ឯកឧត្តមបណ្ឌិតសភាចារ្យ ហង់ជួន ណារ៉ុង អញ្ជើញចុះពិនិត្យមើលដំណើរការសំណេរនៅមណ្ឌលប្រឡង អនុវិទ្យាល័យថ្នល់បែក សម្រាប់ការប្រឡងសញ្ញាបត្រមធ្យមសិក្សាទុតិយភូមិ
(កំពង់ធំ)៖ នាព្រឹកថ្ងៃទី២៨ ខែសីហា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុង ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា ដឹកនាំប្រតិភូក្រសួងអប់រំ យុវជន និងកីឡា ចុះពិនិត្យមើលដំណើរការសំណេរនៅមណ្ឌលប្រឡង អនុវិទ្យាល័យថ្នល់បែក ស្រុកកំពង់ស្វាយ ខេត្តកំពង់ធំ សម្រាប់ការប្រឡងសញ្ញាបត្រមធ្យមសិក្សាទុតិយភូមិសម័យប្រឡង៖ ២៨ សីហា ២០២៥ ដោយស្ថានភាពនៅតាមមណ្ឌលប្រឡងមានបរិយាកាសស្ងប់ស្ងាត់ល្អ។ ក្នុងដំណើរការប្រឡងនេះ គណៈមេប្រយោគគ្រប់រូប បានអនុវត្តតួនាទីរបស់ខ្លួនប្រកបដោយស្មារតីទទួលខុសត្រូវ និងការយកចិត្តទុកដាក់ខ្ពស់។
ឯកឧត្តមបណ្ឌិតសភាចារ្យ ហង់ជួន ណារ៉ុង ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា សូមអំពាវនាវដល់បេក្ខជនទាំងអស់ត្រូវគោរពបទប្បញ្ញត្តិនៃការប្រឡងឱ្យបានល្អប្រសើរ ជាពិសេសមិនត្រូវលាក់ទុកជាប់នឹងខ្លួននូវឧបករណ៍អេឡិចត្រូនិកគ្រប់ប្រភេទចូលក្នុងមណ្ឌលប្រឡង ឬបន្ទប់ប្រឡងជាដាច់ខាត។ ក្នុងករណីរកឃើញថាបានប្រព្រឹត្តសកម្មភាពផ្ទុយនឹងបទប្បញ្ញត្តិ និងកម្រិតវិន័យ បេក្ខជននឹងត្រូវបានកំណត់ឱ្យធ្លាក់ជាស្វ័យប្រវត្តិ។
គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិទូទាំងប្រទេស សម័យប្រឡង៖ ២៨ សីហា ២០២៥ មានបេក្ខជនចុះឈ្មោះ ប្រឡងសរុប ១៤៦ ៧២០ នាក់ ស្រី ៨១ ៤៤២ នាក់ ក្នុងនោះ៖ បេក្ខជនថ្នាក់វិទ្យាសាស្ត្រ មានចំនួន ៤០ ៦៧៨ នាក់ ស្រី ២៤ ៥១៩ នាក់ បេក្ខជនថ្នាក់វិទ្យាសាស្ត្រសង្គម មានចំនួន ១០៦ ០៤២ នាក់ ស្រី ៥៦ ៩២៣ នាក់។ សម្រាប់មណ្ឌលប្រឡងនៅក្នុងខេត្តកំពង់ធំមានចំនួន១៣មណ្ឌល ចំនួនបន្ទប់មាន២៣៤បន្ទប់ បេក្ខជនប្រឡងមានចំនួន៥.៧៩៥នាក់ ស្រី៣.៣១៩នាក់។ មានការបែងចែក២មុខវិទ្យាគឺ ថ្នាក់វិទ្យាសាស្រ្តមាន០២មណ្ឌល មានបន្ទប់៥១បន្ទប់ ថ្នាក់វិទ្យាសាស្រ្តសង្គមមាន១១មណ្ឌល មានបន្ទប់១៨៥បន្ទប់ផងដែរ។ អត្ថបទក្រសួងអប់រំយុវជន និងកីឡា