ធំ បំបែកករណីឃាតកម្ម ដែលកើតឡើងនាពេលថ្មីៗនេះ ក្នុងភូមិខោស ឃុំទំរីង ស្រុកសណ្ដាន់ ខេត្តកំពង់ធំ។
លោកឧត្តមសេនីយ៍ត្រី ទិត សំណាង ស្នងការរង បានបញ្ចាក់ថា កាលពីវេលាម៉ោង ០០ និង ៣៥នាទីយប់ ឈានចូលថ្ងៃទី១៣ ខែមករា ឆ្នាំ២០២៦ មានករណីឃាតកម្ម កើតឡើងស្ថិតក្នុងភូមិខោស ឃុំទំរីង ស្រុកសណ្ដាន់ ជនរងគ្រោះឈ្មោះ យ៉េង ឡៃហួយ ភេទស្រី អាយុ ៣៣ឆ្នាំ មុខរបរអាជីវករលក់ខោអាវ។
លោកឧត្តមសេនីយ៍ត្រី ស្នងការរង បន្តថ្លែងឱ្យដឹងថា បន្ទាប់ពីទទួលបានពត៌មានខាងលើនេះ ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ ហេង សុផល ស្នងការនគរបាលខេត្ត និងដោយមានការសម្របសម្រួលនីតិវិធី ពីឯកឧត្តម ព្រះរាជអាជ្ញាអមសាលាដំបូងខេត្ត លោកបានដឹកនាំកម្លាំង សហការជាមួយកម្លាំងអធិការស្រុកសណ្ដាន់ និងមានកិច្ចសហការពីកម្លាំងជំនាញនាយកដ្ឋានព្រហ្មទណ្ឌ នៃអគ្គស្នងការដ្ឋាននគរបាលជាតិ ប្រើប្រាស់វិធានការជំនាញ រហូតដល់ថ្ងៃទី ១៥ ខែ-ឆ្នាំដដែលយើងឈានដល់ការបង្រ្កាបឃាត់ខ្លួនជនល្មើស ជាឃាតករ នៅភូមិ កំពង់ត្រាច ឃុំកំពង់ត្រាច ស្រុករមាសហែក ខេត្តស្វាយរៀង ឈ្មោះ ពៅ ពិទូ ភេទ ប្រុស អាយុ ៤៤ ឆ្នាំ ដែលបានកាប់សម្លាប់ប្រពន្ធរបស់ខ្លួន ។
ករណីខាងលើនេះ សមត្ថកិច្ចជំនាញ កំពុងកសាងសំណុំរឿងតាមនីតិវិធីដើម្បីអនុវត្តន៍ច្បាប់៕
អត្ថបទស្នងការដ្ឋាននគរបាលខេត្តកំពង់ធំ
