សាខាកាកបាទក្រហមកម្ពុជាខេត្តកំពង់ធំ បាននាំយកអំណោយធម៌ទៅប្រគល់ជូនដល់គ្រួសារស្លាប់ដោយរន្ទះបាញ់ នៅស្រុកតាំងគោក
(កំពង់ធំ)÷ នៅថ្ងៃទី២៥ ខែមេសា ឆ្នាំ២០២៥ សាខាកាកបាទក្រហមកម្ពុជា ខេត្តកំពង់ធំ ក្រោមការដឹកនាំដោយ លោកជំទាវ លំ គន្ធារី អនុប្រធានអចិន្ត្រៃយ៍សាខាកាកក្រហមកម្ពុជាខេត្ត តំណាងដ៏ខ្ពង់ខ្ពស់របស់ឯកឧត្តម នួន ផារ័ត្ន ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ធំ ព្រមទាំងអនុសាខាកាកបាទក្រហមកម្ពុជា ស្រុកតាំងគោក មន្ត្រីក្រុមប្រតិបត្តិ បាននាំយកអំណោយមនុស្សធម៌ទៅចូលរួមរំលែកទុក្ក្ខដល់គ្រួសារសពដែលរងគ្រោះដោយរន្ទះបាញ់ស្លាប់ នៅភូមិប៉ាង ឃុំច្រនាង ស្រុកតាំងគោក ដែលជនរងគ្រោះមានឈ្មោះលោក នួន សាន អាយុ៣៨ឆ្នាំ មានសមាជិក០៦នាក់ កាលពីវេលាម៉ោង៦និង៣០នាទីល្ងាច នៅថ្ងៃទី២៤ ខែមេសា ឆ្នាំ២០២៥ ភូមិប៉ាង ឃុំច្រនាង ស្រុកតាំងគោក ខេត្តកំពង់ធំ ។
នាឱកាសនោះផងដែរលោកជំទាវ លំ គន្ធារី បានថ្លែងនូវការសោកស្ដាយ និងសូមចូលរួមមរណៈទុក្ខយ៉ាងក្រៀមក្រំជាទីបំផុត ជាមួយគ្រួសារនៃសព ដែលមរណភាពដោយរន្ទះបាញ់ គ្រួសារសពត្រូវតែតាំងចិត្តឱ្យបានរឹងមាំ ដើម្បីចិញ្ចឹមកូនដែលនៅតូចៗ ឱ្យពួកគាត់បានចូលរៀនដូចកុមារដទៃដែរ។សូមបួងសួង សូមឱ្យដួងវិញ្ញាណក្ខន្ធ លោក នួន សាន បានទៅកាន់សុគតិភព កុំបីឃ្លៀងឃ្លាតឡើយ ។ ក្នុងដំណើរបេសកកម្មនាថ្ងៃនេះផងដែរលោកជំទាវអនុប្រធានអចិន្ត្រៃយ៍បានផ្ដាំផ្ញើដល់បងប្អូនទាំងអស់ត្រូវមានការប្រុងប្រយ័ត្នខ្ពស់ចំពោះគ្រោះធម្មជាតិនេះ សូមខិតខំប្រកបរបររកស៊ីប្រចាំថ្ងៃដើម្បីចូលរួមលើកកម្ពស់ជីវភាពរស់នៅប្រចាំថ្ងៃ ព្រមទាំងរស់នៅប្រកបដោយអនាម័យជាប់ជាប្រចាំគឺ(ផឹកស្អាត ហូបស្អាត និងរស់នៅស្អាត) សម្រាកក្នុងមុងដើម្បី ចៀសផុតអំពីជំងឺគ្រុនឈាមដែលអាចកើតមានគ្រប់ពេលវេលាមិនថាមនុស្សចាស់ឬក្មេងឡើយ។
សូមបញ្ជាក់ផងដែរថា អំណោយបានប្រគល់ជូនគ្រួសារសពរួមមាន÷ អង្ករ៥០គីឡូក្រាម មី០១កេស ត្រីខ០១យួរ ទឹកត្រី០១យួរ ទឹកស៊ីអ៊ីវ០១យួរ និងថវិការមួយចំនួនផងដែរ។ អត្ថបទសាខាកាកបាទក្រហមកម្ពុជាខេត្តកំពង់ធំ-ពិនិត្យដោយអ៊ុមញឹប។
