ក្រុមការងារសាខាកាកបាទក្រហមកម្ពុជាខេត្តកំពង់ធំ បានចុះពិនិត្យមើលការខូចខាតផ្ទះប្រជាពលរដ្ឋចំនួន៥៦ខ្នង ដែលបណ្ដាលមកពីភ្លៀង និងខ្យល់កន្ត្រាក់ នៅស្រុកបារាយណ៍

(ខេត្តកំពង់ធំ)៖ នៅព្រឹកថ្ងៃទី២៦ ខែមេសា ឆ្នាំ ២០២៥ 
លោក កែវ ផល នាយកសាខាកាកបាទក្រហមកម្ពុជាខេត្ត និងមន្ត្រីសាខា អមដំណើរដោយលោកស្រី ហាក់ ពុទ្ធិតុសិតា អនុប្រធានគណៈកម្មាធិការអនុសាខាកាកបាទក្រហមកម្ពុជាស្រុកបារាយណ៍ ព្រមទាំងក្រុមការងារឃុំ/ភូមិ បានចុះពិនិត្យមើលការខូចខាតដំបូលផ្ទះប្រជាពលរដ្ឋចំនួន៥៦ខ្នងដែលបណ្ដាលមកពីភ្លៀង និងខ្យល់កន្ត្រាក់ ប៉ះពាល់ចំនួន០៤ភូមិ ក្នុងឃុំចុងដូង ស្រុកបារាយណ៍ ខេត្តកំពង់ធំ។

លោកស្រី ហាក់ ពុទ្ធិតុសិតា អនុប្រធានគណៈកម្មាធិការអនុសាខាកាកបាទក្រហមកម្ពុជាស្រុកបារាយណ៍ បានរាយការណ៍ពីមូលហេតុកើតឡើងដោយភ្លៀង និងខ្យល់កន្ត្រាក់នៅវេលាម៉ោង១៥និង៣០នាទី នៅថ្ងៃទី២៥ ខែមេសាឆ្នាំ២០២៥ មានភ្លៀងនិងខ្យល់កន្ត្រាក់បានវាយប្រហារទៅលើតំបន់ឃុំចុងដូង បង្កឱ្យមានការខូចខាតដំបូលផ្ទះប្រជាពលរដ្ឋចំនួន៥៦ខ្នង និងរបើកដំបូលអស់ទាំងស្រុងចំនួន១០ខ្នង មានចំនួន៤ភូមិគឺ ភូមិខ្សាច់ល្អិតប៉ះពាល់ផ្ទះ៤៦ខ្នង ភូមិគូប៉ះពាល់ផ្ទះ០១ខ្នង ភូមិចុងដូងប៉ះពាល់០២ខ្នង និងភូមិទួលសាលាប៉ះពាល់០៧ខ្នង ពុំមានប៉ះពាល់អាយុជីវិតមនុស្ស សត្វនោះឡើយ។

លោក កែវ ផល បានបញ្ជាក់ថា តាមការចុះពិនិត្យជាក់ស្ដែងនៅក្នុងឃុំមានផ្ទះជាច្រើនរបើកដំបូលស័ង្កសី ក្បឿង និងសម្យាប ដែលខូចខាតផ្នែកខ្លះឬអស់ទាំងស្រុង ក្នុងចំណោមនេះ មានផ្ទះខ្លះដែលខូចខាតដល់ជញ្ជាំង ដែលបណ្ដាលមកពីកត្តាធម្មជាតិ បានធ្វើឱ្យខូចខាតផ្ទះប្រជាពលរដ្ឋដែលកំពុងរស់នៅ និងប៉ះពាល់ដំណាំផ្សេងៗ។ ការចុះជាក់ស្ដែងនេះសង្កេតឃើញថាប្រជាពលរដ្ឋមួយចំនួន គាត់បានជួសជុល និងប្រក់ដំបូលបានមួយចំនួនហើយ ព្រោះការពារកុំឱ្យមានភ្លៀងធ្លាក់ប៉ះពាល់ដល់ទ្រព្យសម្បត្តិគាត់នៅក្នុងផ្ទះ។

លោក កែវ ផល នាយកសាខាកាកបាទក្រហមកម្ពុជាខេត្តកំពង់ធំ បានបានអំពាវនាវដល់បងប្អូនប្រជាពលរដ្ឋបន្ថែម ពេលមានភ្លៀង ខ្យល់ ផ្គររន្ទះ សូមបងប្អូនមានការប្រុងប្រយ័ត្នខ្ពស់ រកកន្លែងដែលមានសុវត្ថិភាព ចៀសវាងការគ្រោះថ្នាក់កើតឡើងជាយថាហេតុ ដើម្បីការពារដល់អាយុជីវិតមនុស្ស និងសត្វ ព្រមទាំងដំណាំផ្សេងៗដែលនៅជុំវិញផ្ទះផងដែរ។ អត្ថបទលោក ធូ កែវមុន្នី-ពិនិត្យដោយអ៊ុមញឹប។