លោកអភិបាលស្រុកស្ទោង ណែនាំដល់អាជ្ញាធរឃុំត្រូវពិនិត្យមើលផែនការអភិវឌ្ឍរបស់ខ្លួនឡើងវិញ ដើម្បីឆ្លើយតបទៅនឹងតម្រូវការជាអាទិភាពរបស់ពលរដ្ឋក្នុងមូលដ្ឋាន
(កំពង់ធំ)÷ លោកអភិបាលស្រុកស្ទោងណែនាំដល់អាជ្ញាធរឃុំត្រូវពិនិត្យមើលផែនការអភិវឌ្ឍរបស់ខ្លួនឡើងវិញ ដើម្បីឆ្លើយតបទៅនឹងតម្រូវការជាអាទិភាពរបស់ពលរដ្ឋក្នុងមូលដ្ឋាន លោក សាយ គឹមឡម បានណែនាំដូច្នេះ នៅក្នុងឱកាសដែលលោកអញ្ជើញជាអធិបតីភាពក្នុងពិធីបើកការដ្ឋានសាងសង់ផ្លូវបេតុងមួយខ្សែស្ថិតនៅក្នុងឃុំទ្រា ស្រុកស្ទោង ខេត្តកំពង់ធំ កាលពីព្រឹកថ្ងៃទី១៧ ខែតុលា ឆ្នាំ ២០២៥។
ជាមួយគ្នានេះលោកបានសម្ដែងការសាទរក្រៃលែងបំផុតដែលពលរដ្ឋនៅក្នុងឃុំទ្រាដែលទទួលបាននូវអត្ថប្រយោជន៍ពិតប្រាកដពីរាជរដ្ឋាភិបាលជាមួយគម្រោងមូលនិធិឃុំគឺជាផ្លូវបេតុងថ្មីស្រឡាង ដែលបានឆ្លើយតបយ៉ាងពិតប្រាកដទៅនឹងតម្រូវការជាក់ស្ដែងរបស់ពុកម៉ែបងប្អូនប្រជាពលរដ្ឋនៅក្នុងមូលដ្ឋានដែលធ្លាប់ប្រើប្រាស់និងមានការលំបាកក្នុងការធ្វើដំណើរជាមួយនឹងផ្លូវចាស់នឹងផ្លូវដីកន្លងមក។
បន្ថែមលើនេះលោកបានសម្ដែងការដឹងគុណយ៉ាងជ្រៅជ្រៅបំផុតដល់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ជាប្រធានក្រុមការងារចុះមូលដ្ឋានស្រុកស្ទោង ដែលបានចូលរួមអភិវឌ្ឍស្រុកស្ទោង នូវហេដ្ឋារចនាសម្ព័ន្ធជាពិសេសផ្លូវថ្នល់និងប្រព័ន្ធធារាសាស្ត្រដែលកំពុងដំណើរការ និងយ៉ាងសស្រាក់ស្រាំផងដែរ ហើយលោកបានណែនាំដល់អាជ្ញាធរឃុំ និងប្រជាពលរដ្ឋដែលនៅអមសងខាងផ្លូវនេះត្រូវនាំគ្នាជួយថែរក្សាសោភ័ណភាព អនាម័យ បរិស្ថាន ជាពិសេសកុំរំលោភដីចំណីផ្លូវហើយសហការកសាងប្រព័ន្ធលូជ្រុងរំដោះទឹកនិងដាក់បំពាក់សូឡាឱ្យបានស្រស់បំព្រង ដើម្បីធានានូវគុណភាពផ្លូវនិងការធ្វើដំណើរងាយស្រួលនៅពេលរាត្រីផងដែរ។
ជាមួយគ្នានេះលោក មិន ផាត មេឃុំទ្រា បានសម្ដែងនូវបេតិសោមនស្សរីករាយបំផុតជាមួយផ្លូវបេតុងថ្មីដែលក្នុងនាមលោកជាប្រធានគណៈកម្មការលទ្ធកម្មឃុំ និងសហការី បានឯកភាពអនុម័តកសាងផ្លូវបេតុងថ្មីមួយខ្សែជូនពលរដ្ឋក្នុងមូលដ្ឋាន ហើយលោកបានបងបញ្ជាក់បន្ថែមថា ឃុំទ្រានឹងទទួលបាននូវផ្លូវបេតុងថ្មីៗបន្ថែមទៀតដែលជាគម្រោងអភិវឌ្ឍន៍របស់ រាជរដ្ឋាភិបាលដែលមានប្រវែងសរុបជាង១៣គីឡូម៉ែត្រ។
ទន្ទឹមនឹងនឹងនេះប្រជាពលរដ្ឋឈ្មោះ ជន ជឿន នៅភូមិច្រាំងស បានសំដែងនូវការសប្បាយរីករាយបំផុតដែលភូមិឃុំមូលដ្ឋានរបស់លោកទទួលបានផ្លូវបេតុងដំបូងបំផុតសម្រាប់ធ្វើដំណើរងាយស្រួល ជាពិសេសការធ្វើដំណើរដឹកកសិផល ទំនិញសព្វសារពើពីមូលដ្ឋានទៅកាន់ទីផ្សារ និងទីរួមស្រុកស្ទោង។
សូមបញ្ជាក់ថា ផ្លូវបេតុងដែលបើកការដ្ឋាននៅព្រឹកនេះមានប្រវែង៨៣១ម៉ែត្រ ទទឹង៦ម៉ែត្រ ជាគម្រោងថវិកាមូលនិធិឃុំទ្រាឆ្នាំ២០២៥ផងដែរ។ អត្ថបទរដ្ឋបាលស្រុកស្ទោង.ពិនិត្យដោយអ៊ុមញឹប។
