ព្រះចៅអធិការវត្តឌួងសូរិយា ហៅក្ដីដូង អំពាវនាវដល់ប្រជាពលរដ្ឋ ក៏ដូចជាយុវជន ងាកមកចូលរួមធ្វើបុណ្យឱ្យបានច្រើន ដើម្បីអនាគតប្រទេសជាតិយើង ជាការសាមគ្គីភាព ក៏ដូចជាដើម្បីអនាគតទៅមុខ

(កំពង់ធំ)៖ព្រះភិក្ខុធម្មបាលោ ជ សុចាយ ព្រះចៅអធិការវត្តឌួងសូរិយា ហៅក្ដីដូង និងជាធម្មធរមន្ត្រីសង្ឃស្រុកកំពង់ស្វាយអំពាវនាវដល់ប្រជាពលរដ្ឋក៏ដូចជាយុវជនងាកមកចូលរួមធ្វើបុណ្យឱ្យបានច្រើនដើម្បីអនាគតប្រទេសជាតិយើង ជាការសាមគ្គីភាព ក៏ដូចជាដើម្បីអនាគតទៅមុខ។

ព្រះភិក្ខុធម្មបាលោ ជ សុចាយ ព្រះចៅអធិការវត្តឌួងសូរិយា ហៅក្ដីដូង បានថ្លែងប្រាប់ថ្ងៃទី២១ ខែ កញ្ញា ឆ្នាំ ២០២៤នៅវត្តឌួងសូរិយា ហៅវត្តីដួងភូមិក្តីដូងឃុំក្តីដូង ស្រុកកំពង់ស្វាយ ខេត្តកំពង់ធំ។

ព្រះអង្គបន្តថាញោមញាតិមកចូលរួមដាក់បិណ្ឌ មានច្រើន មិនខុសពីសព្វឆ្នាំប៉ុន្មានមុនទេ ដោយឡែកពាក់ព័ន្ធទៅនឹងការរៀបចំខ្លួនឥរិយបថរបស់ពួកគាត់ ក៏យើងឃើញថាមានរបៀបរៀបរយច្រើន ទាំងការស្លៀកពាក់ ទាំងការរាប់បាត្រ បោះបាយបិណ្ឌជាដើម ។ក្នុងឆ្នាំនេះឃើញពួកគាត់អញ្ជើញមកវត្ត ការស្លៀកពាក់របស់គាត់ រាល់ការបំពេញបុណ្យកុសលរបស់គាត់ឃើញថាមានការយល់ដឹងច្រើន ។ក្រោមការដឹកនាំរបស់សម្ដេចតេជោ ក៏ដូចជាបន្តវេនដោយសម្ដេចបវរធិបតី ជាពិសេសថ្នាក់ដឹកនាំខេត្តដែលមានលោក នួន ផារ័ត្ន ជាថ្នាក់ដឹកនាំ លោកបានរៀបចំមានសណ្ដាប់ធ្នាប់ល្អពិសេសគឺពាក់ព័ន្ធនៅក្នុងទីវត្តអារាម គឺមន្ត្រីរាជការ បងប្អូនប្រជាពលរដ្ឋ ញាតិញោមពុទ្ធបរិស័ទគាត់អញ្ជើញមកវត្តច្រើនកុះករ ហើយនិងចូលរួមកសាងនូវសមិទ្ធផលនានា ជាក់ស្ដែងនៅក្នុងវត្តក្ដីដូងនេះ ដែលកំពុងតែកសាងសាលាធំ ដែលមានបណ្ដោយ ៤៨ ម៉ែត្រទទឹង ៣៨ ម៉ែត្រ ហើយនៅក្នុងនោះក៏យើងបានរំលេចកសាងនៅទូក-ងថ្មី មួយដែរ ដែលជាទំនៀមទម្លាប់មរតកប្រពៃណីរបស់ដូនតា ។

ព្រះអង្គបញ្ជាក់ទៀតថាពាក់ព័ន្ធនឹងសុខសន្តិភាពនេះ គឺសំខាន់បំផុតអាចនិយាយបានថាដែលយើងមានឱកាសបានបុណ្យទានដូចសព្វថ្ងៃនេះ បើសិនណាគ្មានសន្តិភាព ប្រទេសជាតិមិនមានរបៀបរៀបរយ ការដឹកនាំមិនមានលក្ខណៈច្បាស់លាស់ទេការធ្វើបុណ្យក៏អត់មានដែរ ។នេះគឺសរបញ្ជាក់ឲ្យឃើញថាប្រទេសយើងគឺសន្តិភាព ទើបយើងអាចបំពេញបុណ្យកុសលបាន ។

ក្នុងនាមអាត្មាភាពជាចៅអធិការវត្ត ពិសេសនៅក្នុងឱកាសបុណ្យទាននេះ សូមចម្រើនពរទៅដល់ ជាពិសេសយុវជន ឱ្យគាត់មានការប្រឹងប្រែងសិក្សារៀនសូត្រ ព្រោះមានតែការសិក្សាទេ ទើបយើងអាចជួយអភិវឌ្ឍភូមិឃុំ ស្រុករបស់យើង ពិសេសគឺប្រទេសជាតិរបស់យើងបាន គឺតាមរយៈការរៀនសូត្រ។