ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ថា ទោះបីមមាញឹកក្នុងភារកិច្ចស្នូល តែការបង្ក្រាបបទល្មើសនេសាទខុសច្បាប់ ក្នុងរដូវបិទនេសាទ ត្រូវតែអនុវត្តឲ្យបានមុឺងម៉ាត់ និងមានប្រសិទ្ធភាព តាមបទបញ្ជារបស់ប្រមុខរាជរាជរដ្ឋាភិបាល
(ខេត្តកំពង់ធំ)៖ ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ថា ទោះបីជាបច្ចុប្បន្នកងកម្លាំង នៃបញ្ជាការដ្ឋានតំបន់ប្រតិបត្តិការសឹករងកំពង់ធំ កំពុងមមាញឹកក្នុងភារកិច្ចស្នូលយ៉ាងណាក្តី តែការបំពេញភារកិច្ចក្នុងការបង្ក្រាបបទល្មើសធនធានធម្មជាតិ មិនអាចបោះបង់ចោលបានឡើយ។ ទាំងការបង្ក្រាបបទល្មើសព្រៃឈើ និងការបង្ក្រាបបទល្មើសនេសាទ ពិសេសក្នុងរដូវហាមឃាត់សម្រាប់ឱកាសត្រីពងកូន ដែលជនល្មើសមួយចំនួននៅតែលួចប្រើប្រាស់ឧបករណ៍នេសាទខុសច្បាប់។ ប្រសាសន៍នេះត្រូវបានមេបញ្ជាការតំបន់ប្រតិបត្តិការសឹករងកំពង់ធំ ក្រេីនរំលឹក និងដាក់បទបញ្ជាបន្ថែមដល់កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលកំពុងសហករជាមួយកម្លាំងចម្រុះ បំពេញភារកិច្ចបង្ក្រាបបទល្មើសនេសាទនៅក្នុងភូមិសាស្ត្រឃុំផាត់សណ្ដាយ ស្រុកកំពង់ស្វាយ និងឃុំពាមបាង ស្រុកស្ទោង ខេត្តកំពង់ធំ នាព្រឹកថ្ងៃទី១០ ខែកក្កដា ឆ្នាំ ២០២៥។
ឧត្តមសេនីយ៍ទោ សោម ស៊ុន បានគូសបញ្ជាក់បន្ថែមទៀតថា ជារៀងរាល់ថ្ងៃក្នុងរដូវបិទនេសាទនេះ កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានសហការជាមួយកងកម្លាំងចម្រុះ ទាំងពីរទីបញ្ជាការស្រាល បង្ក្រាបបានឧបករណ៍នេសាទល្មើសច្បាប់ មានរបាំងសាច់អួនខុសទំហំកំណត់ និងរបាំងស្បៃមុង ដែលច្បាប់បានហាមឃាត់ដាច់ខាត បានប្រមាណពី១,៥០០ ទៅ២,០០០ ម៉ែត្រ ជារៀងរាល់ថ្ងៃ ព្រមទាំងឧបករណ៍ល្មើសច្បាប់ផ្សេងទៀតផងដែរ ។ហើយសកម្មភាពនេះបានកើតឡើងនៅតំបន់ដែលមានភូមិសាស្ត្រស្ពុកស្មាញ ដូចជាព្រៃស្មោង ព្រៃកក់ ដែលកងកម្លាំងរបស់យើងលំបាកក្នុងការធ្វើដំណើររុករកក្នុងភូមិសាស្ត្រស្រុកស្មាញ។
ឧត្តមសេនីយ៍ទោ សោម ស៊ុន បានប្តេជ្ញាចិត្តថា ទោះបីជាមានការលំបាកស្មុគស្មាញយ៉ាងណាក្តី តែកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ នៅតែបន្តសហការជាមួយកងកម្លាំងចម្រុះ ដើម្បីធ្វើសកម្មភាពការពារទប់ស្កាត់ និងបង្ក្រាបបទល្មើសនេសាទនេះ ឲ្យមានប្រសិទ្ធភាព តាមបទបញ្ជារបស់ប្រមុខរាជរដ្ឋាភិបាលនៃព្រះរាជាណាចក្រកម្ពុជា និងបទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ព្រមទាំងការដឹកនាំបញ្ជាដោយផ្ទាល់ពីឯកឧត្តមនួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ឲ្យទទួលបានជោគជ័យ។ អត្ថបទតំបន់សឹករងកំពង់ធំ-ពិនិត្យដោយអ៊ុមញឹប។
