គណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំ ផ្សព្វផ្សាយច្បាប់ស្ដីពីជលផលថ្មី ស្តីពីការបង្ក្រាបបបទល្មើសនេសាទ នៅតំបន់បឹងទន្លេសាប
ខេត្តកំពង់ធំ៖ នៅព្រឹកថ្ងៃទី ០២ ខែកក្កដា ឆ្នាំ ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណៈកម្មការការពារ ទប់ស្កាត់ និងបង្ក្រាបទល្មើសធនធានធម្មជាតិ ខេត្ត អមដំណើរដោយលោក ជិន ស៊ីថា នាយខ័ណ្ឌរដ្ឋបាលជលផល ខេត្តកំពង់ធំ នៃមន្ទីរកសិកម្ម រុក្ខាប្រមាញ់ និងនេសាទខេត្ត បានទៅផ្សព្វផ្សាយច្បាប់ស្ដីពីជលផលថ្មី និងបទបញ្ជារបស់ឯកឧត្តមនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ស្ដីពីការការពារ ទប់ស្កាត់ និងបង្ក្រាបបទល្មើសនេសាទខុសច្បាប់នៅក្នុងតំបន់បឹងទន្លេសាប ក្នុងរដូវបិទនេសាទ ដែលពិធីនេះប្រព្រឹត្តទៅនៅតំបន់កោះក្របី ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ ។
លោក ជិន ស៊ីថា បានផ្សព្វផ្សាយចំណុចសំខាន់ៗនៃច្បាប់ស្ដីពីជលផលថ្មី ដែលត្រូវអនុវត្តន៍នៅក្នុងរដូវបិទនេសាទជូនកងកម្លំាងចម្រុះ និងបានបញ្ជាក់បន្ថែមទៀតថា មន្រ្តីស្ថាប័នជំនាញជលផលគ្រប់ថ្នាក់នៅខេត្តកំពង់ធំ ត្រូវអនុវត្តន៍ឲ្យបានត្រឹមត្រូវតាមច្បាប់ស្តីពីជលផល និងជាស្នូលឲ្យកងកម្លាំងក្នុងការអនុវត្តន៍ច្បាប់ដោយត្រូវបំពេញឯកសារផ្សេងៗគ្រប់គ្រាន់ក្នុងពេលដែលកងកម្លាំងបញ្ជូនឧបករណ៍បទល្មើស ឬជនសង័្សយមកស្ថាប័នជំនាញ ជាមួយនេះដែរត្រូវចូលរួមជាមួយអាជ្ញាធរដែនដី និងកងកម្លាំងទាំងបី ក្នុងការអប់រំ ផ្សព្វផ្សាយច្បាប់ថ្មីនេះជូនប្រជាពលរដ្ឋ និងប្រជានេសាទឲ្យបានជ្រួតជ្រាប ។
ឧត្តមសេនីយ៍ទោ សោម ស៊ុន បានផ្សព្វផ្សាយនូវបទបញ្ជារបស់ឯកឧត្តមនាយឧត្តមសេនីយ៍ អគ្គមេបញ្ជាការនៃកងយោធពលខេមរភូមិន្ទ ដែលបានថ្លែងប្រគល់ភារកិច្ចនៅក្នុងកិច្ចប្រជុំ ត្រួតពិនិត្យស្ដីពីវឌ្ឍនភាពការងារបង្ក្រាបបទល្មើសនេសាទខុសច្បាប់គ្រប់ប្រភេទនៅក្នុងតំបន់បឹងទន្លេសាប នៅខេត្តពោធិ៍សាត់ កាលពីថ្ងៃទី ២៩ ខែមិថុនា ឆ្នាំ២០២៦ កន្លងទៅថ្មីៗនេះ ដោយបានបញ្ជាក់ថា៖ កងកម្លាំងប្រដាប់អាវុធទាំងបី អាជ្ញាធរដែនដីនៅគ្រប់លំដាប់ថ្នាក់ រួមជាមួយស្ថាប័នជំនាញពាក់ព័ន្ធ ត្រូវគោរពប្រតិបត្តិយ៉ាងម៉ឺងម៉ាត់នូវបទបញ្ជារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការបង្ក្រាបបទល្មើសនេសាទខុសច្បាប់គ្រប់ប្រភេទ ឱ្យទទួលបានជោគជ័យ ដើម្បីជាផលប្រយោជន៍របស់សង្គមជាតិនិងប្រជាពលរដ្ឋយើងនៅគ្រប់មជ្ឈដ្ឋាននានា ។ ហើយបច្ចុប្បន្ននេះប្រជាពលរដ្ឋទូទៅបានអបអរសាទរចំពោះផលត្រីដែលបានសម្បូរឡើងវិញ ក្រោយពីការបង្ក្រាបបទល្មើសនេសាទខុសច្បាប់របស់យើង ពិសេសការចូលរួមជាស្នូលរបស់កងកម្លាំងចំណុះឱ្យបញ្ជាការដ្ឋានកងទ័ពជើងគោក ។ ជាមួយនេះដែរ ឧត្តមសេនីយ៍ទោ សោម ស៊ុន ក៍បានថ្លែងអំណរគុណចំពោះកងកម្លាំងចម្រុះទាំងអស់នៅទីបញ្ជាការស្រាលបង្ក្រាបបទល្មើសនេសាទខុសច្បាប់ទាំងពីរគោលដៅ នៅឃុំពាមបាង ស្រុកស្ទោង និងនៅឃុំផាត់សណ្តាយ ស្រុកកំពង់ស្វាយ ខេត្តកំពង់ធំ ដែលបានខិតខំប្រឹងប្រែងបំពេញភារកិច្ចនេះប្រកបដោយស្មារតីទទួលខុសត្រូវខ្ពស់ នាពេលកន្លងទៅ ដោយទទួលបាននូវលទ្ធផលល្អប្រសើរគួរជាទីមោទនៈ ។
ឧត្តមសេនីយ៍ទោ សោម ស៊ុន ផ្សព្វផ្សាយបទបញ្ជារបស់ឯកឧត្តមនាយឧត្តមសេនីយ៍ អគ្គមេបញ្ជាការនៃកងយោធពលខេមរភូមិន្ទ ក្នុងការបន្តបង្ក្រាបបទល្មើសនេសាទខុសច្បាប់គឺ ៖ ទី ១ ត្រូវបង្ក្រាបឲ្យបានឧបករណ៍ស្បៃមុង ដែលដាក់នេសាទខុសច្បាប់នៅគ្រប់ទីកន្លែង ព្រោះវាបានបំផ្លិចបំផ្លាញធនធានមច្ឆជាតិយ៉ាងធ្ងន់ធ្ងរ ។ ទី២ ត្រូវបង្ក្រាបឲ្យបានជាដាច់ខាតនូវការប្រើប្រាស់ឧបករណ៍ឆក់ត្រីគ្រប់រូបភាព និងទី៣ ត្រូវការពារឲ្យបានតំបន់អភិរក្សពូជត្រី នៅគ្រប់ទីកន្លែង ដេីម្បីរក្សាពូជត្រីយេីងឲ្យសំបូរឡេីងវិញជារៀងរហូត ។ ជាមួយនេះផងដែរ មិនត្រូវឲ្យមានការនេសាទលៀសដោយប្រើប្រាស់គ្រឿងម៉ាសុីនជាដាច់ខាត ។
នៅក្នុងឱកាសនេះ ឧត្តមសេនីយ៍ទោសោម ស៊ុន ក៍បានប្រគល់ប្រេងសាំង ចំនួន ៨០០ លីត្រ និងថវិកាមួយចំនួន ដែលជាអំណោយរបស់ឯកឧត្តមនាយឧត្តមសេនីយ៍អគ្គមេបញ្ជាការនៃកងយោធពលខេមរភូមិន្ទ ជូនដល់កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំទាំងពីរគោលដៅ សម្រាប់ប្រើប្រាស់ក្នុងការបំពេញភារកិច្ចបន្តក្នុងរដូវបិទនេសាទនេះឲ្យទទួលបានជោគជ័យបន្ថែមទៀត ។អត្ថបទតំបន់ប្រតិបត្តិការសឹករងកំពង់ធំ-ពិនិត្យដោយអ៊ុមញឹប។
