កីឡាករទូកខ្លាខ្មៅសាមគ្គីមានជ័យបារមីសឹករងកំពង់ធំ ត្រៀមខ្លួនប្រកួតដណ្ដើមយកជ័យជម្នះ អបអរសាទរក្នុងពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅខេត្តកំពង់ធំ នាពេលខាងមុខ
(កំពង់ធំ)÷ ដើម្បីលើកទឹកចិត្តដល់កីឡាករទូកខ្នាតអន្តរជាតិ ដែលមានកម្លាំងត្រូវអុំចំនួន២២នាក់ និងកម្លាំងបម្រុងចំនួន៨នាក់សរុបចំនួន៣០នាក់ ដែលត្រូវត្រៀមខ្លួនចូលរួមអបអរសារទរ ប្រកួតដណ្ដើមយកជ័យជម្នះ ក្នុងពិធីបុណ្យអុំទូកបណ្ដែតប្រទីប និងសំពះព្រះខែ អកអំបុក នៅខេត្តកំពង់ធំ ដែលនិងប្រព្រឹត្តទៅនៅថ្ងៃទី១៦ ដល់ ថ្ងៃទទី១៧ ខែតុលា ឆ្នាំ២០២៤ នាពេលខាងមុខនេះ ដែលជាទូកក្រោមការឧបត្ថម្ភគាំទ្ររបស់បញ្ជាការដ្ឋានតំបន់ប្រតិបត្តិការសឹករងកំពង់ធំ យោធភូមិភាគទី៤។
នៅព្រឹកថ្ងៃទី៧ ខែតុលា ឆ្នាំ២០២៤ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំសហការី ទៅសំណេះសំណាលសាកសួរសុខទុក្ខ លេីកទឹកចិត្ត និងនាំយកអាវយឺត និងមួកចំនួន៣០ អាវ មួក ព្រមទាំងភេសជ្ជៈ និងថវិកាមួយចំនួន ឧបត្ថម្ភជូនដល់កម្លាំងក្រុមកីឡាករអុំទូក ខ្នាតអន្តរជាតិ ឈ្មោះថាខ្លាខ្មៅសាមគ្គីមានជ័យបារមី សឹករងកំពង់ធំ ដែលកន្លងទៅនេះ បានចូលរួមប្រកួតទទួលបានជ័យជម្នះ ទទួលបានពានរង្វាន់ ក្នុងការប្រណាំងចំនួន៥ជេីង នៅតាមដងស្ទឹងសែន ខេត្តកំពង់ធំ ក្នុងកម្មវិធីអបអរសាទរបុណ្យភ្ជុំបិណ្ឌប្រពៃណីជាតិខ្មែរ នៅមុខវត្តពៅពិសី ក្រុងស្ទឹងសែន ខេត្តកំពង់ធំ នៅរសៀលថ្ងៃទី០៣ ខែតុលា ឆ្នាំ២០២៤ និងត្រៀមចូលរួមប្រកួតក្នុងពិធីបុណ្យអុំទូក អកអំបុក សំពះព្រះខែ នៅខេត្តកំពង់ធំ នៅពេលខាងមុខនេះ ។
ឧត្តមសេនីយ៍ទោ សោម ស៊ុន បានបញ្ជាក់ថា ក្រោមដំបូលសុខសន្តិភាព និងការអភិវឌ្ឍន៍រីកចម្រើនរបស់ប្រទេសជាតិ ក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ប្រទេសជាតិយើងបន្តឈានឆ្ពោះទៅកាន់ការអភិវឌ្ឍរីកចម្រើនបន្ថែមទៀត ។ ប្រពៃណីទំនៀមទំលាប់របស់ជាតិ ត្រូវបានលើកកម្ពស់ ដើម្បីប្រជាជនសប្បាយរីករាយ ក្រោមម្លប់សុខសន្តិភាព ។ ហេីយនៅក្នុងឱកាសនេះ ឧត្តមសេនីយ៍ទោ សោម ស៊ុន បានណែនាំដល់ក្រុមកីឡាករទូកខ្នាតអន្តរជាតិ ខ្លាខ្មៅសាមគ្គីមានជ័យបារមី សឹករងកំពង់ធំ ត្រូវខិតខំប្រឹងប្រែងហ្វឹកហាត់ត្រៀមខ្លួនចូលរួមប្រកួតអបអរសារទរ ក្នុងប្រណាំងទូកនៅខេត្តកំពង់ធំ ឲ្យទទួលបានជោគជ័យបន្តទៀត និងប្រកបដោយស្មារតីសាមគ្គីភាព ឯកភាពជាតិខ្មែរ ។
លោក កែន សិរីរដ្ឋមុន្នី តំណាងឲ្យក្រុមកីឡាករទូកខ្លាខ្មៅសាមគ្គីមានជ័យបារមី សឹករងកំពង់ធំ ដែលជាទូកគាំទ្រ និងឧបត្ថម្ភដោយបញ្ជាការដ្ឋានតំបន់ប្រតិបត្តិការសឹករងកំពង់ធំ បានថ្លែងអំណរគុណចំពោះឧត្តមសេនីយ៍ទោ សោម ស៊ុន និងថ្នាក់ដឹកនាំនៃបញ្ជាការដ្ខានតំបន់ប្រតិបត្តិការសឹករងកំពង់ធំ ដែលបានជួយគាំទ្រដល់កីឡាករ តាំងពីដើមរៀងមក និងបានប្ដេជ្ញាចិត្ត ក្នុងការហ្វឹកហាត់ចាប់ពីពេលនេះតទៅរហូតដល់ពេលប្រកួត ឱ្យទទួលបានជោគជ័យ ដើម្បីអបអរសាទរពិធីអុំទូក បណ្ដែតប្រទីប និងសំពះព្រះខែ អកអំបុក នៅក្នុងឆ្នាំ២០២៤នេះ។ អត្ថបទតំបន់សឹករងកំពង់ធំ-ពិនិត្យដោយអ៊ុមញឹប។
