អ្នកសារព័ត៌មានជាង៣០នាក់ អញ្ជើញចូលរួមហូបអាហារសាមគ្គី នៅស្នងការនគរបាលខេត្តកំពង់ធំ

(កំពង់ធំ)៖ កាលពីរសៀលថ្ងៃទី២៦ ខែមេសា ឆ្នាំ២០២៥ កន្លងទៅនេះ នៅស្នងការដ្ឋាននគរបាលខេត្តកំពង់ធំ បានរៀបចំកម្មវិធីអាហារសាមគ្គីមួយ ដោយអញ្ជើញភ្ញៀវមកពីក្រសួងស្ថាប័នមន្ទីរជុំវិញខេត្ត និងអ្នកសារព័ត៌មានជាង៣០នាក់ ចូលរួមផងដែរ។

កម្មវិធីនេះ មានគោលបំណងធ្វើឱ្យកាន់តែរឹងមាំសម្ព័ន្ធភាពល្អរវាងអង្គភាពនគរបាល និងមិត្តអ្នកសារព័ត៌មាន ក្នុងការផ្សព្វផ្សាយព័ត៌មានពាក់ព័ន្ធនឹងការអនុវត្តច្បាប់ និងសន្តិសុខសាធារណៈនៅក្នុងខេត្ត។

លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានថ្លែងអំណរគុណដល់អ្នកសារព័ត៌មានទាំងអស់ ចំពោះការចូលរួមយ៉ាងសកម្មក្នុងការផ្សព្វផ្សាយព័ត៌មានអំពីសកម្មភាពនានារបស់អាជ្ញាធរ និងជំនួយក្នុងការរក្សាសន្តិសុខ និងសណ្តាប់ធ្នាប់សាធារណៈ។

ក្នុងឱកាសនេះ ផងដែរ អ្នកសារព័ត៌មានបានបង្ហាញពីការសរសើរចំពោះការប្រឹងប្រែងរបស់ស្នងការខេត្ត និងបានស្នើសុំឱ្យមានកិច្ចសហការជាបន្តបន្ទាប់ ដើម្បីបង្កើនការផ្សព្វផ្សាយព័ត៌មានឱ្យបានទាន់ពេលវេលា និងត្រឹមត្រូវ។ កម្មវិធីអាហារសាមគ្គីបានប្រព្រឹត្តទៅក្នុងបរិយាកាសពោរពេញទៅដោយភាពរីករាយ ស្និទ្ធស្នាល និងសេចក្តីទុកចិត្តបំផុត។ អត្ថបទលោក ធូ កែវមុន្នី-ពិនិត្យដោយអ៊ុមញឹប។