អភិបាលរងខេត្តកំពង់ធំ ជំរុញមន្ត្រីសុខាភិបាលត្រូវបង្កើនគុណភាពប្រសិទ្ធភាព និងការផ្ដល់សេវាជូនពលរដ្ឋប្រកបដោយក្រមសីលធម៌វិជ្ជាជីវៈ
(កំពង់ធំ)÷ ឯកឧត្តម អ៊ុង វុទ្ធី អភិបាលរងខេត្តកំពង់ធំបានជំរុញលើកទឹកចិត្តដូច្នេះ នៅក្នុងឱកាសដែលឯកឧត្តមបានអញ្ជើញជួបសំណេះសំណាលសួរសុខទុក្ខមន្ត្រីសុខាភិបាលនៃមន្ទីរពេទ្យបង្អែកស្ទោង ប្រធានមណ្ឌលសុខភាព ព្រមទាំងសំណេះសំណាលជាមួយអ្នកជំងឺដែលកំពុងសម្រាប់ព្យាបាលនៅមន្ទីរពេទ្យបង្អែកស្ទោង កាលពីព្រឹកថ្ងៃទី១០ ខែតុលា ឆ្នាំ២០២៥។
ឯកឧត្តមបានសង្កត់ធ្ងន់ថា ការគោរពនិងអនុវត្តបាននូវក្រមសីលធម៌ និងព្យាបាលជំងឺជូនពុកម៉ែបងប្អូនប្រជាពលរដ្ឋនៅតាមមូលដ្ឋាន ជាពិសេសនៅតាមមណ្ឌលសុខភាព គឺជាការផ្ដល់សេវាដល់ជណ្ដើរផ្ទះ ពុកម៉ែបងប្អូនប្រជាពលរដ្ឋប្រកបដោយការទទួលខុសត្រូវក្នុងការផ្ដល់សេវាដោយឥតគិតថ្លៃដល់គ្រួសារពលី និងគ្រួសារកងទ័ពដែលបានតស៊ូប្រយុទ្ធប្រឆាំងក្នុងការការពារជាតិមាតុភូមិពីការឈ្លានពានរបស់បច្ចាមិត្ត ។
ឯកឧត្តមក៏បានជំរុញបន្ថែមទៀតដល់ គ្រូពេទ្យនៅមន្ទីរពេទ្យបង្អែកស្ទោង និងគ្រប់មណ្ឌលសុខភាពត្រូវចូលរួមអនុវត្តគោលនយោបាយរបស់រាជរដ្ឋាភិបាលយុទ្ធសាស្ត្រក្រសួងសុខាភិបាលក្នុងការទប់ស្កាត់ប្រយុទ្ធប្រឆាំង លុបបំបាត់ជំងឺគ្រុនឈាម ជំងឺគ្រុនចាញ់ឱ្យអស់ពីលទ្ធផលភាពសំដៅលើកកម្ពស់សុខុមាលភាពប្រជាពលរដ្ឋ និងចូលរួមកាត់បន្ថយភាពក្រីក្ររបស់មូលដ្ឋានផងដែរ។
ជាចុងបញ្ចប់ឯកឧត្តម អ៊ុង វុទ្ធី អភិបាលរងខេត្តកំពង់ធំ បានកោតសរសើរខ្ពស់ដល់មន្ទីរពេទ្យបង្អែកស្ទោង ក៏ដូចជាគ្រប់មណ្ឌលសុខភាពដែលបានផ្ដល់សេវា និងបម្រើព្យាបាលជំងឺជូនបងប្អូនប្រជាពលរដ្ឋប្រកបដោយទំនួលខុសត្រូវខ្ពស់ ដែលទទួលបាននូវការគោរពកោតសរសើរពីគ្រប់មជ្ឈដ្ឋានកន្លងមក និងជំរុញឱ្យអនុវត្តកិច្ចការនេះកាន់តែប្រសើរឡើងថែមទៀត។
សូមបញ្ជាក់ថា នៅក្នុងពិធីនេះមានការអញ្ជើញចូលរួមពីប្រធានមន្ទីរសុខាភិបាលខេត្ត ប្រធានមន្ទីរពេទ្យបង្អែកស្ទោង ប្រធានការិយាល័យស្រុកប្រតិបត្តិស្ទោង ប្រធានមណ្ឌលសុខភាពចំណុះឱ្យមន្ទីរពេទ្យបង្អែកស្ទោងគ្របដណ្ដប់លើឃុំទាំង១៣នៃស្រុកស្ទោង និង៥ឃុំនៃស្រុកប្រាសាទបល្ល័ង្ក ដែលមានភូមិសរុប១៧០ភូមិ មានបុគ្គលិកសរុប១៨៧នាក់ និងមានប្រជាជនសរុប ១៥៨,៣៥១នាក់ផងដែរ។ អត្ថបទរដ្ឋបាលស្រុកស្ទោង.ពីនិត្យដោយអ៊ុមញឹប។
