ឧត្តមសេនីយ៍ទោ ហេង សុផល បានដាក់គោលការណ៍ ០៨ ចំណុច ដល់កម្លាំងប៉ុស្តិ៍នគរបាលរដ្ឋបាល អនុវត្តឱ្យទទួលបានប្រសិទ្ធភាពខ្ពស់

(កំពង់ធំ)៖ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ ដឹកនាំកងកម្លាំងចុះសាកសួរសុខទុក្ខនិងត្រួតពិនិត្យប៉ុស្តិ៍នគរបាលរដ្ឋបាលចំនួន ០៥ នៃអធិការដ្ឋាននគរបាលស្រុកកំពង់ស្វាយ ថ្ងៃទី ១០ ខែ តុលា ឆ្នាំ២០២៥ ។

ឧត្តមសេនីយ៍ទោ ហេង សុផល បានពាំនូវប្រសាសន៍ផ្ដាំផ្ញើសំណាក់នាយឧត្តមសេនីយ៍ ស ថេត អគ្គស្នងការនគរបាលជាតិ និងលោក នួន ផារ័ត្ន ប្រធានគណៈបញ្ជាការឯកភាពរដ្ឋបាលខេត្ត ជូនចំពោះបងប្អូនកងកម្លាំងប៉ុស្តិ៍នគបាលរដ្ឋបាលដែលកំពុងបំពេញភារកិច្ច យ៉ាងសស្រាក់សស្រាំតាមបណ្ដាគោលដៅអង្គភាព របស់ខ្លួន ប្រកបដោយស្មារតីទទួលខុសត្រូវខ្ពស់សំដៅបង្ការទប់ស្កាត់ បង្ក្រាបបទល្មើសគ្រប់ប្រភេទ និងបម្រើសេវារដ្ឋបាល ជូនប្រជាពលរដ្ឋ ។

លោកបានរួមអបអរសាទរនិងកោតសរសើរ ដល់ប៉ុស្តិ៍នគរបាលរដ្ឋបាល ដែលមានការកែលម្អអង្គភាព ឱ្យទទួលបានភាពស្រស់បំព្រង និងរៀបចំកន្លែងស្នាក់នៅប្រចាំការ
ផ្ទះបាយបានល្អប្រសើរ ដែលជាការយកចិត្តទុកដាក់របស់ថ្នាក់ដឹកនាំ និងមន្ត្រីក្រោមឱវាទ បានចូលរួមក្នុងការកសាងអភិវឌ្ឍរីកចម្រើនគួរជាទីមោទនៈ ។

បន្ថែមលើប្រសាសន៍ សំណេះសំណាល លោកឧត្តមសេនីយ៍ទោ ស្នងការ បានដាក់គោលការណ៍ ០៨ ចំណុច ដល់កងកម្លាំងប៉ុស្តិ៍នគរបាលរដ្ឋបាល អនុវត្តឱ្យទទួលបានប្រសិទ្ធភាពខ្ពស់÷
ទី១-ពង្រឹងវិន័យលេខ ៨៧៣ របស់កងកម្លាំងនគរបាលជាតិ ។
ទី២-ពង្រឹងការគ្រប់គ្រង ដឹកនាំបញ្ជា ។
ទី៣-រៀបចំផែនការសកម្មភាព សម្រាប់អនុវត្តតួនាទី ភារកិច្ចជាប្រចាំថ្ងៃ ការផ្លាស់ប្តូរវេនប្រចាំការ នៅប៉ុស្តិ៍នគរបាលរដ្ឋបាល រង់ចាំផ្ដល់សេវារដ្ឋបាល ជូនប្រជាពលរដ្ឋ និងទ្រោលសភាពការណ៍ សន្តិសុខ សុវត្ថិភាព សណ្តាប់ធ្នាប់សង្គម ព្រមទាំងចុះ
ល្បាតត្រួតពិនិត្យភូមិសាស្ត្រ ដោយសហការ
ជាមួយកម្លាំងប្រជាការពារ ។
ទី៤-ពង្រឹងការគ្រប់គ្រងមនុស្ស ចំណូល-ចំណាកស្រុកជាពិសេសប្រជាពលរដ្ឋ ដែលវិលត្រឡប់មកពីប្រទេសថៃ ។
ទី៥-បន្តការផ្សព្វផ្សាយ ដល់ប្រជាពលរដ្ឋ ដើម្បីបង្កើនការយល់ដឹង និងមានការប្រុងប្រយ័ត្ន កុំឱ្យធ្លាក់ក្នុងឧបាយកល ជនឆ្លៀតឱកាសមួយចំនួន ដែលមានចេតនាទុច្ចរិត ផ្តល់កម្ចីប្រាក់ខុសច្បាប់ ដោយមានអត្រាការប្រាក់ខ្ពស់ ។
ទី៦-បង្កើនការផ្សព្វផ្សាយគោលនយោបាយភូមិ-ឃុំ-សង្កាត់មានសុវត្ថិភាព ប៉ុស្តិ៍នគរបាលរដ្ឋបាល សហការ ជាមួយអាជ្ញាធរមូលដ្ឋានឃុំ.សង្កាត់.មេភូមិ បានចុះផ្សព្វផ្សាយធ្វើវេទិការសាធារណៈ និងបានជ្រើសរើសចងក្រងជាក្រុមប្រជាការពារ ហើយបានដឹកនាំពួកគាត់ធ្វើសកម្មភាពការពារសន្តិ សុខសណ្តាប់ធ្នាប់សាធារណៈ ជូនប្រជាពលរដ្ឋ ក្នុងមូលដ្ឋានបានជាប្រចាំ
ទី៧-បង្កើនការងារសាមគ្គីភាព និងកិច្ចសហការល្អ ជាមួយមហាជនគ្រប់ស្រទាប់វណ្ណ: ។
ទី៨-ការអនុវត្តលើការងារនគរបាល និងសហគមន៍ ត្រូវទំនាក់ទំនងយ៉ាងជិតស្និទ្ធក្នុងការចុះជួបអ្នកពាក់ព័ន្ធ មានមេឃុំ ក្រុមប្រឹក្សាឃុំ សង្កាត់ មេភូមិ និងប្រជាពលរដ្ឋរៀងរាល់ខែ ដោយធ្វើផែនការចុះផ្សព្វផ្សាយខ្លឹមសារនៅតាមគោលដៅដែលបានកំណត់ ។

គួរបញ្ជាក់ថា ក្នុងពិធីចុះពិនិត្យប៉ុស្ត៏ ចំនួន០៥ក្នុងស្រុកកំពង់ស្វាយ មាន
១- ប៉ុស្តិ៍នគរបាលរដ្ឋបាលក្ដីដូង
២-ប៉ុស្តិ៍នគរបាលរដ្ឋបាលសានគរ
៣-ប៉ុស្តិ៍នគរបាលរដ្ឋបាលត្បែង
៤-ប៉ុស្តិ៍នគរបាលរដ្ឋបាលត្រពាំងឬស្សី
៥-ប៉ុស្តិ៍នគរបាលរដ្ឋបាលព្រៃគុយ ។អត្ថបទស្នងការរដ្ឋាននគរបាលខេត្តកំពង់ធំ-ពិនិត្យដោយអ៊ុមញឹប។