ឯកឧត្តម កែ ក្រានីត អញ្ជើញជួបសំណេះសំណាល និងលើកទឹកចិត្តវីរៈកងទ័ពជួរមុខនិង ជនភៀសសឹកទិសខេត្តព្រះវិហារ

(កំពង់ធំ)÷ នាពេលថ្មីៗនេះឯកឧត្តម កែ ក្រានីត បានដឹកនាំសប្បុរសជននាំយកនូវគ្រឿងឧបភោគបរិភោគ សម្ភារប្រើប្រាស់ជួបសំណេះសំណាលសួរសុខទុក្ខលើកទឹកចិត្តវីរៈកងទ័ព និងពុកម៉ែបងប្អូនប្រជាជន នៅជំរុំភៀសខ្លួនទិសខេត្តព្រះវិហារ។

ក្នុងឱកាសនោះដែរឯកឧត្តមបានសម្ដែង នូវការគោរពដឹងគុណ កោតសរសើរខ្ពស់ដល់វីរភាព វីរៈយុទ្ធជនកងទ័ពរបស់យើងដែលបាន ខិតខំតស៊ូពុះពារប្រយុទ្ធប្រឆាំងតទល់ជាមួយនឹងចោរសៀមឈ្លានពាននៅក្នុងសមរភូមិ និងក្រាញននៀលការពារជាតិមាតុភូមិមិនឱ្យបាត់បង់មួយមីលីម៉ែត្រ ដើម្បីរក្សានូវបូរណភាពទឹកដីសុវណ្ណភូមិនៃយើងដែលជាកេរដំណែលរបស់ដូនតា និងរក្សាបាននូវសុខសុវត្ថិភាពជូនពុកម៉ែបងប្អូនប្រជាពលរដ្ឋខ្មែរគ្រប់រូបដោយសុខក្សេមក្សាន្ត។

លើសពីនេះឯកឧត្តម បានអំពាវនាវដល់ពុកម៉ែបងប្អូនប្រជាពលរដ្ឋខ្មែរគ្រប់រូប ត្រូវនាំគ្នាមានស្មារតីជាតិនិយមឱ្យបានខ្ពស់បំផុត ជាពិសេសត្រូវប្រឆាំងដាច់ខាតនូវការបង្កឱ្យមានសង្គ្រាមឈ្លានពានរបស់ថៃមកលើព្រះរាជាណាចក្រកម្ពុជា ហើយគាំទ្រពេញទំហឹងនូវយុទ្ធសាស្ត្រនិងការដោះស្រាយប្រកបដោយសន្តិវិធី និងឈរលើគោលការណ៍ច្បាប់អន្តរជាតិជាធរមាន ប្រកបដោយភាពឈ្លាសវៃបំផុតរបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ជាមួយនេះផងដែរវីរៈកងទ័ពយើងបានគោរពថ្លែងអំណរគុណយ៉ាងជ្រាលជ្រៅបំផុតដល់ឯកឧត្តម កែ ក្រានីត និងក្រុមការងារដែលតែងតែគិតគូរយកចិត្តទុកដាក់ក្នុងនាមសមរភូមិក្រោយគាំពារសមរភូមិមុខ និងនាំយកនូវគ្រឿងឧបភោគបរិភោគសម្ភារប្រើប្រាស់ព្រមទាំងថវិកាមួយចំនួនមកសួរសុខទុក្ខលើកទឹកចិត្តកងទ័ព ជួរមុខក្នុងឱកាសនេះនិងក្នុងពេលកន្លងមក។

សូមបញ្ជាក់ថាក្នុងឱកាសនេះឯកឧត្តមបានជួបសំណេះសំណាលវីរៈកងទ័ពយើងជាច្រើនទីតាំង ព្រមទាំងជំរុំជនភៀសសឹក១កន្លែង គឺវត្តពើកព្រះគោ ហើយបានឧបត្ថម្ភ ជនភៀសសឹកចំនួន១០០គ្រួសារផងដែរ។ អត្ថបទរដ្ឋបាលស្រុកស្ទោង-ពិនិត្យដោយអ៊ុមញឹប។