រដូវបិទឡូតិ៍នេសាទក្នុងរដូវត្រីពងកូន កម្លាំងជំនាញចម្រុះនៅតែបន្តចុះបង្ក្រាបបទល្មើសនេសាទបឹងទន្លេសាប ក្នុងភូមិសាស្ត្រខេត្តកំពង់ធំ

(កំពង់ធំ)÷ លោក កែវ សុឃឿន នាយសង្កាត់រដ្ឋបាលជលផលបារាយណ៍(ប្រចាំស្រុកតាំងគោក) បានចូលរួមជាមួយទីបញ្ជាការស្រាលកោះរះ បានចុះបង្ក្រាបបទល្មើសជលផលនៅចំណុច រលំ បឹងវៀន ក្ដាមពង និងព្រែកទាល់ ស្ថិតនៅក្នុងភូមិសាស្រ្តឃុំស្រឡៅ ស្រុកតាំងគោក ខេត្តកំពង់ធំ។ នៅថ្ងៃទី២៨ ខែសីហា ឆ្នាំ២០២៥ កម្លាំងជំនាញចម្រុះចុះបង្ក្រាបបទល្មើសនេសាទបឹងទន្លេសាប ជាលទ្ធផលអនុវត្តបាន០២ករណី បានធ្វើការរុះរើបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន÷ ១.របាំងសាច់អួនក្រឡាញឹកចំនួន០១របាំង ប្រវែង២៥ម៉ែត្រ ឡុកចំនួន០១គ្រឿងលប/លូចំនួន០១មាត់។ ២.របាំងស្បៃមុងចំនួន០១របាំងប្រវែង៣២ម៉ែត្រ ឡុកចំនួន០១គ្រឿង លប/លូចំនួន០១មាត់ និងបង្គោលចំនួន២៤ដើម។

ចំណែកឯលោក លឹម សុថាត នាយសង្កាត់រដ្ឋបាលជលផលកំពង់ស្វាយក្រោម បានចូលរួមជាមួយក្រុមការងារចម្រុះដឹកនាំដោយលោកវរសេនីទោ កែ ម៉ៃនាយរងសេនាធិការតំបន់ប្រតិបត្តិការសឹករងកំពង់ធំ(យោធភូមិភាគទី៤)រួមសហការជាមួយទីបញ្ជាការស្រាលឈរជើងនៅឃុំផាត់សណ្តាយ ស្រុកកំពង់ស្វាយ បានចុះទប់ស្កាត់និងបង្រ្កាបបទល្មើសនេសាទនៅចំណុច ក្រឡុកបាយក្អែក ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ។ ជាលទ្ធផលអនុវត្តបាន០១ករណីបានរុះរើនិងបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន÷ របាំងសាច់អួនក្រឡាញឹកចំនួន០១ របាំងប្រវែង១៥០ម៉ែត្រ ទ្បុកចំនួន០២គ្រឿង លប/លូចំនួន០៤មាត់ បង្គោលចំនួន៩០ដើម ចាក់ព្រលែងកូនត្រីចម្រុះទម្ងន់០៥គីឡូក្រាមចូលទន្លេវិញ។

នៅថ្ងៃដដែលលោក គន ចាន់សីហា នាយសង្កាត់រដ្ឋបាលជលផលស្ទោង បានចុះប្រតិបត្តិការនិងនង្រ្កាបបទល្មើសជលផលនៅចំណុច ឆេះអង្រុត បឹងខាល ឃុំចំការក្រោម ស្រុកស្ទោង ខេត្តកំពង់ធំ ជាលទ្ធផលអនុវត្តបាន០១ករណី បានរុះរើបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន÷ របាំងស្បៃមុងចំនួន០៥របាំង ប្រវែង៣០០ម៉ែត្រ ឡុកចំនួន០៥គ្រឿងលូចំនួន០៥មាត់ បង្គោលចំនួន៧០ដើម ចាក់ព្រលែងត្រីទំងន់១០គីឡូក្រាមចូលទន្លេវិញ។ អត្ថបទខណ្ឌរដ្ឋបាលជលផលកំពង់ធំ-ពិនិត្យដោយអ៊ុមញឹប។